13
Panapasiene Soloene Anumayamo aliya alisaa yafe huyogiya hunatageana vaiye-mainae.
1 Ani Atiokua Yisasi anagapiti nagoa maineya amaune laga huya Yisasi ke hamanepaiya vayala mainae. Ani vayamogami amakia Panapasiene Simionie kanomona nago agia Naisae. Tagai kefina ani agimoa “Anupa kanoe.” huya neaya agie. Ani kanoene Lusiasia Sailini kanoene Soloenena Manainie. Ani kanoa Helotia Kalili kava kanomona afaluamoe. 2 Nago yupa Yisasi anagamoya kavela mosiya maineya Anumayamo agia alisaga nehuya muse huya havinegae. Havinegageno Alu Aotage Avamumoa amakaifena mage huno humaine “Panapasigani Sologania anahaote aliyate hunateho. Nagaya nago aliyate ago hunatenoe.” huno humaine. 3 Higeya kave mosiya maineya Anumayamotega havinegeya ananute amaya maleya hunatageana umainae.
Panapasigani Sologania Saipalusi kumate umainae.
4 Alu Aotage Avamumoa hunategeana Selusia taviana tipi kalefi haisaga humaiana Saipalusi kotega umainae. 5 Salamisi vayi huana Yuta vayamogami mono nopi haiana Anumaya Koti kea hamapai-mainae. Anakaiene Yoni Makia monaya humaine. 6 Ani Saipalusia ti amulagoyafi hanea kumayagale ute ete huya Pafosi evayi humainae. Ani kumatela nago Yuta kanomoa havige huno “Anumaya Koti aune kano mainoe.” huno nehia kanomo agia Payisasie nehaya kanoa maine. Ani kanomoa tokiyaage kavayaga talo huno veanea ayemavataga nehiane. 7 Ani kanomoa mukia kanafina kava kanomo agia Sesiusi Polusiene nemaiyane. Sesiusi Polusia kanale agu agesaene kanogino Anumaya Koti ke havigahe Panapasigani Sologanife ke higeana eana hapai-mainae. 8 Hapaiageno ani havigeage aune kanoma Payisasia tokiyaage kavama nehia kanomona nago agia Kaliki kefiti Elimasie mage huno nehie “Mani kea havika kagupi omalo.” huno hefalaki-maine. 9-10 Hefalakeanagi Soloa nago agia Poloe agaia agupina Alu Aotage Avamumoa hiya higeno Elimasina aulagafi age-maineno mage huno hapaiye “Kagaya Satani nafanemogae fatago humainea yamona kame kanoa mainane. Savale savala keage kano mainananagino kagai kagupina havi keage yamoa hiya humaine. Naama hana kanomoga Anumaya Koti kamoa fatago humainea kama haneanagi kagaya ‘Kayagimainea ka hanegi oviho.’ huka hamanepaine. Na yu ani havi kavakaa atalegane? 11 Oatalenana anonaa menia havio Anumayamona tokiyaage ayatetila kahaesigeno kaulagamoa osi kanaganoa asu hisigeka yagea oagegane.” huno nehigeno aupaa aulagamoa anile asu higeno ayate aliya kama avelisaya kanohe atiye-maine. 12 Kava kanomoa Sesiasi Polasia naama hia kavala ageteno Yisasife hia kene tokiyaaenefe ageteno tusia amayo aigeno ani kea alino aguafi maleno ametiti humaine.
Nagola Pisitia kotega hanea kumala Atioku kumate uana Yisasi kea hamapai-mainae.
13 Poloenema vaa kanolatana Pafosi kumala ataleya tipi kalefi haisaga humaiya nagola Pamafilia hanea kumala Pega kumate evayi huteya Yoni Makia neanataleno Yelusalemu eteno lavi-maine. 14 Lavigeana anakaya Pega kumala ataleana nago Pisitia kotega kumamo agia Atioku kumate evayi huana Sapati yupa Yuta vayamogami mono nopi haiana mopale mainae. 15 Mopale mainaageya ani mono note soka vayamoya Mosese kae-malenea kene Anumaya Koti amaune vayamoyama kae-malenaya kene hapaliteya nago kanoa hutageno uno ani kanolatafe mage huno humaine “Nelafugatana taguamoma tokiya vaisia kea tanakuafima hanesigetanahena huhaleageta havimano.” huno humaine. 16 Higeno Poloa hetino ayana alisaga huno ke ohutama maiho huno amaveliteno mage huno humaine ‘Isaleli vayamogatamaene nagoa Isaleli omainaya vayala Anumaya Kotina haiya kava haya vayamogatamaene haviho. 17 Isaleli veamogamina Anumaya Kotiamimoa taginagomogamife agaia veane maisayafene huno hapalimategeya Isipi kotega yokala umaiyana Anumaya Kotia amaya higeya tokiyaage veane aitagufeya kasago hageno agaia tokiyaaleti Isipi kotegatila amavalegeya ataleya umainae. 18 Amavaleno vigeya fotia (40) kafu amakaiene kame kotega umaineno veganokano kavama haya kavaamihe mailama huno maineno yagaino maine. 19 Anumaya Kotia sevenia (7) nofi veamoya Kenani nemaiya veamogamina hamae hano higeya faligeno amakai mopa Isaleli veamoya maisaya yafene huno alino amamine.
