1 Yesu tiyepe a ke kapala iman a ila, le nga lal maiyoko kidi Yuda san mulu be pombe, motong la imadit a ilo pang Yerusalem. 2 Ilo Yerusalem, ngan pombe ye ran atu yo tiwete ene ye di Ibru koodi, ngan tiweta ye Betseda i. Ngan ran tani in iken potai pang ye dada ke koongoo yo tiweta ye Dada Kidi Sipsip, inbe tire bale limi le iwakaii i. 3-4 Inbe di tooltool malala mai yo matamatenge ikap di nga, ngan tikenen bale tina ngan parmana. Di ngan kapala matadi kisis, inbe kapala ngan kedi dook tiap, inbe kapala ngan tikap rama.* Di tooltool kapala yo lodi galanga ye Rau ke Maro nga, ngan lodi tar be betanga damono kasin mulu la iken ye arono 3 le 4 nga. Ngan betanga tina, ngan nen: Di tooltool tina tikenen a tinam kumata le be bangabangana ke Maro isi le si iyeie ran tani in le bolbolbe nga, ngan sei tool yo ipas muku a idu ran i, in ole matamatenge ki imot. 5 Ngan tool kidi atu yo ikap rama a ikenen ye ni tani lapau i, in matamatenge ikauu mukot le iyepe ye rai sangaul tol inbe balana limi be tol oo. 6 Ngan ye kene tani in Yesu ikamata yo ikenen nga, le nga lon tar nen tool i o matamatenge ikauu mukot. Motong la itoru nen, “Ai, ngan lom be tinim dook mulu, too?”

7 Ngan tool tani se iraua betanga ki nen, “Atoo, tool mai, au i taukak tool yo be ilonau a ikau au a adu ran lono ye kene yo ran bolbolbe ye i. Au tauk i akapye be adu ran lono, bong di diek yo timuku nga, ngan ole tidada sukau a tidu ran lono, inbe akino.”

8 Motong la Yesu iwete panga nen, “Kumadit! Kouo mie kiong a kupa.” 9 Yesu iwete nen, le tina pattu leu, inbe tool tani in tinini dook mata mulu, inbe imadit a ikaua mie ki a ipa a ila. Ngan ye ke tani yo Yesu ikarata ye i, in ye lal kidi Yuda ke sungunu, 10 le di Yuda tikamata yo ikaua mie ki a ipa nga, le nga tiwete panga nen, “Ai, katai nga lal kiidi Yuda ke sungunu, inbe ger kiidi igunkalidi be tayei dada yo nen ngan be.”

11 Bong ngan iraua betanga kidi nen, “Tool yo ikaratau a le tinik dook mata mulu i, in ya la iwete pau be akaua mie kiau a apa i.”

12 Motong la titoru nen, “Sei tool iwete pong be kouo mie kiong a kupa i?”

13 Ngan tool tani yo tinini dook mata mulu i, in lon sarere ye tool yo iwete panga nen i, yesoo Yesu la ikatbon di tooltool malala mai yo tiyepe ye ni tani in nga.

14 Mooloo tiap, inbe Yesu ilo bareme mai ke sungunu lono, ngan ikamata tool tani in, le nga iwete panga. Iyei ne, “Kumata! Ong i tinim dook mata mulu oo. Le kin kuyei noonoo mulu be. Ole nen ngan moonoo san mulu yo dook tiap san i, in la be pombe pang yong i.” 15 Motong la tool tani in ila la iwete pang di Yuda nen, “Tool tani yo ikaratau a le tinik dook mata mulu i, in Yesu.”

16 Ngan so tina nga Yesu iyei ye lal kidi Yuda ke sungunu, ngan nen le di Yuda tina be tigarungu. 17 Bong ngan Yesu iwete pang di nen, “Tamak i, kanakana ngan ikaua urata le taukan maryoongoo. Le au i ayei urata nen lapau.” 18 Ye punu in la le di Yuda tikapye be tisere dada sa yo be tiraumate ye i. Yesoo, tiwete idada ger pono kidi ye lal ke sungunu leu tiap, bong iwete be Maro in ya taunu Tamana. Le ye betanga ki yo nen i, in iwete be ya in gaongo ben Maro lapau.

19 Yesu ilongo tina yo di Yuda tiwete nen nga, motong la iraua betanga kidi nen, “Awete pang moolmool nen, Natunu i ke be iyeie so sa ye ya taunu lono tiap, bong ole iyei so yo ikamata Tamana iyei, ngan leu. Yesoo, soo so yo Tamana iyei nga, ngan Natunu ole iyei nen lapau. 20 Ngan Tamana lono pang Natunu mai san le ole ipatnai so le imot yo iyei nga, ngan panga. Inbe Tamana ole ipatnai so maimai kapala mulu panga le illos so yo nookoot kakamata iyei koot nga. Ngan nen le ole katakrai welewele ye. 21 Le nen, Tamana in ipamadit di tooltool yo timmata koot nga le timaur mulu, inbe ikaua yepongo dook mata pang di. Ngan nanga, Natunu ole iyei nen lapau a ikaua yepongo dook mata yo taukan motingi in pang di tooltool ye ya taunu lono. 22 Inbe so san mulu in nen, Tamana in ole ikarata betanga ke tool sa tiap, bong urata tani ke karatanga betanga ke di tooltool i, in isuku la Natunu baene, 23 a be nen ngan di tooltool le imot ole tiraua pang Natunu dawa ben tina yo tiraua pang Tamana nga. Kumata le sei tool be iraua pang Natunu tiap nga, ngan iraua pang Tamana yo iwanga a isi i, in tiap lapau.”

