1 Ma Jakob gêŋô Laban latui sêsôm-sêsôm gêdêŋ tauŋ gebe “Jakob kêjaŋgo tameŋinê gêŋ samob su. Aŋga tameŋinê gêŋ eŋ kêtap waba taêsam sa e kêtu ŋac tolêlôm.” 2 Ma Jakob kêsaê Laban laŋôanô e gêlic kêtôm gêmuŋgeŋ kêtiam atom. 3 Tec Apômtau kêsôm gêdêŋ Jakob gebe” Ômu tamami to nêm tawaŋ nêŋ gamêŋ ôna ma aê oc jawiŋ aôm.” 4 Ma Jakob kêsakiŋ biŋ gêja ma gêmôêc Rahel agêc Lea sêmêŋ kôm, taŋ nê bôc sêmoa naŋ, 5 ma kêsôm gêdêŋ êsêagêc gebe “Aê galic tamemi laŋôanô amboac teŋ, eŋ gêlic aê ŋajam amboac gêmuŋŋa kêtiam atom. Mago tamocnê Anôtô gêmoa gêwiŋ aê. 6 Amagêc ajala gebe gajam sakiŋ tamemi toŋoc ŋaclai samucgeŋ. 7 Mago tamemi kêsau aê ma gêjam ŋoc ŋaôli ôkwi kêtu dim 10. Mago Anôtô kêkô eŋ auc gebe êŋgôm aê sec atom. 8 Gêdêŋ taŋ eŋ kêsôm gebe ‘Bôc toôliŋ komokom têtu nêm ŋaôli’ naŋ, bôc samob sêsu ŋalatu toôliŋ komokom. Ma gêdêŋ taŋ eŋ kêsôm gebe ‘Bôc toôliŋ tictêla-tictêla têtu nêm ŋaôli’ naŋ, bôc samob sêsu ŋalatu toôliŋ tictêla-tictêlageŋ. 9 Amboac tonaŋ Anôtô kêkôc bôc su aŋga tameminê ma kêkêŋ gêdêŋ aê.

10 “Gêdêŋ têm taŋ bôc sêgêli tauŋŋa naŋ, aê gaôc matocanô sa ma gaêc mê teŋ ma galic noniŋ kapoac, taŋ sêgêli noniŋ têna naŋ, ôliŋ komokom to tictêla-tictêla ma talô-talô. 11 Go Anôtônê aŋela awa gêjac aê gêdêŋ taŋ gaêc mê gaêc naŋ, gebe ‘Jakob.’ Ma aê kasôm gebe ‘Aê tec gamoa.’ 12 Ma eŋ kêsôm gebe ‘Ôc matamanô sa ma ôlic. Noniŋ kapoac samob, taŋ sêgêli noniŋ têna naŋ, ôliŋ komokom to tictêla-tictêla ma talô-talô gebe aê galic gêŋ samob, taŋ Laban gêgôm gêdêŋ aôm naŋ. 13 Aê Anôtô, tec gaoc tauc lasê gêdêŋ aôm aŋga Betel naŋ, gêdêŋ taŋ aôm goeŋ oso poc ma gôjac mata biŋ gêdêŋ aê naŋ. Galoc ôndi ôwi gamêŋ tonec siŋ ma ômu ôna gamêŋ, taŋ tênam kêkôc aômŋa naŋ.’ ”

14 Ma Rahel agêc Lea sêjô eŋ awa gebe” Aêagêc awê kaiŋ gêŋ ŋagêdô to gêŋlênsêm ŋagêdô gêc tamemainê andu me. 15 Eŋ gêlic aêagêc amboac lauo jaba. Eŋ kêtulu aêagêc ma kêjaiŋ awa, taŋ gêjô aêagêc naŋ, su. 16 Waba samob, taŋ Anôtô kêkôc su aŋga tamemainê naŋ, kêtu aêagêc to ma gôlôac ma gêŋ. Kêtu tonaŋŋa ôŋgôm biŋ samob, taŋ Anôtô kêsôm gêdêŋ aôm naŋ, ŋanô êsamaŋ.”

17 Tec Jakob gêdi ma kêkêŋ latui to nê lauo sêŋgôŋ kamele ŋaô. 18 Ma eŋ gêwê nê bôc to gêŋ mateŋ jali samob, taŋ kêtap sa naŋ, bôc samob, taŋ têtu ênê gêŋ gêdêŋ eŋ gêmoa Mesopotamia naŋ, gebe êndêŋ tama Isak êna gamêŋ Kanaan.

19 Laban gêja gebe êkapiŋ domba ŋaôlilu. Ma Rahel gêjam geŋgeŋ tamanê anôtô gwam. 20 Ma Jakob gêwê ŋac Aramŋa Laban auc gebe kêkêŋ tau êc êna nec ŋawae teŋ gêdêŋ eŋ atom. 21 Eŋ gêc tonê waba samobgeŋ gêja, go gêdi jagelom bu Euprat ma kêsêlêŋ laŋô gêlac gamêŋ lôcŋa Gilead.

