1 मिनु नोले गो स्‍वर्गमी शुश मुरपुकीम कुम्‍सो पशो ठेयब रेयके खोदेंशो नेंता। मिनु मेकोपुकीमी “हाल्‍लेलया, आंइ परमप्रभु ला मुर आन कली पाप रे प्रोंइब बाक्‍ब। छेङछेङ नु सक्ति नेल्‍ल आंइ परमप्रभु यावे केन बाक्‍ब। 2 मारदे हना परमप्रभु यावे आ पशो निसाफ थमा नु ठीक बाक्‍ब। मिनु परमप्रभु यावेमी रागी नेल्‍ल ङा मुर आन कली खतम सेल्‍ब तेल्‍लेम कली ठीक पा सजाइ गेप्‍तु। मेको तेल्‍लेममी शुश परमप्रभु यावे आ वाइलीम वाइल आन कली साइक्‍तीके, मुल मेको कली क्‍येक्‍क लेत्‍ताक्‍व” दे ग्रीशो नेंता। प्रकाश ६:३०; ब्‍यवस्‍था ३२:४३ 3 मिनु मेको स्‍वर्गमी बाक्‍बपुकीमी लेंशा “हाल्‍लेलया, मेको सहर दुप्‍शो आ कुन गेनायो मनुप्‍थु कुइब” देंतेक्‍म।

4 मिनु मेको २४ जना शेंब खाल्‍पा नु ४ ओटा सेस जन्‍तुपुकीमी आ ठेयब नित्‍तीकेमी निश्‍शो परमप्रभु यावे कली खुम्‍की पा बाप्‍शा सेउ पाम्‍तेक्‍म। मिनु मेकोपुकीमी “आमेन, हाल्‍लेलया” देंतेक्‍म। प्रकाश ४:४; प्रकाश ५:३१; प्रकाश ४:६; भजन संग्रह १०६:४८ 5 मिनु परमप्रभु यावे आ नित्‍तीक रे सेंदा का ग्रूशो नेंता। मेको सेंदामी “परमप्रभु यावे आ वाइलीम वाइल, परमप्रभु यावे कली मान पा हिंब आइक्‍च नु ठेयब मुर नेल्‍लेमी ‘आंइ परमप्रभु यावे नेल्‍ल क्‍येङा ठेयब बाक्‍ब’ देनीन” देंशो नेंता।

6 मिनु नोले गो शुश मुर आन सेंदा ठेयब खोला आ रेयके नु ठेयब बुंबु आ रेयके खोदेंशो पा नेंता। मिनु मेको सेंदामी “हाल्‍लेलया, प्रभु, नेल्‍ल सक्ति पाइश्‍शो आंइ परमप्रभु यावे नेल्‍ल सासन पाइब बाक्‍ब। 7 गो नेल्‍ल ग्‍येरसय। गो नेल्‍लेमी ‘इन सक्ति नेल्‍ल क्‍येङा ठेयब बाक्‍ब’ देंय। गो नेल्‍लेमी परमप्रभु यावे कली मान पय। मारदे हना पाठा आ ग्‍युंबे दुम्‍चशो बाक्‍त। मिनु आ ग्‍युम्‍लीम आंम कली ग्‍योम्‍सीशा, ठीक दुम्‍शो बाक्‍त। प्रकाश २१:९ 8 मेको ग्‍युम्‍ली कली सुती के रिम्‍शो बुश टल्‍केशो वा फेक्‍चा कली गेशो बाक्‍त” देंशो नेंता। मिनु मेको सुती के रिम्‍शो वा मार बाक्‍ब देंशा हना, परमप्रभु यावे आ योव़शो आन ठीक पतीके बाक्‍ब। यसैया ६१:१० 9 मेको परमप्रभु यावे आ स्‍वर्ग ङा गेय पाइबमी आं कली “एको लोव़ ब्रेक्‍तो। पाठा आ ग्‍युंबे जचा कली ब्रेत्‍चा पुंइसीबपुकी ग्‍येरसीशो मुरपुकी बाक्‍नीम” दे माइक्‍ती। मिनु मेकोमी लेंशा आं कली “मेको थमा पा परमप्रभु आ लोव़ बाक्‍ब” दे माइक्‍ती। लूका १४:१५ 10 मिनु नोले गो मेको परमप्रभु यावे आ स्‍वर्ग ङा गेय पाइब कली सेउ पचा कली आ खोइलीमी बाप्‍ती। मेकोमी चहिं आं कली “मपावो। गो गे नु इ लोक्‍बपुकी खोदेंशो येसु आ लोव़ पाइब, परमप्रभु यावे आ वाइल नङ। परमप्रभु यावे कली मान पावो। मारदे हना येसु आ लोव़ पाइबपुकीम परमप्रभु यावेमी तुइक्‍पाइश्‍शो लोव़ ला पाइनीम” दे माइक्‍ती। प्रकाश २२:८-९

