1 तोजो पेला मी तोङ्‍डा बङी जोम्‍बुप तप्‍की मीतिवा च्‍यिककी च्‍यिकला लेपुप छाल्‍सुङ। तमा येशूकी गोमाला खोरो लोमातिवाला सुङ्‍सुङ, “ख्‍यिराङ फरिसीतिवी खमीर नेसुर च्‍याङ्‍से देता, ती खमीर ति तिवी खोनक्‍पु यिन। 2 उम ज्‍यकुप ति ज्‍युक्‍ला मोथोङ्‍गुप ति काङ साङ मे, तमा बानी ज्‍यकुप ति ज्‍युक्‍ला हाक्‍मोकोवु ति काङ साङ मे। 3 तुक क्‍यानी काङ ख्‍यिरा नक्‍तोमीला सिक्‍यावे, ती ति ठछ्‍येलीला थोकिवी। तमा काङ ख्‍यिरा खाङ्‍बी जेकी नाङ्‍ला सताम नाङ्‍ला सिक्यावे, ती ति खाङ्‍बी थोक नेमा ख्‍याप्‍टाक किवी।”

4 येलुङ येशूकी सुङ्‍सुङ, “ओ ङे दाल्‍जातिवा, ङ ख्‍यिराङला सिरिन, जु ति सेसिमा ज्‍युक्‍ला यम्‍बा काङ साङ कि मुथुपुप तीला ज्‍यिवा माकी। 5 यिने ख्‍यिराङ सी मुला ज्‍यिवा कि गोकिवी सिरुप ति ङ ख्‍यिराङला हाक्‍को ज्‍यितिन, जुला सेसिमा ज्‍युक्‍ला ङ्‍येलाला क्‍युरुप ओङ वोतुप तीला ज्‍यिवा की। यिन, ङ ख्‍यिराङला सिरिन, खोला ज्‍यिवा की। 6 काङ डेवा ङ्‍यीला बन्‍गिरी ङ चोके मिटिन्‍वी रो? यिने तिवी पर्ला गोर्ता च्‍यिकला साङ कोन्‍छ्‍योककी मेज्‍येवी। 7 मङ ख्‍यिरा ति याङ गोकी र्‍हे ङ्‍येङ्‍मा यी साङ कोन्छ्‍योककी ङोनी ज्‍याङ वे, तुक क्‍यानी ख्‍यिराङ ज्‍यिवा माकी। ख्‍यिराङ याङ ती बङी वोतुप बन्‍गिरीतिवा सिनाङ मङ खक्‍छ्‍येवु वे।”

8 “ङ ख्‍यिराङला सिरिन, चुका मीकी मीतिवी मिङ्‍गाला ङला तेपा किवी सिवे, ङ मी पुज्‍युङकी साङ कोन्‍छ्‍योककी लेन क्‍योलुप थुतिवी मिङ्‍गाला तीला ङे मी यिन सिनी सिरिन। 9 यिने चुका मी तीकी मीतिवी मिङ्‍गाला ङला तेपा मिकिवी सिवे, ङ साङ कोन्‍छ्‍योककी लेन क्‍योलुपतिवी मिङ्‍गाला तीला ङे मी मिन सिनी सिरिन। 10 चुका मी तीकी ङ मी पुज्‍युङकी तेन्‍दोकला लानी ताम्‍ङे मेलोक्‍पा लप्‍किवे, तीला माफ ङ्‍येकिवी। यिने चुका मी तीकी कोन्‍छ्‍योककी थु चाङ्‍माकी तेन्‍दोकला मारे तोङ्‍गिवे, तीला ति माफ मेङ्‍येवी। 11 चो पेला मीतिवी ख्‍यिराङला यहूदी छ्‍योखाङ ताङ ग्‍येला कितुपतिवा ताङ ओङ्‍ज्‍येन कितुपतिवी दोङ्‍ला क्‍योल्‍गिवे, ती पेला ख्‍यिरा चुक सि गोकिवी, याङ्‍ना काङ सि गोकिवी सिनी पप माकी। 12 च्‍यिलासिसिन ती पेला ख्‍यिरा काङ सि गोकिवी सिनी कोन्‍छ्‍योककी थु चाङ्‍माकी राङ ख्‍यिराङला लोप्‍किवी।”

