144
Ba pilung ni pining e magaer ngak Got ko gel ni tay
1 Ke sorok SOMOL, ya ir e yoror rog!
Ke fil ngog rogon e mael
ma ke falfal’eg rogog ni ngu’un ko mael.
2 Ir e ma yororiyeg mma rungrung rog,
manaf rog nge ta’ayuw rog,
ir e ma pagan’ug ngak ni dabi buch ban’en rog.
Ma tay e pi nam nga tan pa’ag nggu gagiyeg nagrad.
3 SOMOL, girdi’ e mang ni ga ma leam nagrad?
Kemus ni gamad bogi girdi’, ma ga ma leam nagmad?
4 Girdi’ e bod bbuchuth i nifeng;
ni pi rran u pulwomad e bod bangi taglul’ ni be yan.
5 A SOMOL, mu sey e tharmiy nga mub nga but’;
mmath ko pi burey nge yib e ath riy.
6 Mu mateg e uluch nge wereg e to’ogor rom;
mu pag e pi gan e gat’ing rom ngar milgad.
7 Mu ganam u tharmiy nga but’,
ngam girngiyeg nggu chuw u fithik e ran nib to’ar, ni dabi buch ban’en rog;
mu ayuwegneg u gelngin e pi girdi’ nu boch e nam,
8 ndariy bingyal’ ni yad ma yog e tin rriyul’
ma yad ma micheg bogi ban’en ni go’ ban.
9 A Got, bay gon’ reb e tang nib be’ech ngom;
bay gu chubeg e harp mu gu tang nigem.
10 Ga ma gagiyegnag nge gel e pi pilung
ma ga ma chuweg David ni tapigpig rom u pa’ e riya’.
11 Mu ayuwegneg u pa’ e pi to’ogor nma’ngach;
mu lageg u pa’ e girdi’ nu boch e nam,
ndariy bingyal’ ni yad ma yog e tin riyul’,
ma yad ma micheg bogi ban’en ni go’ ban.
12 Mang e yigi par e pi pagel ni pifakdad
ni bod yuke gek’iy nma ilal nib gel.
Mang e yigi par e rugod ni pifakdad ni bod yuley i rumog
ni bfel’ ya’an ko pi tabthung u tafen e pilung.
13 Mang e yigi sug e pi naun ni tafen e cha’ar rodad
ko gubin mit e wom’ngin e woldug.
Mang e yigi yib pifak e pi saf u lan e pi flang rodad
ni yu ragag e biyu’.
14 Mang e yigi diyen e pi garbaw rodad nib yo’or pifak
ni dabi maraggil ara yim’ reb.
Mang e yigi par ndariy e meyor ni fan ko gafgow u lan e yu pa’ i kanawo’ rodad.
15 Nge falan’ e re nam nib mich u wan’rad e ran’ey;
nge falan’ e pi girdi’ ni Got rorad e SOMOL.
DRAFT VERSION — Proofreading in progress