11 मिनु नोले गो स्‍वर्ग रोक्‍सीशा, बुश शारा का ताता। मेको शारा तार ङोइक्‍ब का बाक्‍त। मेको शारा ङोइक्‍ब सु बाक्‍त देंशा हना, दीगो नु थमा पाइब माइश्‍शो बाक्‍त। मेको घूस मताक्‍थु ठीक पा निसाफ पाइब बाक्‍त। लडाइ पाइब यो बाक्‍त। मत्ती २४:३०; प्रकाश ३:३४; यसैया ११:४-५

12 मिनु मेको दोदेंब तांइसाक्‍व देंशा हना, मेको आ मिक्‍च हुरुर पा ब्रशो मी खोदेंशो तांइसाक्‍व। आ पियामी शुश मुकुटपुकी बाक्‍तेक्‍म। मिनु मेको तारी नें का ब्रेक्‍शो बाक्‍त। मेको नें सुइमी मतुइक्‍नीम। मेकोम ला तुइक्‍ब। प्रकाश १:३४; प्रकाश ३:१२ 13 मिनु मेकोमी हुशेमी ख्रुम्‍शो वा फेक्‍शो बाक्‍त। आ नें परमप्रभु यावे आ लोव़ माइश्‍शो बाक्‍त। यसैया ६३:१-३; यूहन्‍ना १:१ 14 मिनु स्‍वर्ग ङा फौजपुकी बुश शारा ङोइश्‍शा, मेको आ नोले खोइश्‍शो बाक्‍तेक्‍म। मेको शारा ङोइक्‍बपुकी रिम्‍शो बुश सुती के वा फेक्‍शो बाक्‍तेक्‍म। प्रकाश १७:३४ 15 मिनु मेको ङोंइती ङा बुश शारा ङोइक्‍ब आ शोव़ रे रागी रागी ङा मुर आन कली साइक्‍चा कली हेश्‍शो तरवार का ग्रूत। मिनु मेकोमी फलाम के कोक्‍केमी मेको आन कली सासन पाइब, नेल्‍ल सक्ति पाइश्‍शो परमप्रभु यावे आ गाइक्‍चा ङा कोल खोइलीमी दिम्‍ब। भजन संग्रह २:९; प्रकाश १४:१९-२० 16 मिनु मेको ङोंइती ङा शारा ङोइक्‍ब आ वा नु आ फिलामी नें का ब्रेक्‍शो बाक्‍त। मार नें ब्रेक्‍शो बाक्‍त देंशा हना, पिप आन पिप नु प्रभु आन प्रभु, दे ब्रेक्‍शो बाक्‍त। प्रकाश १:५; १तिमोथी ६:१५

17 मिनु नोले गो परमप्रभु यावे आ स्‍वर्ग ङा गेय पाइब का नांमी राप्‍शो ताता। मेकोमी शुश ग्‍येत्‍थ सरीङमी बेरब चिक्‍ब आन कली ठेयब सेंदामी “परमप्रभु यावे आ गेशो ब्‍वचा कली खुम्‍सीशा यिने। इजीकीएल ३९:४,१७-२० 18 मार ब्‍वचा कली यिने देंशा हना, पिपी, कप्‍तान, बोल्‍यो मुर, शारा, शारा ङोइक्‍ब, वाइलीम वाइल, आइक्‍च नु ठेयब मुर नेल्‍ल आन श्‍ये ब्‍वचा कली यिने” दे ग्रीशा माइक्‍तीमी।

19 मिनु गो ठेयब जन्‍तु नु रागी ङा पिप आन फौजपुकी मेको ङोंइती ङा बुश शारा ङोइक्‍ब नु आ फौजपुकी नु लडाइ पचा कली खुम्‍सीशो ताता। प्रकाश १६:१४,१६ 20 मोपा मेकोपुकी लडाइ पामेनु, मेको ठेयब जन्‍तु नु जोल पा परमप्रभु यावे आ लोव़ पखु पाइब आस कली ग्‍याइक्‍ताक्‍म। परमप्रभु यावे आ लोव़ पखु पाइब चहिं ठेयब जन्‍तु नु बाक्‍शा, छक लाक्‍चा ङा गेय पाइब बाक्‍त। मोपा मेको ठेयब जन्‍तु नु आ मूर्ति कली पूजा पाइब नु आ चिन्‍ड वोइक्‍ब आन कली मरिम्‍शो लां शेंशा खोइक्‍पदा बाक्‍त। मिनु मेको निक्‍शी सेसीन गन्‍धक नु ठेयब मी ब्रतीकेमी हुम्‍चा पुंइसाक्‍स। प्रकाश १३:११-१७; २थिस्‍सलोनिकी २:८ 21 मिनु लीशो मेको आस फौजपुकी चहिं मेको बुश शारा ङोइक्‍ब आ शोव़ रे ग्रूशो तरवारमी साइक्‍चा पुंइसाक्‍म। मिनु चिक्‍बपुकी मेको नेल्‍ल आन श्‍ये ब्‍वशा रूतेक्‍म।