1 Tiyepe a ke kapala iman a ila, motong la Yesu imadit a ila pang ye ran yo Galili i, in koonoo kapala. Ngan ran tani in tiwete ene san ye Taibirias. 2 Ngan di tooltool malala mai tikamata mos yo iyei ye di tooltool yo matamatenge ikap di nga, le nga di lapau timadit a titoo. 3 Motong la Yesu inau a ilo ye kawal atu madini a lo iye di galiunu tiwur. 4 Ngan ye kene tani in, lal kidi Yuda ke sungunu yo tiweta ye Paskimoolooningi ke Maro i, in potai oo.

5 Le nga Yesu be matan gaga, ngan ikamata di tooltool malala mai tina yo timan pang ye nga, motong la itoro Pilip nen, “Ai, nga ole tayimi kaningi ngai pang di tooltool nga be tapakan di ye nga?” 6 Ngan betanga ke Yesu yo itor ye i, in be nen a itoua ye, yesoo ya taunu in lon galanga ye so yo be iyeii, in oo.

7 Itoro Pilip nen, le nga Pilip iraua betanga ki. Iyei ne, “Ona, kumata be tayimi porong ye pat silba ke yimoongoo so ben 200 nga,* Ngan pat silba ke yimoongoo so tina ngan iye pat yo be tool atu ikap ye urata kootoonoo ki yo iyei ye taudu limi be tol nga. ngan o ke be di tooltool nga le imot ole di atu atu tikanen kasin kasin leu.”

8 Motong la Yesu galiunu san yo Antares i, ya in Simon Pita taini, in iwete pang Yesu nen, 9 “Tool kase atu yo iyepe ni, in porong ki ngan dukumu limi, inbe i paranga ki ru leu. Bong di tooltool nga malala mai san. Le be nen ngan ole porong le i tina nga ilonidi belei?”

10 Antares iwete panga nen, motong la Yesu iyei ne, “Kawete pang di tooltool ngan a sila tiwur.” Ngan ni tani in dingding isup ye le alunu, le di tooltool tina ngan du tiwur dingding pono. Ngan kinkatingi kidi tamoto leu ngan ben 5,000. 11 Di tooltool tina ngan du tiwur, motong la Yesu ikap porong dukumu tina a iwete lo ponana ki pang Maro ye, inbe itepalapala a iwete be timalimi di tooltool tina ngan ye. Motong la iyei nen lapau ye i ru tina a timalimi di, ngan le tikap le lo iye di tooltool tina le imot.

12 Ngan le tikan tikan le lo kapodi sung, motong la Yesu iwete pang di galiunu nen, “Kawinoko kaningi naunu naunu yo iken ngan a kagaua dook, kin le kayege kasin pa a ilene sokorai be.” 13 Motong la di galiunu tina tiwinoko porong dukumu limi yo di tooltool tina ngan tikan be tiwulai naunu naunu nga, ngan a tipadid ngan le ikan karei ponene sangaul be ru.

14 Le di tooltool tina ngan tikamata mos tani yo Yesu iyeii i, le tiyei ne, “Moolmool yege, i Maro koonoo tani yo tatar matada ye be ole isi tana, in naii.” 15 Ngan tina Yesu ilongo betanga tina yo tiwete nen nga, le nga lon galanga ye di nen, nga be tiparama a nen ngan titaru a iyei tool kuto mai yo be matan kala tana kidi le imot i. Le nga iyege di, inbe ya taleu ilo pang kawal.

16 Ye kene tani in tiyepe le du rrai, motong la Yesu di galiunu tidu pang ran koonoo. 17 Tidu, tinam ngan Yesu pombe pang ye di tarai tiap. Motong la tisuku ookoo atu a tiyiri ye, a be tisiutu ran a tila pang Kapenam yo iken ke ran koonoo kapala i, ngan bong oo. 18 Tikooi a tila, ngan eng mai imadit a kokor ki popobe le dook tiap yege. 19 Ngan di galiunu tina, ngan tipie ye ookoo tani a tila kataunu, le manga mooloo kasin.† Manga yo tipie ye ookoo a tila ye i, in mooloo kasin ben kilomita limi too limi be atu. Inbe matadi nen ngan tikamata Yesu yo ipa ran pono a ipot potai pang ye ookoo nga, le nga titattadaii. 20 Bong ngan Yesu iwete pang di nen, “Katattadai be! I au tani naii.” 21 Motong la lodi ponana ye a tikauu a ilo ookoo lono, ngan le pattu leu be ookoo ila isolo ye ni tani yo be tila pang ye i.