13 तमा मी माङ्‍छ्‍योककी पर नेमा मिरा च्‍यिककी येशूला सिक्‍यासुङ, “ओ गेकेन, ङे च्‍युच्‍युला ङ ताङ मुला अंश ग्‍यम नङ सिनी सुङ्‍डे किनी।” 14 येशूकी तीला सुङ्‍सुङ, “ओए, सी ङला पेनी ख्‍यिराङ ङ्‍यिवु पर्ला ठिम कितुप याङ्‍ना अंश ग्‍यम तेरुप मी जोसुङ?” 15 तमा खोकी ते वोतुप मी तेरीला सुङ्‍सुङ, “च्‍याङ्‍से देता, ख्‍यिराङ तेरी परकी देर्पा नेमा कुतुक दे। खोरो टोङ्‍बा छासे बङी वोसिनाङ मीकी मिजी ति ती टोङ्‍बी मुला मुलुवी।”

16 तमा येशूकी तिवाला दी पे यी शेन नाङ्‍सुङ, “मी छ्‍युक्‍पु यीकी शिङ खला सप्‍ले बङी ल्‍येनोक। 17 तमा तीकी दुका नासाम यी ताङ्‍नोक, ‘ङे सप्‍ले ज्‍योकुप दासाङ मे, ङ काङ कितुप?’ 18 तीकी सिक्‍यासुङ, ‘त याङ ङ दुक कितिन, ङरा पङाङ शिक्‍नी मङ ग्‍येर्पु जोयी। तमा ती तेरी ङे सप्‍ले ताङ समा च्‍यालकतिवा ती नाङ्‍ला ज्‍योकिन।’ 19 ती ज्‍युक्‍ला ङ ङराङला सिरिन, ‘त ख्‍योरो मुला लो अलायी सेक लङ्‍गुप टोङ्‍बा बङी शम्‍नी ज्‍याङ वे, ख्‍युरुङ किर्मु क्‍या देनी सोनी थुनी गा क्‍यानी दे।’ 20 यिने कोन्‍छ्‍योककी तीला सुङ्‍सुङ, ‘ओ अम्‍बारङ्‍शिङ, हारिङ नुपला राङ ख्‍युरुङ शिवी। तमा ख्‍योरो थोक्‍ला शम्‍नी ज्‍यकुप टोङ्‍बा ति सी ति डिवी?’ 21 रङगी थोक्‍ला तिराङ टोङ्‍बा शम्‍नी कोन्‍छ्‍योककी थोङ्‍दाङला छ्‍युक्‍पु मेतुपतिवा ति दुकै राङ डितो।”

22 येलुङ येशूकी खोरो लोमातिवाला सुङ्‍सुङ, “तुक क्‍यानी ङ ख्‍यिराङला सिरिन, खोरो मिजीकी थोक्‍ला काङ साप, तमा खोरो जुकी थोक्‍ला काङ कोन्‍दुप सिनी पप माकी। 23 च्‍यिलासिसिन मिजी ति साप समा सिनाङ मङ खक्‍छ्‍येवु वे, तमा जु ति मज्‍या सिनाङ मङ खक्‍छ्‍येवु वे। 24 कलकतिवाला ल्‍हानी नासाम तोङ। तिवी सेन साङ मेदेपी, सप्‍ले साङ मङकिवी, तमा तिवी मुला पङाङ याङ्‍ना बकर साङ मे। यिन्‍सिनाङ कोन्‍छ्‍योककी राङ तिवाला समा नङ्‍गिवी। ख्‍यिराङ याङ च्‍यच्‍युमतिवा सिनाङ मङ खक्‍छ्‍येवु मे रो? 25 काङ ख्‍यिरा पर्ला चुका मी तीकी पप क्‍यानी खोरो मिजीकी छे ति चेयी साङ रिङ्‍बु जो थुप्‍किवी? 26 दी दोके लाका टिक्‍पे यी साङ कि मुथुपी सिसिन ख्‍यिराङ च्‍यिला यम्‍बा ताम्‍ङेकी थोक्‍ला पप किवी? 27 पाके मेन्‍दोकतिवा चुक क्‍यानी ग्‍याकिवी नासाम तोङ। तिवा हुर्ताक साङ मिकिवी, क्‍येलुप साङ मेक्‍येल्‍वी। यिने ङ ख्‍यिराङला सिरिन, छासे मज्‍या ल्‍यामु कोन्‍नी छ्‍यावु ग्‍येल्‍वु सोलोमन साङ दी मेन्‍दोकतिवी पर्ला च्‍यिक दोके चोयी साङ छ्‍यानी मे। 28 हारिङ वोसिनाङ सला मेला र्‍हेन क्‍युरुप सकी चला साङ कोन्‍छ्‍योककी दुक क्‍यानी कोन्‍नी नङ्‍गिवी सिसिन, ओ तेपा अला मेतुप टेङ, ख्‍यिराङला याङ मङ छासे क्‍यानी कोन मनङ्‍गिवी रो? 29 तुक क्‍यानी ख्‍यिरा सेमला काङ साप, काङ थुङ्‍गुप सिनी नासाम ताङ्‍नी पप माकी। 30 कोन्‍छ्‍योकला ङो माशेवु मिरिक यम्‍बातिवी के दिवा तेरी छोल्‍गिवी। दिवा ख्‍यिराङला गोकिवी सिनी ख्‍यिरा पपा कोन्‍छ्‍योकला राङ छ्‍या वे। 31 बोरु ख्‍यिराङ खोकी ग्‍येल्‍खाप छोल, तमा खोकी दिवा साङ ख्‍यिराङला ग्‍यप्‍नी नङ्‍गितो।”