22 Bêc têlêac gêjaŋa, go sêsôm gêdêŋ Laban gebe Jakob gêc gêja. 23 Tec eŋ kejoŋ nê tawaŋ sêwiŋ eŋ ma kêjanda Jakob bêc 7 e gê eŋ tôŋ aŋga gamêŋ lôcŋa Gilead. 24 Mago gêdêŋ gêbêc Anôtô jagêsuŋ mê gêdêŋ ŋac Aramŋa Laban ma kêsôm gêdêŋ eŋ gebe “Ôlic taôm, ôsôm biŋ ŋajam me sec êndêŋ Jakob atom.”

25 Ma Laban kêka lêlêc Jakob. Jakob gê nê becobo kêkô lôc ma Laban to nê tawaŋ jasêlêwaŋ tauŋ sêmoa gamêŋ lôcŋa Gilead. 26 Ma Laban kêsôm gêdêŋ Jakob gebe “Aôm gôgôm asageŋ, tec gôwê aê auc ma kôjaŋgo latucoagêc su amboac siŋwaga sêjaŋgo ŋacjo, taŋ sêku êsêac tulu naŋ su. 27 Kêtu asageŋŋa aôm gôwê aê auc ma gôêc kelecgeŋ gômôêŋ. Aê gabe jamboŋ aôm ŋa wê to oŋ ma dauc, mago aôm kôsôm biŋ teŋ gêdêŋ aê atom. 28 Ma kêtu asageŋŋa aôm godec gebe jalêsôp latucoagêc to dêbuci aliŋanô atom. Aôm gôgôm gêŋ meloc. 29 Aê katôm gebe jaŋgôm aôm sec. Mago tamamnê Anôtô kêsôm biŋ gêdêŋ aê gêdêŋ gêbêc tonaŋ gebe ‘Ôlic taôm, ôsôm biŋ ŋajam me sec teŋ êndêŋ Jakob atom.’ 30 Ma galoc aôm gôêc gômôêŋ gebe gôjam awam su tamamnê anduŋa. Mago kêtu asageŋŋa aôm gôjam geŋgeŋ aêŋoc anôtôi gwam.” 31 Jakob gêjô Laban awa gebe “Aê katêc tauc gaboc aôm ôjaŋgo latômio su aŋga aêŋoc. 32 Aôm embe ôtap nêm anôtôi gwam sa aŋga ŋac teŋ nê, naŋ oc êmoa mata jali atom. Aêacnêŋ tawaŋ sêmoa, tec ômbêlêm ŋoc waba e ôtap nêm gêŋ sa ma ôkôc êsêac sêlic.” Jakob gêŋô Rahel gêjam geŋgeŋ gêŋ tau ŋawae atom.

33 Amboac tonaŋ Laban kêsô Jakobnê bec gêja ma kêsô Leanê bec ma kêsô sakiŋwagao luagêc nêŋ bec amboac tonaŋgeŋ, mago kêtap gêŋ tau sa atom. Go kêsa aŋga Leanê bec jakêsô Rahelnê. 34 Ma Rahel kêkôc anôtôi gwam tau jakêsiŋ ôkwi gêc kamelenêŋ waba lau sêŋgôŋ ŋaôŋa ŋalêlôm ma eŋ tau gêŋgôŋ ŋaô. Ma Laban kêbêlêm bec ŋagêŋlêlôm samob ma kêtap gêŋ tau sa atom. 35 Ma Rahel kêsôm gêdêŋ tama gebe “O ŋoc ŋatau, aê gadi sa kakô aôm laŋômnêm jakatôm atom, tec têmtac ŋandaŋ êndêŋ aê atom, gebe kakôc ajôŋ.” Tec gesom-gesom, mago kêtap anôtôi gwam tau sa atom.

