1 Tool atu ke di Paresi yo ene Nikodimas i, in iyepe. Ya in kuto mai atu, inbe iyepe ye budanga ke di kuto maimai kidi Yuda yo ke karatanga betanga nga. 2 Ngan bong, motong la iman pang ye Yesu man iwete panga nen, “Pannoongoo, am nga lomam galanga yong nen, ong i Maro iwangong a kusi be si kuyei ben pannoongoo. Yesoo, kumata le be Maro iyepe ye tool tiap nga, ngan o ke be iyei mos yo ben ong kuyei, ngan tiap.”

3 Motong la Yesu iraua betanga ki nen, “Awete pong moolmool nen, kumata tool sa be iportaka lono le iyei ben tool paunu mulu tiap nga, ngan o ke be lo igaua ye di tooltool yo Maro be matan kala di nga, ngan tiap.”

4 Motong la Nikodimas itoru mulu nen, “Ngan yelei ye tool yo iyei kolman koot i, in ole iyei belei a be iyei tool paunu mulu nga? Tool tani in ke be imulu a ilo tinana kapono lono, lo ngan be tinana ipasuiu mulu, ngan tiap.”

5 Motong la Yesu iraua betanga ki nen, “Awete pong moolmool nen, kumata tool sa be iportaka lono le iyei ben tool paunu mulu ye ran, inbe ye Maro Amunu Silene, tiap nga, ngan o ke be lo igaua ye di tooltool yo Maro be matan kala di nga, ngan tiap. 6 Ngan so yo di tooltool ke tana tiyeii a pombe i, in so ke tana, bong so yo Maro Amunu Silene iyeii a pombe i, in so ke Maro Amunu. 7 Le kin kutakrai ye betanga yo aweta pong be kuportaka lom le kuyei ben tool paunu mulu, ngan be. 8 Awete pong nen, muru i be ipa nga, ngan ole ipa pang ye ni yo be ipa pang ye i. Ngan ole kulongo mununu, bong o ke be lom galanga ye ni yo ipa ye a iman i, too ye ni yo be ila pang ye i, in tiap. Ngan dada gaongo leu, ye urata yo Maro Amunu Silene iyeii ye di tooltool a be iportaka lodi le tiyei ben di tooltool paunu mulu nga.”

9 Ngan tina Yesu iwete nen nga, le nga Nikodimas itoru. Iyei ne, “Ai, so yo kuwetewete ye nga, ngan ole pombe belei?”

10 Motong la Yesu iraua betanga ki nen, “Ong i pannoongoo, inbe em mai ye di pannoongoo kapala yo ke di Isrel nga. E nga yelei a lom galanga ye so nga tiap nga? 11 Awete pong moolmool nen, am nga amwetewete ye soo so yo lomam galanga ye nga, inbe ampapos soo so yo amkamata nga. Bong ang nga lomim be kakap betanga kiam yo amwetewete pang ye, ngan tiap. 12 Au i awete pang ye so yo ke tana i nga, bong ngan katara lomim medana ye tiap. Ngan nanga, kumata le be awete pang ye so yo ke malala ke Maro nga, ngan ole katara lomim medana ye belei? 13 Ngan ni tool sa yo ilo koot ye malala ke Maro, ngan siap. Bong Tool Moolmool ke Maro ya taleu in la ipa ye malala ke Maro a isi i. 14 Muku ngan Mose ikarata tomonaia moto kanningana ye pat sallinene, motong la itaru lo ye kai inbe ipatakode le ikodo ye ni sorrakene, a be nen ngan di tooltool tikamata ngan timmata be. Ngan dada gaongo leu ole pombe ye Tool Moolmool ke Maro. Ya in ole titaru lo ye kai inbe tipatakode le lo ikodo, 15  a be nen ngan di tooltool le imot yo titara lodi medana panga nga, ngan ole tikaua yepongo dook mata yo taukan motingi i.

16 “Maro lono pang di tooltool ke tana i mai san, ngan la le iraia Natunu tani yo ataleu in pang di nga, a be nen ngan di sema tooltool yo titara lodi medana panga nga, ngan be tilledi be, bong tikaua yepongo dook mata yo taukan motingi i. 17 Yesoo, Maro iwanga Natunu a isi ye tana i nga, ngan be si ipapos di tooltool ye urata dook tiap kidi yo tiyei nga, a be nen ngan iyemenai di ye, ngan tiap. Bong iwanga a isi nga be si ikap di tooltool le imot a ipamulu di ye so dook tiap yo be igarung di i. 18 Ngan nen le di sema tooltool yo titara lodi medana ye nga, ngan o ke be Maro iyemenai di tiap. Bong di sema tooltool yo titara lodi medana panga tiap nga, ngan Maro ikarata betanga kidi oo, le ole iyemenai di. Yesoo, di ngan titara lodi medana ye Maro Natunu tani yo ataleu i, in tiap. 19 Ngan ye punu yo be Maro iyemenai di tooltool ye i, in nen: Maro iwanga sul a isi tana i oo, bong ngan di tooltool lodi pang sul nunngana tiap. Di ngan lodi pang dada dook tiap yo ke todo lono nga, ngan mai san, yesoo di ngan ran kidi yeingi dada yo dook tiap nga. 20 Inbe di tooltool le imot yo tiyei dada dook tiap nga, ngan tiyei koi pang sul. Di ngan titattadai be timan potai ye sul ngan ipapos dada dook tiap yo kidi ngan se mallangana nga, ngan nen le tiyepe manga mooloo ye. 21 Bong di sema tooltool yo titoo dada moolmool ke Maro nga, ngan lodi be tiyepe ye sul nunngana, a be nen ngan di tooltool tikamata, ngan lodi galanga ben titoo Maro lono ye dada kidi yo tiyei nga.”