20 Amamigeya fo hataleti fifitia (450) kafu ani kumatela mainageno anile Anumaya Kotia kasagoya uhagotematesaya vayala amamigeya amakaya maime maime nehaigeno haenagaa nagola Anumaya Kotina aune kanoa Samuelia evayi humaineane. 21 Evayi higeya “Ala sauve kanotia lamio.” huya hageno Anumaya Kotia Solona amamine. Ani kanomona nefa agia Kisie. Penisamini nofi kano maineanagino Soloa fotia (40) kafu kava yagaimateneane. 22 Kava yagaimateno maineanagino Anumaya Kotia neataleno Tevitina hutegeno ala sauve kanoamia maineane. Anumaya Kotia Tevitifena mage huno humaineane
“Yesi nafanea Tevitifena nagaiene nagoke taagu taagesa haneanagino Tevitia mukia nagaima nahaiya kavala hugahie.” huno humaineane.
23 Anumaya Kotia nayona hulokiya vaino mage huno humaine “Tevitina aginagomopiti tamaugafa aligatisia kanoa falote hugahie.” huno humaineanagino ani kanoa Yisasie taugafa aligatisia kano emaine.
24 Yisasia falote ohunea kanafina Yonia Isaleli veamogamina “Kefo yatamihe tamakua aiyahae hutama tina faleho.” huno hamapai-maine. 25 Yonia aliyamaa alino avaya ayegahe nehuno mage huno humaine “Tamakaya nagaifena ‘Anumaya Kotia taugafa aligatigahe hutenea kano emaine.’ hutama nehayanagi nagaya ani kanoa omainogi ani kanoa aupaa egahianagina nagaya afa kanogina agai aiyale ayesuana onategahie.” huno humaine.
26 Nafu-naganagatama Apalahamupiti anagamogatamaene nagoa Isaleli omainaya vayala Anumaya Kotina haiya kava haya vayamogatamaene Anumaya Kotia tamaugafa aligatigahe humainea kea mukiamogatile evayi humaine. 27 Yelusalemu mainaya veamoya kava vayaamiene Yisasina agelama ohunae. Mukia sapati kanafina amaune vayamoya Yisasina kaiyeke huteteya haesaya yafema kae-malenaya kea hapaliyanagi aepaa havilama huya ohavinae. Yisasina kaiyekema hutenaya yafe humainaya kemoa ago falote huno tamage humaine. 28 Kaiyekea huteteya haesageno falisia augafa kefo kavala ohuneanagi Pailatife “Afaa haegeno falino.” huya humainae. 29 Mukia amaune vayamoya agaifema humalenaya kemoa falote huno ago tamage higeya yafaga yosaleti augafaa aliya yafakapi mo-hevaitenae. 30 Mo hevaitayanagi Anumaya Kotia fali-mainefiti alino hetitene. 31 Hetitegeno Yisasia agaiaenema Kaliliti Yelusalemu hai-mainaya anagaamoya amaulagafiti kasagoya yupa evayi higeya age-mainayanagiya menia agaifena mukia Yuta veamogamina hamanepaiye. 32 Hamapai-mainaya yafe tagayaene Anumaya Kotia tamakinago-mogamina hulokiya vaino hamapai-mainea kemona kanale ke tamakaila tamahapaigahe emainone. 33 Ani kemoa falote huno tamagema hisiafene huno Anumaya Kotia tagaila amakinagomogati taulagafi Yisasina ago alino hetitene. Mani kea Yagame Avopi tu (2) molia sapta mage huya kae-malenae
“Kagaya menia nafanenimoga mainane. Meni kanoa nagaya Negafana mainoe.” huno kae-maleneane.
34 Yisasia fali-mainefiti ago ali hetiteneafe eteno falino komufinaga mo okasalisiafene huno nayona Anumaya Kotia mage huno humaineane
“Tevitina ‘Hano ohu manua kanale manu kamigahue.’ huna humainoa manua tamakaila tamamigahue” huno humaineane.