32 “ओ छो टिक्‍पे, ज्‍यिवा माकी, च्‍यिलासिसिन ख्‍यिरा पपा कोन्‍छ्‍योककी ख्‍यिराङला खोकी ग्‍येल्‍खाप नङ्‍गुपला गा किनोक। 33 ख्‍यिरा टोङ्‍बातिवा चोनी कतुकारला ख्‍येलुपतिवाला बिन। तमा ख्‍यिरा थोक्‍ला मरलुप छयीतिवा जो, तमा नाम्‍साङ मिसिन्‍दुप टोङ्‍बा ति देवाच्‍येनला शम्‍नी ज्‍योक। ते कुर्मेन साङ मोफोकिवी, बु साङ मग्‍यकिवी। 34 च्‍यिलासिसिन ख्‍यिरा टोङ्‍बा कनी नोके, ख्‍यिरा सेम साङ ते राङ गिवी।”

35 “ख्‍यिराङ शब्‍ज्‍यी कितुपला टडिक क्‍यानी नरी दाक दाक्‍पी दिप्‍ली च्‍येनी ज्‍योक, 36 तमा खोरो ज्‍यिन्‍दाक जेन्‍दीकी डेन नेमा लोक्‍नी वानी गोला डक डक ग्‍यप्‍सिन शार्क्येक गो बेतुपला गुनी देतुप लावातिवा दोके वुङ गोकिवी। 37 खोरो ज्‍यिन्‍दाक खाङ्‍बा वुङ्‍गुप पेला लावातिवा लानी देतुप ठेसिन ती लावातिवाला ल्‍यामु यिनो। ङ ख्‍यिराङला टेङ्‍बु सिरिन, ती ज्‍यिन्‍दाक तीकी केल्‍दाङ दम्‍नी खोरो लावातिवाला च्‍योक्‍चीला दे ज्‍यिकिवी, तमा तिवी चाला वानी तिवाला समा देनी शब्‍ज्‍यी किवी। 38 ज्‍यिन्‍दाक नुप फेकाला याङ्‍ना ती सिनाङ फिमु वोसिनाङ लावातिवा लानी टडिक क्‍यानी राङ देतुप ठेसिन ती लावातिवाला ल्‍यामु यिनो। 39 यिने ख्‍यिराङ दी हाक्‍कोवा की, खाङ्‍बी ज्‍यिन्‍दाककी कुर्मेन चो पेला गिवी सिनी छ्‍या वोतुप यिन्‍सिन तीकी खोरो खाङ्‍बाला कुर्मेन शुक मिज्‍यिवुजा। 40 तुक क्‍यानी ख्‍यिराङ साङ टडिक क्‍यानी देता, च्‍यिलासिसिन ङ मी पुज्‍युङ ख्‍यिरा नासाम मातङ्‍गुप तुजेला वुङ्‍गितो।”

