1 عَلَتَلَ نَشَ عَ مَسٍن ﭑ بّ، عَ نَشّ، 2 «عَدَ مَدِ، عِ شَ مَسٍنيِ تِ ﭑ شِلِ رَ عِسِرَيِلَ نَمِحْنمّيٍ بّ. عَ قَلَ عٍ بّ، نَشٍيٍ مَسٍنيِ تِمَ عٍ يّتّ بْحّ مَ قٍ مَ، عِ نَشّ، ‹وٌ وٌ تُلِ مَتِ عَلَتَلَ شَ مَسٍنيِ رَ! 3 عَلَتَلَ شَ مَسٍنيِ نَن يَ؛ حَشَنكَتّ نَ نَمِحْنمّ وُلٍ قَلّيٍ بّ، نَشٍيٍ بِرَ مَ عٍ يّتّ شَشِلِ قْشْ رَ، عٍ مُ لَامَتُنيِ يٌ تٌشِ. 4 عِسِرَيِلَ، وٌ شَ نَمِحْنمّ وُلٍ قَلّيٍ لُمَ نّ عَلْ شُلُمَسٍيٍ بَنشِ كَنَشِ كُي. 5 وٌ مُ عِسِرَيِلَ شَ تّتّ يَءِلَنشِ عَلَكٌ عَ شَ تِ فٍرٍ كُي عَلَتَلَ شَ لْشْي. 6 عٍ شَ لَامَتُنيِيٍ قِندِشِ وُلٍ نَن نَ. عٍ شَ مَسٍنيِ مُ قِندِشِ نْندِ رَ قٍقٍ مَ. عٍ نَشّ، عَلَتَلَ شُي نَن نَ كِ، عَ قَ لِ عَلَتَلَ شَ مُ عٍ شّيشِ. عٍ وَ مَ نَ شَ كَمَلِ تُن. 7 قُ شَ مُ نَ وٌ شَ لَامَتُنيِيٍ نُن وٌ شَ مَسٍنيِيٍ رَ؟ وٌ عَ قَلَمَ، عَلَ شُي نَن نَ كِ، عَ قَ لِ ﭑ تَن عَلَ شَ شُي مُ عَ رَ!›»

8 «وٌ مَرِفِ عَلَتَلَ يِ نَن مَسٍنشِ وٌ شَ قٍ رَ، عَ نَشّ؛ ‹ﭑ بَرَ كٍلِ وٌ شِلِ مَ وٌ شَ وُلٍ مَسٍنيِيٍ نُن وٌ شَ وُلٍ لَامَتُنيِيٍ شَ قٍ رَ. عَلَتَلَ شُي نَن نَ كِ. 9 ﭑ نَ ﭑ بّلّشّ عِتَلَمَ نّ نَمِحْنمّ وُلٍ قَلّيٍ بّ، نَشٍيٍ وُلٍ لَامَتُنيِيٍ نُن وُلٍ مَسٍنيِيٍ شَ قٍ قَلَمَ. عٍ مُ لُمَ ﭑ مَ حَمَ كُنتِفِيٍ يَ مَ، عٍ شِلِ بَمَ نّ عِسِرَيِلَ شَ تَرُشُي كُي، عٍ مُ سٌمَ عِسِرَيِلَ بْشِ مَ سْنْن. نَ كُي وٌ عَ كٌلٌنمَ نّ عَ ﭑ تَن نَن نَ عَلَتَلَ رَ.›»

10 «عٍ تٌ قَ نَ ﭑ مَ حَمَ رَلْيقٍ نّ نَ كِ عَ قَلَقٍ رَ، ‹وٌ بْحّ شَ سَ،› كْنْ عَ قَ لِ فبَلٌي نَ نَ. عٍ تّتّ كٌبِ نَن تِ، عٍ قَ عَ ثّنتِ عَ قِيشّ رَ. 11 عَ قَلَ عٍ بّ نَ تّتّ بِرَ مَ نّ. تُرُننَادّ نُن تُنّ شُنفبٍ نَ قَ، بَلَبَلَنيِ فٌرٌ مَ نّ. 12 نَ تّتّ نَ بِرَ، عَ مُ قَلَمَ شّ وٌ بّ، ‹وٌ مُ عَ ثّنتِشِ شّ؟ مُنسٍ قَ نِيَشِ؟›»