22 Tiyepe a bongbongini ki, motong la di tooltool malala mai tina yo tiyepe ran koonoo kapala nga, ngan lodi galanga nen, rono ngan tikamata ookoo ataleu la iken ye ni yo tiyepe ye. Inbe ookoo tani in tikamata touo Yesu pa be iye di galiunu tiyiri ye, nga tiap, bong di galiunu leu la tiyiri ye a tila nga. 23 Motong la ookoo pattu kidi Taibirias tilong le long tisolo potai pang ye ni tani yo Tool Mai iwete lo ponana ki pang Maro ye porong, motong di tooltool tikan i. 24 Ngan tina di tooltool tina ngan tikamata touo Yesu iye di galiunu pitiap nga, le nga tiyiri ye ookoo tina ngan a tila pang Kapenam be la tisere Yesu.

25 Di tooltool malala mai tina tila le la tipuske Yesu ran koonoo kapala, motong la titoru. Tiyei ne, “Pannoongoo, kuman ni nga ye soo lal?”

26 Motong la Yesu iraua betanga kidi nen, “Awete pang moolmool nen, ang nga kaman man kaserau nga, ngan ye mos yo ayeii a iyei ben tarkilanga kiau a kakamata, in tiap, bong ye porong yo apakanang ye a kakan ngan le kapomim sung welewele ye nga. 27 Ngan nen le kin urata porang ye kaungu kaningi yo be iwi palbe le dook tiap, in be, bong be nen ngan urata porang ye kaungu kaningi yo be ikaua yepongo dook mata yo taukan motingi i. Ngan kaningi tani in ole Tool Moolmool ke Maro la be ikauu pang i, yesoo Tamana Maro ipootoo be ya la ole iyei urata tani i.”

28 Yesu iwete pang di nen, motong la titoru nen, “Nga ole amyei belei a be nen ngan amyei urata ke Maro yo lono dook mata ye nga?”

29 Motong la Yesu iraua betanga kidi nen, “Urata ke Maro in nen, be katara lomim medana pang tool yo Maro iwanga a isi i.”

30 Iwete pang di nen, motong la titoru. Tiyei ne, “Ole kuyeie soo mos a nen ngan iyei ben tarkilanga kiong pam be amkamata, ngan amtara lomam medana yong i? 31 Muku ngan di sasa kiam tikana porong yo ene mana in ye ni sorrakene, ben betanga tina yo tiwodo lo ye Rau ke Maro nga. Ngan betanga tina ngan iwete nen, ‘Ya in ikap porong yo ipa ye malala ke Maro, ngan pang di tooltool be tikan.’ ✡ Pamulenge 16:4; Rau ke Woungu 78:24 ”

32 Motong la Yesu iwete pang di nen, “Mose la ikap porong yo ipa ye malala ke Maro ngan pang di tooltool be tikan, in tiap, bong Tamak la ikap pang di i. Inbe ya la ikaua porong moolmool yo ipa ye malala ke Maro, in pang i. 33 Ngan porong moolmool ke Maro i, in tool yo ipa ye malala ke Maro a isi be si ikaua yepongo dook mata yo taukan motingi i, in pang di tooltool ke tana i.”

