1 मिनु नोले गो शुश अधिकार पाइश्‍शो परमप्रभु यावे आ स्‍वर्ग ङा गेय पाइब का सरीङ रे यिशो ताता। मेको आ टल्‍केशोमी रागी नेल्‍ल छेङछेङ दुम्‍त। इजीकीएल ४३:२ 2 मिनु मेकोमी ठेयब सेंदामी “मेको ठेयब बेबीलोन सहर ब्रेश्‍शा नुप्‍त। मेको ब्रेश्‍शो सहर वोल आन बाक्‍तीके जेल्‍खान दुम्‍त। मेको ग्रांग्रा दिचा ङा चिक्‍ब आन जेल्‍खान दुम्‍त। प्रकाश १४:८; येरमीया १५:३९ 3 मारदे मेको सहर मोदेंशो दुम्‍त देंशा हना, रागी रागी ङा मुर नेल्‍लेमी आ ग्रांग्रा दिचा ङा गेय शेंसीशा मोदेंशो पाम्‍तेक्‍म। मिनु रागी रागी ङा पिपपुकीमी यो मोदेंशो पाम्‍तेक्‍म। मिनु रागी रागी ङा ग्‍याप्‍ब लेयबपुकी मेको सहर ङा शुश थोव़क रे शोंप पाइश्‍शो दुम्‍तेक्‍म” देंत। यसैया ५१:७; नाहुम ३:४ 4 मिनु नोले स्‍वर्ग रे अर्को सेंदा का नेंता। मेको सेंदामी “आं मुरपुकी, मेको सहर रे ग्रूशा पिने। मेकेर रे मग्रूतीनी हना, गे मेकोपुकी खोदेंशो मरिम्‍शो पाइनीनी। मोपा मरिम्‍शो पाइतीनी हना, मेको खोदेंशो पा सजाइ ताइनीनी। यसैया ४८:२०; येरमीया ५०:८; येरमीया ५१:६,४५; २कोरिन्‍थी ६:१७ 5 मेको आन मरिम्‍शो पशो देल्‍शा, सरीङ सम्‍म जाक्‍शो बाक्‍त। मिनु परमप्रभुमी मेको आन मरिम्‍शो पशो मिम्‍‍शो बाक्‍त। उत्‍पत्ती १८:२०-२१; येरमीया ५१:९ 6 मिनु गे इन कली गेशो श्‍येत मेको कली लेत्‍तीन। श्‍येत का ला ममाइ, निक्‍शी खेयप श्‍येत गेने। इन कली गेशो श्‍येत निक्‍शी खेयप गेचा ठीक दुम्‍ब। भजन संग्रह १३७:८; येरमीया ५०:१५,२९; २थिस्‍सलोनिकी १:६ 7 मिनु आंम कली गिश ठेयब सेला, मिश श्‍येत गेशा, सुर्ता नु रोंका पपतीन। मिनु मेकोमी आ थुंमी चहिं ‘गो पिपीम नङ। गो वोंइश बेक्‍शो मीश मुर मनङ। मोपतीके गो सुर्ता गेनायो मपाइनुङ’ देंब। यसैया ४७:७-९ 8 मोपा मोमो ठेयब लेश्‍शो लोव़ पतीके, काबु मेको कली श्‍येत दुम्‍ब। मेको कली मार श्‍येत दुम्‍ब देंशा हना, मेको सहरमी मुर साइक्‍ब रोइ जाक्‍ब, मिनु रोंका पाइनीम, अन्‍काल यो दुम्‍ब। मिनु मेको सहर मीम दुप्‍शा पुलु दुम्‍ब। मेको श्‍येत नेल्‍ल मारदे दुम्‍ब देंशा हना, मेको आन कली निसाफ पाइब परमप्रभु यावे सक्ति पाइश्‍शो बाक्‍ब” देंशो नेंता।

9 मिनु रागी रागी ङा पिपपुकी मेको नु तेल्‍लेम पाम्‍तेक्‍म। मेको आ शोंप यो दाक्‍शो बाक्‍तेक्‍म। मोपतीके मेकोपुकी ग्रोइश्‍‍शो सहर कली तशा, रोंका पा ङाक्‍नीम। 10 मिनु मेको आ श्‍येत तशा हिंशा, ङोन रे कोव़बपुकीमी “आबी, आबी, मेको ठेयब बेबीलोन माइश्‍शो सहर गिश दारशो सेल्‍शो बाक्‍त। मुल चहिं घन्‍टा कामी इ निसाफ दुम्‍त” देंनीम। येरमीया ५१:८ 11 मिनु रागी रागी ङा ग्‍याप्‍ब लेयबपुकी मेको सहर तशा, ङाक्‍शा रोंका पाइनीम। मारदे ङाक्‍शा रोंका पाइनीम देंशा हना, मेको आन लेयचा ङा थोव़क सुइमी मग्‍याप्‍नीम। 12 आन लेयचा ङा थोव़क मार बाक्‍त देंशा हना, सुन, चांदी, हीरा, मोती, शुश क्‍येट लाइब सुती वा, प्‍याजी रङ ङा वा, रेसम वा, लल वा, ब्रोव़शो रिना पाइश्‍शो शी, हात्ती आन ख्रुइ शुश क्‍येट लाइब शी, कांसा, फलाम नु दारशो फुल्‍लु रे सेल्‍शो थोव़कपुकी बाक्‍तेक्‍म। 13 मिनु सिन्‍कौली, चां ख्रेक्‍तीक तेल, मस्‍ला, ब्रोव़शो रिना पाइब तेल, धूप, अङगुर शांबु, जचा तेल, थम रिम्‍शो फस, चेरब, बी ब्‍यफ, भेडा, शारा, बग्‍गी नु वाइलीम वाइल मेको मुर आन लेयतीक थोव़कपुकी बाक्‍तेक्‍म। 14 मिनु मेको ग्‍याप्‍ब लेयबपुकीमी मेको सहर कली “इन दाक्‍शो ब्रोव़शो फल फुल जाम्‍तेक्‍म। इन ग्‍योम्‍सीचा, इन शोंप पाइश्‍शो दुम्‍चा नेल्‍ल गेनायो मथित्‍‍चा ङा पा जाम्‍शा लाम्‍तेक्‍म” देंतेक्‍म। 15 मिनु मेको सहर रे शोंप पाइश्‍शो ग्‍याप्‍ब लेयबपुकी सहर रे ङोन बाक्‍शा, मेको सहर कली गेशो सजाइ तशा हिंतेक्‍म। मिनु मेकोपुकीमी ङाक्‍शा रोंका पशा,