35 Ani yafe nago kemoa nago autamafina mage huno hu-maineane
“Kagaya kanaleya huka huyogi-malenana aliya kanokamona Anumayamoga atalesanageno augafamoa komufinaga okasaligahie.” huno humaineane.
36-37 Mani kea Tevitifena ohune. Tevitia ma mopale mainea kanafina Anumaya Kotina haiya kava humaineanagino faligeya totoamogami hevaimatenaya matimatipi augafamoa kasali-maineanagi Anumaya Kotia Yisasina fali-mainefiti ali hetitenea kanomo augafamoa okasaline. 38 Ani yafe nafunaganagatama havilama hutama haviho ani kanomoma hulatenea kavafe Anumaya Kotia kefo yatamia aigetamateno atalelamatene huta tamahanepaune. 39 Mosesema kahegi malenea kemona akave malesunageno Anumaya Kotia kefo yatia aigetateno atalelategahie hutama tamametiti hisayana aigetamateno ataleotamategahigi Yisasife havitama tamakupi maletama tamametiti hisageno Yisasima fali-mainea yateti Anumaya Kotia mukia kefo yatamia aigetamateno atale-lamategahie. 40-41 Amaune vayamoya mage huya kae-malenae
“Tamakaya kamuge hatagetama vaineamataya veamogatama tamakaya mainaya kanafina nagaya Anumaya Kotina tusiya huna tokiyaage avame yana hugahue. Ani yafe veamoya tamahapaisagetama ‘Tamage nehae.’ hutama ohugahae ani yafe tamamayoa ainagetama faligahae.” huya kae-malenayane. Mani amaune vayama kae-malenaya kea tamakaite evayi hugahigi kaye ho. huno humaine.
42 Poloa mani kea huteno Panapasiene hati-laviana ugahe nehaageya alitalu humainaya veamoya mage hae “Nago Sapati yupa ani monola nagoene me lahapaio.” huya humainae. 43 Nehuya monola hano higeya hati-laviya mukia Yuta vayaene Anumaya Koti kema nehaviya anagala Yuta vea omainaya veanene Pologani Panapasigania anakave nevageana mage huana hamapaie “Tokiyaage hutama Anumaya Kotia kayone hulamatesia yama tamaminea yapi maiho.” huana humainae.
44 Nago Sapati yupa mukia ani kumate veamoya Anumayamo ke havigahe melitalu humainae. 45 Melitalu huya mainageya Yuta vayamoya ageteya amaipamoa haviya higeya Poloma hia kehena “Havige nehie.” huya hu-haviya hutenae. 46 Hu-haviya hunatayanagi Pologani Panapasigania tokiyaage kea mage huana hae “Tamakaya Yuta veamogatamina hagotetaa Anumaya Koti kea tamahapaigahe huanagi mani kemona tamakaveno hutetama ‘Agola maige maige hisuna tahaimu alisuna yafena notahaiyanagita oaligahune.’ hutama haya yafe tamakaila tamataletaa Isaleli vea omainaya veamogamina mo-hama-paigahue. 47 Naa hisuafene huno Anumayamoa mage huno lahapai-maineane
‘Isaleli vea omainaya veamogamina aye-halematesayafene huna ago hulamatenoe. Mukia mopaene mopaene mainaya veamogamina amaku amamena aligatisuafene hutama hamapaigahae.’ huno humaineane.” huana humainae.
48 Nehaageya Isaleli vea omainaya veamoya mani kea haviteya tusia muse huya Anumayamo kea alisaga humainae. Naa nehuya Anumaya Kotina haigenoma “Agola maige maige hisaya tamahaimula aligahae.” huno hapali-malenea veamoya mani kea haviteya aliya amakupi maleya amametiti humainae. 49 Amametiti hageno Anumayamo kemoa mukia kotega ute ete humaine. 50 Ute ete humaineanagi Yuta vayamoya ala amakima hanea aneyaga mono kema nehaviya aneyagamogami amaipaene kava vayamogami amaipaene huya ali hetigeya aepa heya Pologani Panapasiganina ali haviya-hunateteya ani kumategati ananati-talenae. 51 Ananati-talageana anakaya “Mani kavala havi kava nehae.” huana ani kumapiti kugukege yana anaiyafitila aifopo huneataleteana Aikoniamu umainae. 52 Vaanagi Yisasi kema haviya amakupi malenaya veamoya tusia muse hageno Alu Aotage Avamumoa amakupina hiya humaine.