1 Ye kene tani in di Paresi tilongo betanga be Yesu illoso Yowan a irriu di tooltool alunu kaiye le tiyei ben di galiunu a titoo nga. 2 Bong ngan Yesu ya taunu la irriu di tooltool tina, ngan tiap, di galiunu la tirriu di nga. 3 Le nga Yesu talngan rau be di Paresi tilongo betanga ye di tooltool tina yo titoo ngan oo. Motong la imadit a iyege tana mai Yudia, inbe imulu a ila pang tana mai Galili mulu nga. 4 Ngan itoo dada yo ipa kataunu ye tana mai Samaria in a ila. 5 Le nga ipa nen a ila, ngan le la pombe ye malala mai atu kidi Samaria yo ene Saika i. Ngan malala tani in iken potai pang ye tana kasin yo muku ngan Yakop ikap pang natunu Yosep nga. 6 Inbe ran gumono yo muku ngan Yakop ikeli i, in iken ye ni in lapau. Ngan tina Yesu ipa ye dada mooloo a ila le panga rauu, le nga la iwur potai pang ye ran kelingi tani in gigini. Ngan ke ise isolokati kataunu kat le igoro ke matana sangaul be ru.

7-8 Le nga Yesu iyepe, inbe di galiunu tilo pang malala mai lono be lo tiyimi kaningi pang di. Inbe mooloo tiap be garup atu ke Samaria isi be si idok ran ki. Motong la Yesu iwete panga nen, “Atoo, nga ole kukut ran pattu se ayin ngan.”

9 Motong la garup tani in iwete panga nen, “Ai, ong i tool kidi Yuda, inbe au i garup ke Samaria. E nga yelei a kutorau be akap ran pong a kuyin nga?” (Ngan garup tani in iwete nen, yesoo di Yuda ngan tiye di Samaria tigauagaua tiap.)

10 Motong la Yesu iraua betanga ki nen, “Kumata be lom galanga ye so dook mata yo be Maro ikauu pang di tooltool ye lo ponana ki i, inbe ye tool yo itorong be kop ran panga a iyin in nga, ngan matin nga le kutoru a nen ngan ikaua ran yo be ikaua yepongo dook mata pang di tooltool i, in pong.”

11 Motong la garup tani in iwete panga nen, “Tool Mai, ran i idu lopo san, inbe ong i taukam so yo be kukut ran ye i. E nga ole kouo ran yo be ikaua yepongo dook mata pang di tooltool i, in ngai? 12 Sasa kiidi yo Yakop i, in ikele ran naii pam. Inbe ya taunu iye di natunu tiye di asara ki yo edi bulumakau le sipsip nga, ngan di le imot tiyini ran tani i lapau. Bong ong i yelei, o kulloso Yakop la kuwete be kouo ran yo be ikaua yepongo dook mata pang di tooltool i, too?”

13 Motong la Yesu iraua betanga ki nen, “Di tooltool le imot yo tiyini ran i nga, ngan ole moorook di mulu. 14 Bong kumata sei tool be iyini ran yo be akauu panga i nga, ngan o ke be moorooku mulu tiap. Bong ran tani in ole iyei ben ran punu nga, inbe rongrongbe ke lono, a nen ngan ikaua yepongo dook mata yo taukan motingi i, in panga.”

15 Motong la garup tani iyei ne, “Atoo, Tool mai, nga ole kouo ran tani in pau, a nen ngan moorookau a amulu si adoko ran i mulu be.”

16 Motong la Yesu iwete panga nen, “Kulo lo kouo nimtooroo, lo ngan be angru kasi.”

17 Bong ngan garup tani in iraua betanga ki nen, “Atoo, au i taukak niktooroo.” Motong la Yesu iyei ne, “Betanga kiong yo kuwete be ong i taukam nimtooroo, ngan moolmool. 18 Yesoo, ong in kuyooloo tamoto limi oo, inbe tamoto yo nookoot angru kayepe ni, in nimtooroo tiap. Le betanga kiong yo kuwete nga, ngan moolmool le imot.”