16 “आबी आबी, मेको ठेयब सहर, मेको सहर ङा मुरपुकी शुश क्‍येट लाइब सुती वा, प्‍याजी नु लल रङ ङा वा फेक्‍शो बाक्‍तेक्‍म। मिनु मेकोपुकीम शुश सुन, हीरा नु मोती पांइशो बाक्‍तेक्‍म। प्रकाश १७:४ 17 तन्‍न मुल घन्‍टा कामी मेको सहर ङा शोंपपुकी खतम दुम्‍तेक्‍म” देंतेक्‍म। मिनु डोंगा चलेबपुकी, डोंगामी गेय पाइबपुकी नु डोंगामी ङोइश्‍शा ग्‍याप्‍ब लेयब मुर नेल्‍ल सहर रे ङोन राप्‍शा, इजीकीएल २७:२७-३६ 18 सहर दुप्‍शो कुन तशा “मेरे सहर खोदेंब ठेयब अर्को मबा” दे ग्रीतेक्‍म। 19 मिनु मेकोपुकी सुर्ता पशा, रोंका पा ङाक्‍तेक्‍म। मेकोपुकीमी “आबी आबी, मेरे ठेयब सहर। मेरे सहर ङा डोंगा आन होव़पपुकी मेरे सहरमी मार मार लेयशा, शोंप पाइश्‍शो दुम्‍शो बाक्‍तेक्‍म। तन्‍न घन्‍टा कामी मेरे सहर जाम्‍शा लत। 20 मिनु स्‍वर्गमी बाक्‍ब नेल्‍ले ग्‍येरसीने। परमप्रभु यावे आ योव़शोपुकी, ख्रीस्‍त आ सोइश्‍शोपुकी नु परमप्रभु यावे आ लोव़ पाइबपुकी ग्‍येरसीने। मारदे हना, परमप्रभु यावेमी इन कली गेशो श्‍येत आ पर्बम मेको कली सजाइ गेप्‍तु” देंशो नेंता। येरमीया ५१:४८

21 मिनु बोल्‍यो परमप्रभु यावे आ स्‍वर्ग ङा गेय पाइबमी ठेयब यात खोदेंशो फुल्‍लु का क्‍युक्‍तु। मिनु मेको फुल्‍लु कली समुन्‍द्रमी ताइक्‍ताक्‍व। मेको परमप्रभु यावे आ स्‍वर्ग ङा गेय पाइबमी “मेको फुल्‍लु खोदेंशो पा ठेयब बेबीलोन सहर ताइक्‍चा पुंइसीब। मोपतीके मेको सहर गेनायो मथिंसीब। येरमीया ५१:६३-६४ 22 मिनु मेको ठेयब सहर दोपा नुप्‍ब देंशा हना, ठेयब ताप्‍तीके ताप्‍शो, कुम्‍सो पशो मुराली ताप्‍शो नु तुराही ताप्‍शो मेकेर लेंशा मनेंसीब। मिनु मार मार सेल्‍ब सीप पाइश्‍शो मुरपुकी मेकेर लेंशा मथिंसीब। यात हिल्‍शो आ रेयके मेकेर का यो लेंशा मनेंसीब। यसैया २४:८; इजीकीएल २६:१३ 23 मेकेर बत्ती दाशो हाम्‍सो का यो लेंशा मतांइसीब। मेकेर ग्‍युम्‍ले नु ग्‍युम्‍ली आस सेंदा लेंशा मनेंसीब। मारदे मोदेंशो दुम्‍ब देंशा हना, रागी ङा ठेयब मुर ग्‍याप्‍ब लेयबपुकी बाक्‍तेक्‍म। मेकोपुकीमी मेको आन टुना मुनामी रागी नेल्‍ल ङा मुर आन कली दूली लां खोइक्‍पाइक्‍तेक्‍म। येरमीया २५:१०; यसैया २३:८ 24 मिनु मेको सहर ङा मुरपुकीमी परमप्रभु यावे आ लोव़ पाइबपुकी नु परमप्रभु यावे आ योव़शो मुर आन कली साइश्‍शो बाक्‍तेक्‍म। नेल्‍ल रागी ङा सु सु मुर साइश्‍शो बाक्‍मा, मेको सहरमी साइश्‍शो बाक्‍तेक्‍मे” दे परमप्रभु यावे आ स्‍वर्ग ङा गेय पाइबमी देंत। प्रकाश ६:१०; प्रकाश १७:६