34 Yesu iwete nen, motong la tiwete panga. Tiyei ne, “Tool mai, be nen nga, ngan kanakana ngan kouo porong tani in pam.”

35 Motong la Yesu iwete pang di nen, “Au tauk i la porong tani yo ke yepongo dook mata i. Ngan nen le sei tool be iman yau nga, ngan o ke be pitola mulu tiap. Inbe sei tool be itara lono medana pau nga, ngan o ke be moorooku mulu tiap lapau. 36 Bong dawa ben awete pang koot nga, ang nga kakamata gurana kiau oo, bong lomim be katara lomim medana pau tiap. 37 Di tooltool le imot yo Tamak ikap di pau nga, ngan ole timan pang yau. Inbe sei tool be iman pang yau nga, ngan o ke be anganga tiap lapau. 38 Yesoo, au i apa ye malala ke Maro a asi nga, ngan be si atoo au tauk lok tiap, bong be si atoo Tool yo iwangau a asi, in lono. 39 Inbe Tool yo iwangau a asi i, in lono nen, be kin ayege di tooltool yo ikap di pau nga, ngan sa le ilene be. Bong be apamadit di le imot ye lal yo itaru be ikarata betanga kidi tooltool ye i. 40 Ngan Tamak lono nen, be di tooltool le imot yo titar matadi pang Natunu a titara lodi medana panga nga, ngan ole tikaua yepongo dook mata yo taukan motingi i, inbe ole apamadit di ye lal yo itaru be ikarata betanga kidi tooltool ye i.”

41 Di Yuda tilongo tina yo Yesu iwete be ya in porong moolmool yo ipa ye malala ke Maro a isi i, le nga katedi malmal a timadit tina le tipasa mur ye. 42 Tiyei ne, “Ona tiap! Tool i Yesu, inbe ya in tamana la Yosep i, too? Idi nga lod galanga ye tamana le tinana, e nga yelei be nookoot nga iwete be ya in ipa ye malala ke Maro a isi nga?”

43 Motong la Yesu iwete pang di nen, “Ai, katemim malmal a kapasa mur yau dookoot! 44 Tool sa ke be itoo ya taunu lono a iman pang yau, ngan tiap, bong be Tamak yo iwangau a asi i, in ipamaditi lono be iman, ngan la be iman pang yau nga. Inbe tool yo nen, in ole apamaditi mulu ye lal yo Maro itaru be ikarata betanga kidi tooltool ye i. 45 Le betanga yo Maro koonoo iwode a iken ye Rau ke Maro in nen, ‘Ole Maro ipatomonai di tooltool nga le imot.’✡ Esai 54:13 Ngan nen le di sema tooltool le imot yo tilongo betanga ke Tamak a lodi galanga ye nga, ngan ole timan pang yau. 46 Ngan tool sa yo ikamata Tamak koot, ngan tiap, bong tool ataleu yo iye Maro tiyepe motong isi i, in leu la ikamata Tamak i. 47 Le awete pang moolmool nen, sei tool itara lono medana pau nga, ngan ikaua yepongo dook mata yo taukan motingi in oo. 48 Au tauk i la porong ke yepongo dook mata tani i. 49 Di sasa kiang tikana porong yo ene mana, in ye ni sorrakene nga, ngan di le imot timmata. 50 Bong porong moolmool tani in ipa ye malala ke Maro a isi, le kumata be di tooltool tikani, ngan o ke be timmata tiap. 51 Ngan au i la porong tani ke yepongo dook mata yo ipa ye malala ke Maro a isi. Le kumata sei tool be ikana porong tani in nga, ngan ole iyepe ye yepongo dook mata yo taukan motingi i. Ngan porong tani in au tauk medak yo be akauu pang di tooltool ke tana i le imot i, a be nen ngan tikaua yepongo dook mata tani.”

52 Yesu iwete nen, le nga di Yuda tina tilongo, le katedi malmal a di tapdi tiparsu inbe tiwetewete nen, “Nga ole tool i iyei belei be ikap medana a takan nga?”

