7
1 Yafos ko girdi’ e bod feni almarin e maruwel ko salthaw,
ni ba maruwel nib gel nib math’kanil’,
2 bod rogon ba sib ni be yim’ ni bochan e garbeb ko taglul’;
fa be’ ni be son ni ngan pi puluwon ko maruwel.
3 Yug be cheal e pul u dakenag ma dakuriy fag ni gu be par ni gub fos;
gubin e nep’ ma be gafgow lanin’ug.
4 Nap’an ni gu ra thig nga but’ ni nggu mol, ma wun’ug e ke n’uw e nep’;
polo’ e nep’ ndagur ayal ni gu be yim’ ni bochan ni mang e yigi rran.
5 Bayngeg e ke sugnag e fakl’ud;
ya ke mada e malad riy;
ni be ser e lla’ riy nga but’.
6 Be yan e rran ma dakuriy ban’en ni be lagan’ug ngay,
be yan nib machreg nga ba rosom ko wupmad.
7 A Got, dab mu pag talin ni yafos rog e kemus ni ta’ab buchud i nifeng;
ma felfelan’ rog e ke taw nga tungun.
8 Ga be guyeg e chiney, ma dab kum guyeg bayay.
Bay mu gayeg ma kug thumur.
9-10 Bod bangi manileng ni yan nge m’ay nga bang,
be’ nra yim’ e dabki sul;
ma pi’in yad manang ochen e go’ yad ra pag talin.
11 Danga’! Dabi yag ni gu th’ab gulungag!
Kug damumuw ma ke buchbuchan’ug.
Thingar gu non.
12 Mangfan ni ga be tay e matnag rog?
Ga be leamnag ni gub mit e kan nu maday?* KAN NU MADAY: Bay ko yat ni kakrom ni bogi kan nu maday e yima matangiyrad ya yad ra thay miyad gathay ban’en.
13 Gu mol nga but’ ni gu be guy rogon ni nggu toffan;
Gu be gay rogon ni nggu puf gow e amith.
14 Ma gur e ga be k’aring e tamdag ngog u malk’ay;
ga be k’aring e marus ngog ko pin’en ni ga be pilyeg e changar rog gu be guy
15 nge mada’ ko ngiyal’ ni kabfel’ ngan uchuliyeg ngum’
ko bin ni ngu’ug par u lan e re dogur ney ni kari mogothgoth.
16 Ke mulan’ug; ke chuwan’ug ko yafos rog.
Mu chuw rog nggu par ni yigo’ gag. Ya yafos rog e kem’ay fan.
17 Mang nrib ga’fan u wun’um e girdi’?
Mang ni ga ma yip’ owchem ko pin’en ni yad ma rin’? Psa 8:4; 144:3
18 Ga ma fal’eg i yaliyrad ni gubin e kadbul
ma ga sikeng nagrad ni gubin ngiyal’.
19 Mang ni dab mu fek owchem rog boch ngiyal’
nge yag ni gu ful’ nguwcheg?
20 Mang ni karmup owchem ngog, be magawon nigem e denen rog?
Mangfan ni ku gu mang tagil’ e falmun rom?
Ar fani karug mang ba tomal ngom?
21 Dakriy bi’id ni ga ra n’ag fan e denen rog?
Dab ku mu na’g u wun’um e kireb rog?
Dabki n’uw nap’an mu gu wan nga low rog,
ma bay um sap nigeg ma ku gu thumur.
*7:12 KAN NU MADAY: Bay ko yat ni kakrom ni bogi kan nu maday e yima matangiyrad ya yad ra thay miyad gathay ban’en.
DRAFT VERSION — Proofreading in progress