13 «وٌ مَرِفِ عَلَتَلَ يِ نَن مَسٍنشِ؛ ‹ﭑ تُرُننَادّ شُنفبٍ رَدِنمَ نّ وٌ مَ ﭑ مَ شْنّ كُي، تُنّ بٍلٍبٍلٍ نُن بَلَبَلَنيِ سِنمَ نّ وٌ مَ سّنبّ رَ، عَ كَسَرّ تِ. 14 ﭑ تّتّ رَبِرَ مَ نّ، وٌ نَشَن ثّنتِشِ، ﭑ عَ سَنبُنيِ مَبَ. عَ نَ بِرَ وٌ مَ، وٌ قَشَ عَ بُن مَ. نَ تّمُي، وٌ عَ كٌلٌنمَ نّ عَ ﭑ تَن نَن نَ عَلَتَلَ رَ. 15 ﭑ نَ ﭑ مَ شْنّ بِرِن نَمِنِمَ نّ نَ تّتّ مَ، نُن مِشِ نَشٍيٍ عَ ثّنتِشِ. ﭑ عَ قَلَمَ نّ وٌ بّ، تّتّ مُ نَ سْنْن، نَشٍيٍ قَن عَ ثّنتِشِ، نٍيٍ قَن مُ نَ سْنْن. 16 نٍيٍ قِندِشِ نَ نَمِحْنمّ وُلٍ قَلّيٍ نَن نَ، نَشٍيٍ نُ وْيّنمَ دَرِ سَلَمُ شَ قٍ رَ، عَ بْحّسَ شَ قٍ قَلَ عٍ بّ، عَ قَ لِ فبَلٌي نَن تُن نُ نَ قَقٍ عٍ مَ. عَلَتَلَ شُي نَن نَ كِ.›»

17 «يَكْسِ عَدَ مَدِ، عِ يَ رَقِندِ عِ شَ حَمَ شَ فِنّ دِ مّدِيٍ مَ، نَشٍيٍ نَمِحْنمّ مَسٍنيِ تِمَ عٍ يّتّ بْحّ مَ قٍ مَ. عِ شَ مَسٍنيِ تِ عٍ شِلِ مَ، 18 عَ قَلَقٍ رَ، ‹عَلَتَلَ يِ نَن مَسٍنشِ عٍ بّ، «حَشَنكَتّ نَ فِنّيٍ بّ نَشٍيٍ بّلّشّكْننَسٌي يَءِلَنمَ كَرَقِلِ رَ، شَ نَ مُ عَ رَ عٍ مَقٍلٍنيِيٍ يَءِلَن مِشِ رَتَنتَنقٍ رَ. وٌ عَ مَحْشُنشِ نّ عَ وٌ نَ ﭑ مَ مِشِيٍ رَتَنتَن، وٌ مُ تْورّ سْتْمَ نَ كُي؟ 19 وٌ بَرَ ﭑ مَبٍرٍ دٌنسٍ دِ شَ قٍ رَ. وٌ تٌ وُلٍ قَلَ ﭑ مَ حَمَ بّ نَشَن عَ تُلِ مَتِمَ وُلٍ رَ، وٌ بَرَ مِشِ قَشَ نَشَن مُ نُ لَنمَ عَ شَ قَشَ، وٌ بَرَ مِشِ لُ نَا نَشَن مُ نُ لَنمَ عَ شَ لُ نَا.»›»

20 «وٌ مَرِفِ عَلَتَلَ يِ نَن مَسٍنشِ؛ ‹وٌ شَ كَرَقِلِيٍ مُ رَقَن ﭑ مَ، وٌ مِشِ رَتَنتَنمَ نَشَن نَ عَلْ فَنتَنيِ سَمَ شْنِيٍ بّ كِ نَشّ. ﭑ نَ كَرَقِلِيٍ بَمَ نّ وٌ بّلّشّيٍ رَ، ﭑ شْرّيَ قِمَ نّ مِشِ مَ وٌ نَشَن سُشُ فَنتَنيِ كُي عَلْ شْنِيٍ. 21 ﭑ وٌ شَ مَقٍلٍنيِيٍ بَمَ نّ وٌ مَ، ﭑ نَ ﭑ مَ حَمَ بَ وٌ شَ نْي بُن مَ. نَ كُي وٌ عَ كٌلٌنمَ نّ عَ ﭑ تَن نَن نَ عَلَتَلَ رَ. 22 وٌ بَرَ لِمَنِيَ بَ تِنشِنتْييٍ يِ رَ وٌ شَ وُلٍيٍ رَ، ﭑ نُ وَ مَ نَشَن مَلِقٍ. وٌ بَرَ تِنشِنتَرٍ رَ سِ عٍ شَ لُ عٍ شَ قٍ حَاشِيٍ كُي، ﭑ نُ وَ مَ نَشَن نَكِسِقٍ. 23 وٌ تٌ نَ مْولِ رَبَ، وٌ مُ وُلٍ مَسٍنيِ تِقٍ سْنْن، وٌ مُ لُمَ سٍمَتٌي شَ وَلِ كُي. ﭑ قَمَ نّ ﭑ مَ حَمَ رَتَنفَدٍ وٌ بّلّشّ. نَ كُي وٌ عَ كٌلٌنمَ نّ عَ ﭑ تَن نَن نَ عَلَتَلَ رَ.›»