Ti ñamirẽ wiogʉ Asuero ne cãrĩmasĩticʉ niwĩ. Tojo weegʉ niꞌcʉ̃ cʉ̃rẽ daꞌracoꞌtegʉre na wiogʉ cʉ̃ sãjãnʉꞌcãcateropʉ “Tojo waꞌaꞌa”, ni ojaõꞌorĩ pũrĩrẽ miiwijatiduti, buꞌeñaꞌduticʉ niwĩ. Wiogʉre tere buꞌewãꞌcãgʉ̃, Mardoqueo pʉarã surara wiorã, Bigtán, Teres wãmetirã, na wiogʉre “Wẽjẽrãti” ni apoyuꞌquere cʉ̃ wereꞌquere buꞌeejacʉ niwĩ.

Tere tʉꞌogʉ, wiogʉ cʉ̃rẽ daꞌracoꞌterãrẽ “Mardoqueore yʉꞌʉre añurõ weeꞌque wapare ¿ñeꞌenojõrẽ cʉ̃rẽ oꞌori?” ni sẽrĩtiñaꞌcʉ niwĩ.

Cʉ̃rẽ daꞌracoꞌterã peꞌe “Oꞌonoꞌña marĩwʉ̃”, nicãrã niwã.

Na tojo nirĩ cura Mardoqueore na “Wẽjẽrãti” ni nʉꞌcõꞌcʉpʉ dʉꞌteyoodutigʉti nígʉ̃, Amán wiogʉre sẽrĩgʉ̃ sãjãacʉ niwĩ. Amán ne niꞌcã ʉsero ni wĩorẽtimicã, wiogʉ cʉ̃rẽ ĩꞌa, aꞌtiro sẽrĩtiñaꞌcʉ niwĩ:

—¿Mʉꞌʉ tʉꞌoñaꞌcã, yʉꞌʉre añurõ weeꞌque wapa ñeꞌenojõ yʉꞌʉ oꞌocã añubosari?

Amán peꞌe “Yʉꞌʉreta nigʉ̃ weesami; yʉꞌʉre apeyenojõ añurõ weesĩꞌrĩgʉ̃ weesami” ni wãcũgʉ̃, aꞌtiro nicʉ niwĩ:

—Yʉꞌʉ tʉꞌoñaꞌcã, cʉ̃rẽ mʉꞌʉ wiogʉ suꞌti sãñasenojõrẽ sãñagʉ̃sami. Tojo nicã, niꞌcʉ̃ mʉꞌʉ yagʉ cabayu mʉꞌʉ pesagʉnojõ buꞌipʉ mʉjãpejagʉsami. Beꞌro mʉꞌʉ meꞌrã daꞌragʉ waro Susa macã decopʉ cabayure wejee, sʉꞌori aꞌtiro caricũsijagʉsami: “Wiogʉ, masʉ̃rẽ cʉ̃ añurõ weesĩꞌrĩgʉ̃rẽ aꞌtiro añurõ weeĩꞌomi,” nicʉ niwĩ Amán.

Tere tʉꞌogʉ, wiogʉ nicʉ niwĩ:

—¡Mʉꞌʉ tojo wãcũse añuyʉꞌrʉaꞌa! Maata waꞌa weetjĩagʉ̃, nipeꞌtise mʉꞌʉ “Weegʉti” níꞌquere Mardoqueo judío masʉ̃rẽ tojo weegʉ waꞌaya, nicʉ niwĩ.

Wiogʉ tojo níca beꞌro maata Amán cʉ̃rẽ ĩꞌatuꞌtimiꞌcʉre cʉ̃ wiogʉre “Tojo weeroʉaꞌa” níꞌquere weecʉ niwĩ. Tojo weegʉ Mardoqueore wiogʉ suꞌti sãñasenojõrẽ sãa, niꞌcʉ̃ wiogʉ yagʉ cabayu buꞌipʉ miipeo, macã decopʉ cʉ̃rẽ sʉꞌori aꞌtiro ni caricũsijacʉ niwĩ: “Wiogʉ masʉ̃rẽ cʉ̃ añurõ weesĩꞌrĩgʉ̃rẽ aꞌtiro añurõ weeĩꞌomi,” ni caricũcʉ niwĩ.

Cʉ̃ tere tuꞌajáca beꞌro Amán cʉ̃ ya wiꞌipʉ ʉpʉtʉ bʉjawetise meꞌrã bopoyagʉ tojaa waꞌacʉ niwĩ. Topʉ tojatagʉ, cʉ̃ nʉmorẽ, cʉ̃ meꞌrãcjãrãrẽ, cʉ̃rẽ waꞌaꞌquere werecʉ niwĩ. Cʉ̃ wiogʉpʉre “Mardoqueore dʉꞌteyoo wẽjẽdutiroʉaꞌa” ni, ne cãꞌrõ sẽrĩmaꞌaticʉ niwĩ.

Tere tʉꞌorã, cʉ̃ nʉmo, cʉ̃ meꞌrãcjãrã aꞌtiro nicãrã niwã:

—Cʉ̃ Mardoqueo judío masʉ̃ nicãma, mʉꞌʉ cʉ̃rẽ ne mejẽcã weemasĩsome. Cʉ̃ peꞌe mʉꞌʉrẽ mejẽcã waꞌacã weegʉsami, nicãrã niwã.

Na tojo nirĩ cura wiogʉ Asuerore daꞌracoꞌteri masã Amárẽ Ester tiropʉ apaturi baꞌadutirã pijirã etacãrã niwã.