Iꞌtia nʉmʉ na beꞌtíca beꞌro Ester wiogo sãñase suꞌtire sãña, wiogʉ nirĩ tucũ põtẽorõpʉ waꞌaco niwõ. Wiogʉ core ĩꞌagʉ̃, cʉ̃ duticjʉ uru meꞌrã daꞌreꞌcʉ meꞌrã sĩ́opuocʉ niwĩ. Cʉ̃ tojo weecã ĩꞌagõ, cʉ̃ nirĩ tucũpʉ sãjãaco niwõ.

Beꞌro wiogʉ core sẽrĩtiñaꞌcʉ niwĩ:

—¿Wiogo Ester, yʉꞌʉ mʉꞌʉrẽ deꞌro weecã ʉati? Mʉꞌʉ yʉꞌʉre deco meꞌrã yʉꞌʉ dutisere sẽrĩcã, mʉꞌʉrẽ oꞌomasĩꞌi, nicʉ niwĩ.

Co cʉ̃rẽ yʉꞌtico niwõ:

—Wiogʉ, mʉꞌʉrẽ añucã, niꞌcãcã yʉꞌʉ mʉꞌʉrẽ baꞌase doꞌadutiꞌquere Amán meꞌrã baꞌagʉ aꞌticã ʉasaꞌa, nico niwõ.

Tojo nicã tʉꞌogʉ, wiogʉ Amárẽ pijiduticʉ niwĩ. Beꞌro na pʉarãpʉta co tiropʉ baꞌarã waꞌacãrã niwã. Na baꞌadujiri cura wiogʉ Estere aꞌtiro nicʉ niwĩ:

—Mʉꞌʉ ʉasere sẽrĩña. Mʉꞌʉ deco meꞌrã yʉꞌʉ dutisere sẽrĩcã, mʉꞌʉrẽ oꞌomasĩꞌi, nicʉ niwĩ.

Ester cʉ̃rẽ yʉꞌtico niwõ:

—Aꞌte diaꞌcʉ̃rẽ mʉꞌʉrẽ sẽrĩgõti. Wiogʉ, mʉꞌʉ yʉꞌʉre maꞌígʉ̃, yʉꞌʉ sẽrĩsere oꞌosĩꞌrĩgʉ̃, aꞌtiro weeya. Ñamiacã Amán meꞌrã baꞌpatitjĩagʉ̃, yʉꞌʉ baꞌase doꞌadutisere apaturi baꞌagʉ aꞌtia. Mʉꞌʉ baꞌagʉ ejacã, yʉꞌʉ ʉasere mʉꞌʉrẽ sẽrĩgõti, ni yʉꞌtico niwõ.

Na baꞌáca beꞌro Amán cʉ̃ ya wiꞌipʉ tojáágʉ, Mardoqueore bocaejacʉ niwĩ. Mardoqueo cʉ̃ weewʉaronojõpʉma cʉ̃rẽ ĩꞌagʉ̃, ne wãꞌcãnʉꞌcãti, cʉ̃rẽ wiopesase meꞌrã ĩꞌaticʉ niwĩ. Tere ĩꞌagʉ̃, Amán uayʉꞌrʉacʉ niwĩ. Tojo uamigʉ̃, ne mejẽcã weetigʉta, cʉ̃ ya wiꞌipʉ tojaa waꞌacʉ niwĩ. Topʉ tojatagʉ, cʉ̃ nʉmorẽ, tojo nicã cʉ̃ meꞌrãcjãrãpʉre pijineocʉ niwĩ. Nipeꞌtise cʉ̃ niyeru cʉosere, cʉ̃ põꞌrã ʉmʉarẽ, cʉ̃rẽ wiogʉ añubutiase daꞌrase cũuꞌquere werecʉ niwĩ. Aꞌtiro ninemocʉ niwĩ narẽ:

—Apeyema wiogo Ester yʉꞌʉ seꞌsarore wiogʉ meꞌrã baꞌadutigo pijiamo. Tojo weego ñamiacã quẽꞌrãrẽ apaturi baꞌadutigo pijiamo. Tojo nimicã, judío masʉ̃ Mardoqueo wiogʉ ya wiꞌi sope pʉꞌto cʉ̃ dujicã, tʉꞌsatisaꞌa. Tojo weero wiogo co yʉꞌʉre baꞌadutigo pijise yʉꞌʉre ne wapamarĩꞌi, nicʉ niwĩ.

Tojo nicã tʉꞌorã, cʉ̃ nʉmo, cʉ̃ meꞌrãcjãrã cʉ̃rẽ “Aꞌtiro peꞌe weeya”, nicãrã niwã:

—Niꞌcãgʉ̃ masãrẽ na dʉꞌteyoo wẽjẽacjʉre nʉꞌcõdutiya. Tigʉre veintidós metros ʉꞌmʉacjʉ nʉꞌcõdutiya. Ñamiacã ñamiñaꞌcũrõ wiogʉre, “Mardoqueore topʉ dʉꞌteyoodutiya”, ni sẽrĩña. Tojo weegʉ mʉꞌʉ ne wãcũqueꞌtiro marĩrõ wiogʉ meꞌrã baꞌagʉ waꞌagʉsaꞌa, nicãrã niwã cʉ̃rẽ.

Na tojo nisere tʉꞌogʉ, Amán tʉꞌsayʉꞌrʉacʉ niwĩ. Tojo weegʉ na dʉꞌteyoo wẽjẽacjʉre nʉꞌcõdutigʉ oꞌócʉ niwĩ.