19 Motong la garup tani in iyei ne, “Tool mai, akamatong ngan ong i Maro koonoo atu. 20 Muku ngan di sasa kiam tisung ye kawal bi e i. Bong ang Yuda nga kawete be ni yo be tagaua a tasung ye i, in la Yerusalem leu i.”

21 Motong la Yesu iwete panga nen, “Garup, kutara lom medana ye betanga kiau. Ye lal atu yo be pombe i, in di tooltool ole se tisung pang Tamada ye kawal i mulu tiap, inbe lo tisung panga Yerusalem tiap lapau. 22 Ang Samaria nga kasung pang tool yo lomim galanga ye tiap i. Bong am Yuda nga amsung pang tool yo lomam galanga ye i. Yesoo, dada yo Maro be ipamulu di tooltool ye so dook tiap yo be igarung di i, in ipa yam Yuda. 23 Bong lal tani yo awete pong ye be pombe i, in nookoot nga pombe oo. Le di tooltool yo be tisung moolmool nga, ngan ole tisung pang Tamada ye gurana ke Maro Amunu yo be ipasongosongo di ye nga, inbe ye dada yo moolmool nga. Yesoo, Tamada in lono dook mata ye di tooltool yo tisung panga nen nga. 24 Maro i ben amunu le ke be takamata tiap, le di tooltool yo be tisung panga nga, ngan ole tisung panga ye gurana ke Maro Amunu yo be ipasongosongo di nga, inbe ye dada yo moolmool nga.”

25 Yesu iwete nen a imot, motong la garup tani in iyei ne, “Au i lok galanga ye Mesaia yo tiwete ene ye Kirisi i, in ole isi. Inbe ye kene yo be isi ye in nga, ngan ole ipagalanga lodo ye so nga le imot.”

26 Motong la Yesu iwete panga nen, “Ai, au tani naii la nookoot nga awetewete pong i.”

27 Yesu iwetewete pang garup tani in go, inbe di galiunu timulu ke malala mai a tisi. Ngan tikamata yo yaru tiwetewete nga, le titakrai. Bong di atu sa mala be itoru nen, “Nga kusere soo so?” too “Nga yelei a kuye garup i kawetewete nga?” ngan tiap.

28 Motong la garup tani in iyege bor ki ke ran in sila iken, inbe imulu a ilo pang malala lo iwete pang di tooltool nen, 29 “Ai, kaman a tadu du kakamata tool atu ni ngan. Tool ni iwete pau ye so le imot yo ayei muku nga. Ya ni o Kirisi tani, too?” 30 Motong la di tooltool tina ngan tiyege malala mai tani, inbe tidu pang ye be du tikamata.

31 Ngan ye kene tani in Yesu di galiunu tiwete panga nen, “Pannoongoo, kon so pa ngan.”

32 Bong ngan iwete pang di nen, “Au i kaningi kiau yo be akan nga, ngan ang nga lomim galanga ye tiap.”

33 Ngan iwete nen, le nga di galiunu di tapdi tiwetewete nen, “Ai, o tool sa ikap kaningi si ikap panga a ikan, too?”

34 Motong la Yesu iyei ne, “Kaningi yo kiau i, in nen, be ole atoo tool yo iwangau a asi, in lono, inbe ayei porai urata ki. 35 Ang nga kawete be taudu pai mulu la iken pang dama nga, lo ngan be takana so matana. Bong awete pang nen, matamim gaga a kakamata kumu nga, ngan dingding patunu ke kaningi nga, ngan isullungu ke be tagogo oo. 36 Ngan tool yo iyei urata ye goganga kaningi i, in nookoot nga ikap pat ye urata kootoonoo ki. Moolmool, nookoot nga ya in la igogo kaningi yo ke yepongo dook mata yo taukan motingi i. Ngan nen le tool yo ke penge kaningi iye tool yo ke goganga kaningi i, in ole yaru le ru be lodi ponana. 37 Ngan nen le betanga yo tiweta in kanono pombe moolmool nen, ‘Tool atu ole ipe so, inbe tool san ole igogo kaningi kanono.’ 38 Au i awangang be la kagogo kaningi kanono ke kumu yo kayei urata ye tiap nga. Ngan di diemim kapala la urata rau di ye kumu tina ngan, inbe ang nga be kala kumu leu la kagogo kaningi kanono tina yo pombe ye urata kootoonoo kidi nga.”

