1 Rahel kêsaê gebe eŋ oc êkôc ŋapalê êjô Jakob atom, tec gêjam lêmuŋ têwao ma kêsôm gêdêŋ Jakob gebe “Ôka ŋoc gôlôac lasê. Embe masi, oc jamac êndu.” 2 Jakob têtac ŋandaŋ kêsa gêdêŋ Rahel ma kêsôm gêdêŋ eŋ gebe “Aê gajô Anôtô su me. Eŋ kêgamiŋ têmtaclêlôm ŋaŋanô gêdêŋ aôm.” 3 Go eŋ kêsôm gebe “Ŋoc sakiŋwagao Bilha tonec. Ômoa ôwiŋ eŋ gebe êkôc ŋapalê êŋgôŋ aê labucm gebe jatap latuc teŋ sa aŋga ênê.” 4 Tec kêkêŋ nê sakiŋwagao Bilha gêdêŋ Jakob kêtu ênê awê ma Jakob gêmoa gêwiŋ eŋ. 5 Ma Bilha taê e kêkôc ŋapalê ŋac gêjô Jakob. 6 Go Rahel kêsôm gebe “Anôtô kêmêtôc aê ma kêkêŋ taŋa aê aoc, tec kêkêŋ latuc gêdêŋ aê.” Kêtu tonaŋŋa eŋ gê ênê ŋaê gebe Dan. 7 Ma Rahelnê sakiŋwagao Bilha taê kêtiam ma kêkôc latu kêtu luagêcŋa gêjô Jakob. 8 Ma Rahel kêsôm gebe “Aêagêc teoco amônaŋ tauŋ ŋajaŋageŋ e kaku eŋ tulu.” Tec gê ŋapalênê ŋaê gebe Naptali.

9 Lea kêsaê gebe oc êkôc gôlôac êtiam atom, tec kêkôc nê sakiŋwagao Silpa ma kêkêŋ eŋ gêdêŋ Jakob kêtu ênê awê. 10 Ma Leanê sakiŋwagao Silpa kêkôc latu teŋ gêjô Jakob. 11 Ma Lea kêsôm gebe “Aê katap ŋoc ŋajam sa.” Ma gê ênê ŋaê gebe Gad. 12 Go Leanê sakiŋwagao Silpa kêkôc latu kêtu luagêcŋa gêjô Jakob. 13 Ma Lea kêsôm gebe “Aê gamoa totêtac wapigeŋ. Biŋŋanô, lauo sêlambiŋ aê.” Tec gê ênê ŋaê gebe Aser.

14 Gêdêŋ têm sejoŋ kôm ŋanô saŋa naŋ, Ruben gêja kôm ma kêtap kaŋanô ŋagêdô sa, taŋ lauo kapoac sêkôc êtu sêkêkam ŋapalêŋa. Eŋ kêkêŋ gêdêŋ têna Lea. Ma Rahel kêsôm gêdêŋ Lea gebe “Ôkêŋ latômnê kaŋanô êndêŋ aêmaŋ.” 15 Ma Lea kêsôm gebe “Amboac ondoc, aôm kôjaŋgo ŋoc akweŋ su, nec gôlic amboac gêŋ ŋaôma me. Ma galoc gobe ôkôc latucnê ka ŋanô su amboac tonaŋgeŋ me.” Ma Rahel kêsôm gebe “Amboac tonaŋ êmbêc tonec êmoa êwiŋ aôm êjô latômnê ka ŋanô.” 16 Gêdêŋ kêtula Jakob gêmu gêmêŋ aŋga kôm ma Lea kêpuc eŋ tôŋtôŋ ma kêsôm gebe “Ôndêŋ aê ômôêŋmaŋ gebe aê gajam ôli aôm ŋa latucnê ka ŋanô.” Tec gêmoa gêwiŋ eŋ gêdêŋ gêbêc tonaŋ. 17 Ma Anôtô kêkêŋ taŋa Lea e taê ma kêkôc latu kêtu lemeŋ teŋŋa gêjô Jakob. 18 Ma Lea kêsôm gebe “Anôtô kêkêŋ latuc teŋ gêdêŋ aê gêjô aê kakêŋ ŋoc sakiŋwagao gêdêŋ ŋoc akweŋ.” Ma gê ênê ŋaê gebe Isakar. 19 Go Lea taê kêtiam ma kêkôc latu kêtu 6ŋa gêjô Jakob. 20 Ma Lea kêsôm gebe “Anôtô kêkêŋ gêŋ ŋajam gêdêŋ aê. Galoc ŋoc akweŋ etoc aê sa gebe aê kakôc latuci 6 gêjô eŋ.” Ma eŋ gê ênê ŋaê gebe Sebulon. 21 Tonaŋ su, go eŋ kêkôc latuo teŋ ma gê ênê ŋaê gebe Dina.

22 Go Anôtô taê gêjam Rahel ma kêkêŋ taŋa eŋ ma gêlôc sa gebe êkôc ŋapalê. 23 Eŋ taê ma kêkôc ŋapalê ma kêsôm gebe “Anôtô geseŋ ŋoc biŋ majocŋa su,” 24 ma gê ênê ŋaê gebe Josep ma kêsôm gebe “Apômtau êkêŋ latuc teŋ mêŋêwiŋ.”