53 Motong la Yesu ikatte betanga pang di nen, “Awete pang moolmool nen, kumata le be kakana Tool Moolmool ke Maro medana tiap, inbe kayini rara ki tiap lapau nga, ngan o ke be kakaua yepongo sa yo dook mata, ngan tiap. 54 Bong kumata sei tool be ikana medak, inbe iyin rara kiau nga, ngan ole ikaua yepongo dook mata yo taukan motingi i. Inbe ye lal yo Maro itaru be ikarata betanga kidi tooltool ye in nga, ngan ole apamaditi mulu ye ni ke matenge. 55 Yesoo, au i medak in kaningi moolmool, inbe rara kiau in la ran moolmool ke yinungu i. 56 Ngan nen le tool yo ikana medak be iyini rara kiau i, in ole iyepe yau, inbe au i ayepe ye. 57 Tamak yo yepongo dook mata ipa ye i, in ya la iwangau a asi i. Ngan ya in ikaua yepongo dook mata tani in pau. Ngan nen le ye dada gaongo leu ben yo ikaua yepongo dook mata pau nga, ngan la au i ole akaua yepongo dook mata pang di tooltool yo tikana medak nga. 58 Le porong moolmool tani yo ipa ye malala ke Maro a isi, in naii. Ngan porong i dawa ben yo muku ngan di sasa kiang tikani, motong timmata, in tiap. Bong sei tool be ikana porong moolmool i nga, ngan ole ikaua yepongo dook mata yo taukan motingi i.” 59 Ngan Yesu iwete betanga yo nga malala mai Kapenam, ye kene yo lo ipatomonai di tooltool ye rumu kidi Yuda ke gaongo in lono ye i.

60 Ye kene tani in Yesu di galiunu alunu la tilongo betanga ki tina yo iwetewete nga, le nga tiyei ne, “Atoo, betanga yo ipatomonai idi ye nga, ngan imoo san. Nga ole sei tool be ikap i?”

61 Bong ngan Yesu lon galanga ye di yo tipasa mur ye betanga ki tina, ngan oo. Le nga iwete pang di nen, “Nga yelei, betanga yo awete nga igarung lomim, too? 62 Ngan le be kakamata Tool Moolmool ke Maro be imulu a ilo pang ete ye ni yo muku ngan iyepe ye in nga, ngan ole kawete belei? 63 Maro Amunu la be ikaua yepongo dook mata yo taukan motingi in pang di tooltool i. Bong di tooltool ke tana ngan taukadi gurana yo be tiyei nen ye i. Ngan nanga, betanga yo awete pang ngan ipa ye Maro Amunu, le betanga tina ngan la be ikaua yepongo dook mata yo taukan motingi in pang i. 64 Bong ang kapala nga katara lomim medana pau tiap.” Yesu iwete nen, yesoo ye kene yo imadit ye urata ki ye in nga, ngan lon galanga ye di tooltool yo be titara lodi medana panga tiap nga, inbe lon galanga ye tool yo be pang dama ni ngan ole itaru la di koi ki baedi, in lapau. 65 Motong la Yesu iwete mulu nen, “Ye punu in la le awete pang be tool sa ke be itoo ya taunu lono a iman pang yau, ngan tiap, bong be Tamak ipamede be iman, ngan la be iman pang yau nga.”

66 Ye kene tani in tilongo tina yo Yesu iwete nen nga, le nga di galiunu alunu la tiyege a timulumulu pang ni kidi le titoo mulu tiap nga.

67 Motong la Yesu itor di galiunu tina yo sangaul be ru ngan nen, “Nga yelei, ang nga lomim be kayegau a kala lapau, too?”

68 Motong la Simon Pita iraua betanga ki nen, “Tool Mai, sei tool be amla ye i? Ong i, betanga kiong nga ke be ikaua yepongo dook mata yo taukan motingi i, in pang di tooltool. 69 Le am nga lomam galanga yong, inbe amtara lomam medana nen, be ong i la Tool Tani Yo Maro Ipootoo Panga Ya Taunu I.”

70 Pita iwete nen, motong la Yesu iraua betanga ki nen, “Ang di galiuk yo sangaul be ru nga, ngan au tauk la apootang i. Bong emim atu in tool kuto mai kidi so sadi iyepe ye!” 71 (Ngan Yesu iwete nen nga ye Yuta yo Simon Iskariot natunu i. Ya in Yesu di galiunu tina yo sangaul be ru nga, ngan atu kidi, bong pang dama ni ngan ole itara Yesu la di koi ki baedi i.)