36 Go Jakob têtac ŋandaŋ kêsa ma kêsôm Laban. Ma Jakob kêsôm gêdêŋ Laban gebe “Aê gagôm sec amboac ondoc. Aê gagôm keso ondoc tec kôjanda aê gômôêŋ nec. 37 Aôm kôbêlêm ŋoc waba samob. Aôm kôtap nêm waba ondoc sa. Otoc gêŋ tau ênêc awêgeŋ êndêŋ aêŋoc tawaŋ to aômnêm tawaŋ laŋôŋnêm gebe sêlic ma sêmêtôc aêagêcnêŋ biŋ. 38 Aê gamoa gawiŋ aôm jala 20. Nêm domba têna to noniŋ têna sêjam ŋalatu su atom ma aê gaeŋ domba kapoac teŋ aŋga nêm domba ŋatoŋ atom. 39 Gêŋ, taŋ kêam sec sêkac gêŋgic naŋ, aê kakêŋ gêdêŋ aôm gebe ôlic naŋ atom, aê tauc gajô aŋga aêŋoc. Aôm kôkac aê gebe jajô gêŋ samob, taŋ sêjam geŋgeŋ gêdêŋ ocsalô ma ônê, taŋ sêjam geŋgeŋ gêdêŋ gêbêc naŋ amboac tonaŋgeŋ. 40 Aê gamoa amboac tonaŋ. Gêdêŋ ocsalô oc kêpac aê êndu ma gêdêŋ gêbêc malo gêjam aê. Ma bêc gedec matocanô. 41 Jala 20 aê gamoa gawiŋ aôm aŋga nêm andu. Aê gajam sakiŋ aôm jala 14 gêjô latômoagêc. Ma jala 6 gêjô nêm bôc. Mago aôm gôjam ŋoc ŋaôli ôkwi kêtu dim 10. 42 Tamocnê Anôtô, Abrahamnê Anôtô ma Isaknê kêtêc tau ŋamôkê embe êmoa êwiŋ aê atom, go aôm ôsakiŋ aê tolemoc sawageŋ jana. Anôtô gêlic ŋoc gêŋwapac to lemoc ŋakôm ma kêmêtôc nêm biŋ gêdêŋ gêbêc tonec.”

43 Go Laban gêjô eŋ awa ma kêsôm gêdêŋ Jakob gebe “Lauo tonec aêŋoc latucio, gôlôac tau aêŋoc gôlôac, bôc ŋatoŋ aêŋoc bôc ŋatoŋ ma gêŋ samob, taŋ aôm gôlic naŋ, aêŋoc gêŋgoc. Mago ocsalô tonec aê jaŋgôm asageŋ êndêŋ latucio me êndêŋ nêŋ gôlôac, taŋ êsêac sêkôc naŋ. 44 Ajôc, aêagêc tamoatiŋ poac teŋ. Poac tau êtu ŋabelo êwa aêagêc saŋa teŋ.” 45 Tec Jakob kêkôc poc teŋ jagêjac sa kêkô kêtu ŋabelo. 46 Ma Jakob kêsôm gêdêŋ nê tawaŋ gebe “Ajoŋ poc sa.” Ma êsêac sêkôc poc ma sêboa sa kêtu toŋ teŋ. Ma êsêac seŋ gêŋ sêŋgôŋ poc tau ŋaô. 47 Laban kêsam toŋ tau gebe Jegar-Sahaduta, mago Jakob kêsam gêŋ tau gebe Galed. 48 Laban kêsôm gebe “Toŋ tonaŋ kêtu ŋabelo êwa aêagêc saŋa êkô ŋasawa.” Kêtu tonaŋŋa eŋ kêsam gêŋ tau gebe Galed, 49 ma alê poc gebe Mispa gebe eŋ kêsôm gebe “Aêagêc embe tamoa jaêc tauŋ, go Apômtau ejop aêagêc. 50 Aôm embe ôtu kasec aê latucio me ônam lauo ŋagêdô mêŋsêwiŋ latucio, naŋ ôlic katômaŋ gebe ŋamalac teŋ tec mêŋgêwiŋ aêagêc atom nec, mago Anôtô oc êjala gebe gejob aêagêc.”

51 Go Laban kêsôm gêdêŋ Jakob gebe “Ôlic toŋ to alê poc tonec, taŋ aê gajac sa kêkô aêagêc ŋasawa naŋ. 52 Toŋ tau to alê poc tonec êtu ŋabelo gebe aê jaŋgêli toŋ tonec wacjalom nêm gamêŋ atom, ma aôm ôŋgêli toŋ to alê poc tonec mêŋolom aêŋoc gamêŋ êtu ôŋgôm aê secŋa atom. 53 Abrahamnê Anôtô to Nahornê Anôtô ma agêc tameŋinê Anôtô êtu ŋac-mêtôcwaga êkô aêagêc ŋasawa.” Ma Jakob kêtôc lêma gêdêŋ tama Isak nê kêtêc tau ŋamôkê. 54 Ma Jakob kêkêŋ da teŋ aŋga lôc tonaŋ ma kêkalem nê tawaŋ gebe sêniŋ polom. Ma êsêac seŋ polom ma sêmoa lôc tau gêdêŋ gêbêc samuc tonaŋ.

55 Gêdêŋ bêbêc kanucgeŋ Laban gêdi ma kêlêsôp dêbui to latuio aliŋanô to gêjam mec êsêac. Go gêwi êsêac siŋ ma gêmu gêja nê gamêŋ. * Jegar-Sahaduta ŋam gebe Toŋ taŋ kêtu ŋabelo. † Galed tonec Ebolai aweŋ ŋam gebe Toŋ taŋ kêtu ŋabelo.