39 Di tooltool alunu ke Samaria yo tiyepe ye malala mai tani nga, ngan tilongo betanga ke garup tani, le nga titara lodi medana pang Yesu. Yesoo, garup tani in iwete nen, “Tool ni iwete pau ye so le imot yo ayei muku nga.” 40 Le nga di tooltool ke Samaria yo tidu pang ye Yesu nga, ngan titoru a timangmang ye be iye di tiyepe kasin ngan. Motong la sila iye di tiyepe ye ke ru. 41 Ngan nen le di tooltool alunu mulu la titara lodi medana pang Yesu lapau nga, yesoo di tapdi tilongo betanga ye ya taun koonoo. 42 Motong la tiwete pang garup tani in nen, “Am nga amtara lomam medana ye betanga kiong yo kuwete ngan leu tiap. Bong nookoot nga am tapmam amlongo betanga ye le lomam galanga nen: Ya in tool tani yo isi be si ipamulu di tooltool ke tana i ye so dook tiap yo be igarung di i.”

43 Yesu iye di tooltool ke Samaria tiyepe ye ke ru tina ngan a imot, motong la iyege di sila tiyepe inbe ila pang Galili. 44 (Ngan muku ngan Yesu ya taunu iwete nen, be tool atu iyei Maro koonoo nga, ngan o ke be di tooltool ke malala ki ya taunu tilongo betanga ki inbe tiraua panga tiap.) 45 Ngan ye kene tani in ipa le la pombe Galili nga, ngan le di tooltool ke Galili lodi ponana ye a tikauu. Yesoo, di ngan tilo Yerusalem ye lal maiyoko kidi Yuda ke sungunu yo tiwete ene ye Paskimoolooningi ke Maro in ngan, ngan tikamata so tina le imot yo iyei nga, ngan lapau.

46 Motong la Yesu ipa mulu a ila pombe ye malala mai Kana yo iken ye tana ke Galili i. Ngan Kana in malala tani yo muku ngan iportaka ran le iyei wain ye i. Ye kene tani in tool mai atu yo matan kala urata ke tool kuto mai ki i, in natunu tamoto yo iyepe Kapenam in matamatenge mai ikauu. 47 Ngan tool mai tani in ilongo betanga ke Yesu be iyege Yudia a iman pang Galili nga, le nga ila pang ye la itoru a imangmang ye be yaru tidu pang Kapenam, a nen ngan du ikamata natunu a ikarata le dook mata mulu. Yesoo, mooloo tiap ngo be natunu imata.

48 Ngan iwete nen, motong la Yesu iwete panga nen, “Ang tooltool nga ole kakamata mos matana matana inbe urata maimai yo ayei nga, ngan la be o katara lomim medana yau nga, too?”

49 Ngan tool mai tani in iwete panga nen, “Tool mai, kupa tarai a kuman a aru tadu, mooloo tiap natuk ni ngo be imata.”

50 Motong la Yesu iyei ne, “Kudu. Natum ni ole imata tiap.” Le nga tool mai tani in itara lono medana ye betanga ke Yesu, inbe imulu a idu. 51 Ngan ye kene yo ipa dada go ye in nga, ngan itauaraia di kapraingi ki yo tikaua bingi ke natunu tani in a tise nga. Le nga tiwete panga nen, “Ai, natum tani, in tinini dook mata mulu oo.” 52 Motong la itor di ye ke matana yo tinini dook mata mulu ye i. Ngan tiwete nen, “Rono pang rrai ye so ben ke matana atu, ngan matamatenge ikoo ye a tinini dook mata mulu.”

53 Motong la kase tani in tamana lon galanga nen, rono ye so ben ke matana atu, ngan Yesu iwete panga nen, “Natum ni ole imata tiap.” Ngan nen le tool mai tani in iye di tooltool yo tiyepe rumu ki nga, ngan di le timot titara lodi medana pang Yesu.

54 Le i mos ru ki yo iyeii ye kene yo ipa ke Yudia a imulu a ila Galili ye i.