41 तमा पत्रुसकी येशूला सिक्‍यासुङ, “ओ चोवो, काङ दी पे ति ङ्‍यिरा थोक्‍ला तिराङ सुङ्‍गुप यिनाङ की, मी तेरीकी थोक्‍ला सुङ्‍गुप यिन?” 42 तमा चोवोकी सुङ्‍सुङ, “चुका मी ति खोङ्‍तेर्मु ताङ रिक्‍पा वोतुप खाङ्‍बी लाका चेक लावु मी वोज्‍यिवी? ज्‍यिन्‍दाककी तीला खोरो यम्‍बा लावातिवाला टेके तुजेला समा तेरुपला चेक तेकिवी। 43 ज्‍यिन्‍दाक लोक्‍नी वुङ्‍गुप पेला ती लावा ति तुकै कियी वोतुप राङ ठेसिन ती लावाला ल्‍यामु गिवी। 44 ङ ख्‍यिराङला टेङ्‍बो सिरिन, ज्‍यिन्‍दाक तीकी खोरो तेरी टोङ्‍बा ति ती लावाला चेक तेकिवी। 45 यिने ती लावा तीकी सेमला ‘ङे ज्‍यिन्‍दाक याङ फिमु गिते।’ सिनी नासाम ताङ्‍नी लावातिवा ताङ लावामतिवाला दुनी खोरुङ ति साप ताङ थुङ्‍गुप ताङ जिनी देसुङ सिसिन 46 तीकी ज्‍यिन्‍दाक ति तीकी नो माक्‍यावु छेर्मु ताङ हाक्‍माकोवु तुजेला लोक्‍नी वुङ्‍गिवी, तमा तीला कशेन छ्‍येर्पा बिन्‍नी खोङ्‍तेर्मु मेतुप लावातिवा ताङ मुला क्‍युर कितो। 47 खोरो ज्‍यिन्‍दाककी नोवा हाक्‍कोनी साङ टडिक मिकिवु याङ्‍ना ज्‍यिन्‍दाककी नोवु दोके मिकिवु लावाला बङी दुङ्‍गिवी। 48 यिने ज्‍यिन्‍दाककी नोवा हाक्‍माकोनी दुङ्‍गुप लाका क्‍यावु लावा तीला चेयी राङ दुङ्‍गिवी। तुक क्यानी सुला मङ बिन वे, ती नेमा मङ लङ्‍गिवी। सुला मङ चेक तेवे, ती नेमा मङ ल्‍हक्‍पा लङ्‍गिवी।”

49 “ङ जम्‍बुलिङला मे ग्‍यकुपला वावु यिन। ती मे ति गोमाला के शोरुप यिन्‍सिन छासे ल्‍यामु वुङ्‍गुप्‍जा। 50 यिने ङे लङ गोवु छेटाङकी बप्‍तिस्‍मा यी वे। ती बप्‍तिस्‍मा लङ्‍गुप लाका मासिन्‍दा सेक्‍ला ङला छासे सेम्‍दुक ला वे। 51 काङ ख्‍यिराङ ङ जम्‍बुलिङला लोदिमु तेरुपला वावु यिन सिनी नोकिवी? मिन, ङ ख्‍यिराङला सिरिन, बोरु ङ ख्‍यिराङला ख्‍ये बेतुपला वावु यिन। 52 तफेन्‍ला खाङ्‍बा च्‍यिकला मी मिरा ङ वोसिन मिरा सुमकी तेन्‍दोकला मिरा ङ्‍यी, तमा मिरा ङ्‍यीकी तेन्‍दोकला मिरा सुम लानी च्‍यिककी च्‍यिकला ख्‍ये पेकिवी। 53 पपी तेन्‍दोकला पुज्‍युङ, पुज्‍युङकी तेन्‍दोकला पपा, तमा आमी तेन्‍दोकला पुम, पुमी तेन्‍दोकला आमा, तमा यिवी तेन्‍दोकला नमा, नमी तेन्‍दोकला यिवी लानी तिवी पर्ला ख्‍ये पेकितो।”

54 तमा येशूकी मी माङ्‍छ्‍योकला सुङ्‍सुङ, “ख्‍यिरा नुपकी थाकाला मुक्‍पा वुङ्‍गुप थोङ्‍सिन छ्‍यर्वा ग्‍यकिवी सिनी सिवी, तमा तुकै राङ डिवी। 55 तमा ल्‍होकी थाका ने लुङ ग्‍यप्‍सिन छजुप ल्‍हकिवी सिनी ख्‍यिरा सिवी, तमा तुकै राङ डिवी। 56 ओ खोनक्‍पुतिवा, ख्‍यिरा स ताङ नाम ल्‍हानी नाम चुकै डिवी सिरुप ति बेतुप शेकिवी, यिने तसाम पेलाकी तुजे ति च्‍यिला बेतुप मेशेवी?”

57 “ख्‍यिराङ च्‍यिला चुका ति टेङ्‍बु यिन सिनी ख्‍यिरा राङ तेन्‍तेन कि मुथुपी? 58 ख्‍युरुङला शुवा ग्‍यकुप मी ताङ मुला ठिम कितुप मी ते डोप पेला लामला राङ ती ताङ मुला थिन्‍दुप छोल। मिसियाङ तीकी ख्‍युरुङला ठिम कितुप मीकी दोङ्‍ला टिनी डिवी, तमा ती ठिम कितुप तीकी ख्‍युरुङला चोन्‍खाङकी मी छ्‍येला चेक तेनी तीकी ख्‍युरुङला चोन्‍खाङला उप्‍किवी। 59 ङ ख्‍युरुङला सिरिन, ख्‍योरो डेवा रे रे माछ्‍योला सेक्‍ला ख्‍युरुङ तेसुर थेन मुथुप्‍तो।”