22 Yesu iwetewete pang Nikodimas a imot, motong la iye di galiunu timadit a tila pang tana mai Yudia nga. Ngan le la tiyepe kasin nango, inbe ikaua urata ye rriungu di tooltool. 23 Ngan Yowan lapau itu ye rriungu di tooltool ye malala Ainon yo iken potai pang ye malala mai Salim i, yesoo ni tani in ran ki alunu san. Ngan la le di tooltool tila le ikenen leu pang ye ni tani a be la irriu di nga. 24 (Ngan ye kene tani in Erot itara Yowan ilo rumu dook tiap kidi talnga dikidiki lono tiao.) 25 Ngan betanga atu in iken kataunu ye Yowan di galiunu tiye tool atu kidi Yuda. Di ngan tiwetewete a tiparsu ye momo kidi Yuda yo be titoo a tirriu le tinidi igalanga dook mata ye Maro matana i. 26 Motong la Yowan di galiunu tina ngan tila pang ye la tiwete panga nen, “Pannoongoo, lom tut ye tool yo muku ngan angru kayepe ran Yodan koonoo kapala, inbe kuwetewete pang di tooltool ye i, in nookoot nga di tooltool le imot ngo la tigaua pang ye, inbe irriu di.”

27 Motong la iraua betanga kidi nen, “Dada yo nen ngan sa ke be pombe sokorai pang ye tool tiap. Bong kumata le be Maro yo iyepe ye malala ki ete ni, in ipamede tool be iyei so yo nen nga, ngan ole iyei. 28 Ngan ang tapmim nga kalongo betanga yo muku ngan awete pang inbe ayei ne, ‘Au i Mesaia, tool yo Maro ipootoo be si ikap di tooltool ki a ipamulu di ye so dook tiap yo be igarung di i, in tiap. Bong au i Maro iwangau a asi be si amuku panga.’ ”

29 Motong la Yowan ikatte betanga atu pang di nen, “Kumata le tamoto atu be iyooloo garup atu nga, ngan ole garup tani in iyei ben ya rimana. Inbe tamoto tani yo be ikere i, in tool ki atu yo ipare so pang kerenge ki i, in ole ikodo a itar talngana be ilongo ene tani yo be iman i. Le yeisa be ilongo kalngana, ngan ole lon ponana le lon ponana kaiye. Ngan dada gaongo leu, nookoot nga au i lok ponana le lok ponana kaiye nen lapau. 30 Ngan nanga, ya in ene ole ilo pang ete, inbe au ek ole idu pang lopo.

31 “Ngan tool yo ipa ye malala ke Maro a isi i, in ene mai san le illos di tooltool nga le imot. Inbe tool yo ke tana i, in ke tana le iwetewete ye so yo ke tana i nga leu. Bong tool yo ipa ye malala ke Maro a isi i, in ene mai san le iyepe ete ye di tooltool nga le imot. 32 Ya in iwetewete ye soo so yo ikamata inbe ilongo ye malala ke Maro nga. Bong ngan tool sa ikap betanga ki a iparama le imede, nga tiap. 33 Bong kumata le tool be ikap betanga ki tina a iparama le imede nga, ngan ole ipaposi ben ya in itara lono medana pang Maro be betanga ki ngan moolmool. 34 Tool tani yo Maro iwanga a isi i, in si iwetewete betanga ke Maro. Yesoo, Maro ikaua Amunu Silene panga a ipaponi ye, le manga pa be iken tiap. 35 Ngan Tamana lono pang Natunu tani in mai san, le itar so tina nga le imot lo baene. 36 Ngan nen le sei tool be itara lono medana pang Natunu nga, ngan ole ikaua yepongo dook yo taukan motingi i. Bong kumata sei tool be iwala murini pang Natunu tani, in nga, ngan o ke be ikaua yepongo dook mata yo taukan motingi i, in tiap. Bong kate malmal ke Maro ole iken ye nen a tala.”