25 Rahel kêkôc Josep su, go Jakob kêsôm gêdêŋ Laban gebe “Ôsakiŋ aê jamu jana ŋoc malac to ŋoc gamêŋ. 26 Ôkêŋ ŋoc lauo to ŋoc gôlôac êndêŋ aê gebe aê gajam sakiŋ aôm kêtu êsêacŋa. Ôlôc, go jaêc jana. Aôm kôjala sakiŋ, taŋ gajam gêdêŋ aôm naŋgac.” 27 Ma Laban kêsôm gêdêŋ eŋ gebe “Ôlic aê ŋajammaŋ. Aê kapuc kapoac ma katap sa gebe Apômtau gêjam mec aê kêtu aômŋa. 28 Ôsam nêm ŋaôli ma aê gabe jakêŋ êndêŋ aôm.” 29 Ma Jakob kêsôm gêdêŋ eŋ gebe “Taôm kôjala sakiŋ, taŋ gajam naŋ, ma gôlic nêm bulimakao to bôc ŋagêdô sêmoa ŋalêŋ gêdêŋ aê gajob êsêacŋa, 30 gebe luagêcgeŋ sêmoa gêdêŋ aê gamêŋ atomgeŋ ma galoc têtu taêsam, ma Apômtau gêjam mec aôm gêdêŋ ŋasawa, taŋ aê gamoa gawiŋ aôm naŋ. Mago galoc amboac ondoc. Aê janam kôm janam tauc ŋoc gôlôac sa êndêŋ ondocgeŋ.” 31 Ma Laban kêsôm gebe “Amboac tonaŋ aê jakêŋ asageŋ êndêŋ aôm.” Ma Jakob gêjô eŋ awa gebe “Ôkêŋ gêŋ teŋ êndêŋ aê atom. Aôm embe ôlôc êndêŋ ŋoc biŋ tonec, go aê jatu gejobwaga ma jajop nêm bôc êtiam. 32 Galoc aê janac nêm bôc pebeŋ kêsi ma jajaliŋ bôc ôliŋ komokom to tictêla-tictêla samob sa ma domba jejec to noniŋ komokom to tictêla-tictêla amboac tonaŋgeŋ ma gêŋ tonaŋ têtu ŋoc ŋaôli. 33 Êtu ŋamu biŋ tonec êwaka aê sa gebe aê ŋac gêdêŋ gebe Aôm embe ômôêŋ gebe ônac ŋoc ŋaôli kêsi ma ôlic noniŋ, taŋ ôliŋ komokom to tictêla-tictêla atom to domba, taŋ jejec atom naŋ ŋateŋ, go ôlic aê amboac ŋac geŋgeŋ.” 34 Laban kêsôm gebe “Ŋajam, amboac tonaŋ nêm biŋ êtu tôŋ.” 35 Mago gêdêŋ bêc tecenaŋ Laban kêkôc noniŋ kapoac talô-talô to tictêla-tictêla ma noniŋ têna ôliŋ komokom to tictêla-tictêla samob su, samob, taŋ ôliŋ sêpsêp ŋagec gêc naŋ, to domba jejec samob amboac tonaŋ ma kêkêŋ gêdêŋ latui sejop. 36 Ma gêc gêja e intêna ŋasawa kêtôm bêc têlêac geŋ êsêagêc Jakob kêsi ma Jakob gejob Labannê bôc ŋagêdôgeŋ.

37 Go Jakob kêkôc kalatu aŋga kaleloŋ to otic ma kaopo ma gebeŋ ŋaôlic ŋatalô tictêla-tictêla. 38 Eŋ kêkôc kalatu, taŋ kêmasaŋ su naŋ, jaketoc kêkô busawa, kêkô suc, taŋ bôc sêmêŋ sênôm bu kêsêpŋa naŋ, kêkô bôc laŋôŋnêmŋa solop. Go gêdêŋ noc sênôm buŋa bôc sêgêli tauŋ sêmoa. 39 Bôc sêgêli tauŋ sêmoa sêkanôŋ gamêŋ, taŋ kalatu sêkô naŋ, tec sêsu ŋalatu ôliŋ talô-talô to komokom ma tictêla-tictêla. 40 Domba tonaŋ sêmoa tauŋŋa ma Jakob kêkêŋ bôc ŋagêdô laŋôŋ gêdêŋ bôc ôliŋ komokom to tictêla-tictêla, taŋ sêmoa Labannê bôc ŋatoŋ ŋalêlôm naŋ. Ma eŋ kêjaliŋ tau nê bôc ŋatoŋ ŋagêdô sa ma kêkêŋ nê gêŋ sêwiŋ Labannê atom. 41 Embe bôc toôliŋwalô sêŋgêli tauŋ, go Jakob naetoc kalatu ênêc bôc laŋôŋnêmŋa êsêp suc ŋalêlôm gebe sêlic kalatu ma sêŋgêli tauŋ. 42 Mago embe bôc toôliŋ secsec, go naetoc kalatu êkô atom. Kêtu tonaŋŋa bôc toôliŋ secsec têtu Labannê ma bôc toôliŋwalô têtu Jakobnê. 43 Tec ŋac tau kêtu ŋac tolêlôm ma kêtap nê bôc ma sakiŋwagao to ŋac ma kamele to doŋki taêsam sa.