24 “Awete pang moolmool nen, sei tool ilongo betanga kiau, inbe itara lono medana pang tool yo iwangau a asi i, in ikaua yepongo dook mata yo taukan motingi i. Inbe tool tani in o ke be tipaposi ye urata dook tiap ki yo iyei ngan sa, a be nen ngan Maro iyemenai ye, ngan tiap, yesoo iyege dada ke matenge inbe iyepe ye yepongo dook mata yo taukan motingi in oo. 25 Awete pang moolmool nen, lal yo be pombe i, in nookoot nga pombe oo. Le di tooltool yo tiyepe ben timmata koot nga, ngan ye kene yo be tilongo Maro Natunu kalngana a be titoo nga, ngan ole tikaua yepongo dook mata yo taukan motingi i. 26 Ngan Tamana in yepongo dook mata tani in ipa ye. Le gaongo leu ikaua gurana tani in pang Natunu le yepongo dook mata tani in ipa ye lapau. 27 Inbe Tamana ikaua gurana mai panga be ikarata betanga ke di tooltool ye dada le urata kidi yo tiyei nga, yesoo ya in Tool Moolmool ke Maro.

28 “Kin katakrai ye betanga yo awete nga be. Yesoo, lal yo be pombe i, in ole di tooltool le imot yo timmata a tikenen agoro lono kidi ke matenge nga, ngan tilongo kalngana, 29 ngan ole timadit a tisi tana. Lo ngan be di tooltool yo tiyei dada dook mata nga, ngan ole timadit a timaur mulu inbe tiyepe ye yepongo dook mata yo taukan motingi i. Inbe di tooltool yo tiyei dada dook tiap nga, ngan ole timadit a timaur mulu, lo ngan be tipapos di ye urata dook tiap kidi yo tiyei nga, a be nen ngan tiyemenai di ye. 30 Au i ke be ayeie so sa ye au tauk lok tiap. Au i alongo Tamak koonoo le atoo betanga ki, inbe akarata betanga ke di tooltool ye dada kidi yo tiyei nga. Ngan nen le urata kiau ke karatanga betanga tani, in ipa tarantatu dook mata, yesoo atoo au tauk lok tiap, bong atoo Tamak yo iwangau a asi i, in lono.”

31 Motong la Yesu iwete mulu nen, “Kumata be au tauk awetewete pang ye urata le dada kiau au tauk nga, ngan ole kawete be betanga kiau nga moolmool tiap. 32 Bong tool san la be ikaua nek a iwetewete, inbe ipaposau ye urata le dada kiau yo ayei nga. Le lok galanga nen, betanga ki yo be iwetewete yau nga, ngan moolmool le imot. 33 Muku ngan kawanga di tooltool a tila ye Yowan be la titor yau nga, ngan le iwete betanga moolmool pang di yau lapau. 34 Moolmool, au i asere tool ke tana i sa be iwetewete yau tiap, bong awete nen pang nga, ngan be nen a nen ngan Maro ikau ang a ipamulang ye so dook tiap yo be igarungang i. 35 Yowan in iyei ben sul loloana le ilolo a ilangarai di tooltool. Ngan le lomim ponana ye sul ki ye manga modono kasin.

36 “Bong so san mulu yo ipaposau le illos betanga ke Yowan yo iwetewete yau i, in nen. Urata yo Tamak itar la baek be ayei porai nga, ngan la ayei le ipaposau pang di tooltool be au i Tamak la iwangau a asi i. 37 Ngan Tamak yo iwangau a asi i, in ya taunu la iwetewete yau a ipaposau i. Bong ang nga kalongo touo kalngana, inbe kakamata touo matana pitiao. 38 Inbe kaparama betanga ki sa a iken lomim tiap, yesoo ang nga katara lomim medana pang tool yo iwanga a isi i, in tiap. 39 Kanakana ngan ang nga kasootoo kinkatingi betanga ke Maro yo iken ye rau ki nga, yesoo lomim tar nen, betanga tina ngan la be ikaua yepongo dook mata yo taukan motingi in pang i. Bong awete pang nen, betanga tina yo iken ye Rau ke Maro nga, ngan la iwetewete yau a ipaposau nga. 40 Bong ang nga lomim be kaman pang yau, a be nen ngan man kakaua yepongo dook mata yo taukan motingi i, in tiap.

41 “Au i asere tool ke tana i sa be iyitmaka ek, in tiap, 42 bong au i lok galanga yang oo. Ang ngan lomim pang Maro mai san tiap. 43 Au i akaua Tamak damono ngan la le apa ye ene a asi nga, bong lomim pau tiap. Bong kumata le tool atu be ipa ye ya taunu ene a iman nga, ngan ole pattu leu be lomim ponana ye a katoo betanga ki. 44 Ang ngan lomim ponana yo be di diemim tiyitmakang nga, bong lomim be kayeie dada dook mata sa pang Maro ya taleu, a be nen ngan iyitmakang ye, nga tiap. Ngan be nen nga, ngan ole katara lomim medana pau belei?

45 “Kin lomim tar be au i la be lo kakodo dama ke Tamada, inbe awetewetang a apaposang ye urata dook tiap kiang yo kayei, nga be. Bong tool yo be iwetewetang a ipaposang pang Tamada ye urata kiang yo kayei nga, in la Mose, tool tani yo katara lomim ye be ole ilonang i. 46 Kumata be katara lomim medana ye betanga ke Mose nga, ngan ole katara lomim medana ye betanga kiau lapau, yesoo betanga yo Mose iwodo nga, ngan iwetewete yau i. 47 Bong kumata be katara lomim medana ye betanga yo Mose iwodo, ngan tiap nga, ngan ole kayei belei be katara lomim medana ye betanga kiau yo awete nga?”