1 ती पेला राङ ललाइ मीतिवा वानी येशूला दुक सिक्‍यासुङ, “गालीलकी मी ललाइ जिन्‍बा तोङ्‍यिन कितुप पेला पिलातसकी तिवाला सेनी तिवी ठक ति जिन्‍बा तोङ्‍गुप सेम्‍ज्‍येनकी ठक ताङ मुला र्‍हेसुङ।” 2 तमा येशूकी तिवाला सुङ्‍सुङ, “ती गालीलकी मीतिवाला तुकै छेटाङ खुरुप तप्‍की तिवा यम्‍बा तेरी गालिलीतिवा सिनाङ मङ दिक्‍छेन यिन सिनी ख्‍यिरा नोकिवी? 3 तुकै मिन। ङ ख्‍यिराङला सिरिन, ख्‍यिराङ साङ दिक्‍पा ने सेम माग्‍युर्सुङ सिसिन तुक राङ क्‍यानी तेरी ना डिवी। 4 येलुङ सिलोआमला वोतुप चिवुर गुतोक तला ग्‍यप्‍नी ती वोक्‍ला लेप्‍नी मी मिरा च्‍याप्‍ग्‍येतिवा शिनोक, तमा तिवा ति यरूशलेमला देतुप यम्‍बा तेरी मीतिवा सिनाङ मङ दिक्‍पा क्‍यावु मीतिवा यिन सिनी ख्‍यिरा नोकिवी? 5 तुकै मिन। ङ ख्‍यिराङला सिरिन, ख्‍यिराङ साङ दिक्‍पा ने सेम माग्‍युर्सुङ सिसिन तुक राङ क्‍यानी तेरी ना डिवी।”

6 ती ज्‍युक्‍ला येशूकी दुका पे यी शेन नाङ्‍सुङ, “मी मिरा च्‍यिककी खोरो गुन्‍डुम शिङ खला अन्‍जीरकी दोङ्‍बु यी चुनोक। तमा ती दोङ्‍बुला डेलु गार्ते सिनी ती ति ल्‍हा वानोक, यिने तीकी काङ साङ डेलु माङ्‍येनोक। 7 तुक क्‍यानी तीकी गुन्‍डुम शिङ खला लाका कितुप लावा तीला सिक्‍यासुङ, ‘ङ लो सुम सेक दी अन्‍जीरकी दोङ्‍बुला डेलु गार्ते सिनी ल्‍हा वायिन, यिने ङे काङ साङ डेलु माङ्‍ये। दीला च्‍येन क्‍युर! दीकी याङ शिङ तिराङ र्‍हिप्‍किनोक।’ 8 तमा लावा तीकी सिक्‍यासुङ, ‘ज्‍यिन्‍दाक, दीला लो खोर्मा रे मङ क्‍युर्नी ज्‍योक, ङ दीकी गारी गुरी कोनी छ्‍या लुकिन। 9 त वुङ्‍गुप लोला तीकी डेलु गर्सिन ल्‍यामु यिन, यिने मागर्सिन दीला च्‍येनी क्‍युर।’ ”

10 ङ्‍यिम्‍ज्‍यिक ङासोप ङ्‍यिमाला येशू यहूदी छ्‍योखाङला येन्‍देन नङ्‍यिन नोक। 11 ती पेला ते लो च्‍याप्‍ग्‍ये नेज्‍युन डे ग्‍यप्‍नी जु ति छासे कोकोरोक गल्‍नी चेयी साङ जु किचोक्‍पा दे मुथुपुप पुम्‍पेजा यी नोक। 12 तमा येशूकी तीला थोङ्‍सिमा तीला चाला कताङ्‍नी सुङ्‍सुङ, “ओ पुमो, त ख्‍युरुङ ख्‍योरो नेजु नेमा टेक्‍सुङ।” 13 तुक सुङ्‍सिमा खोकी तीला खोरो छ्‍याक ज्‍याक्‍सुङ, तमा ती पुम्‍पेजा ति शार्क्येक किचोक्‍पा लानी कोन्‍छ्‍योकला सोवा तेक्‍सुङ।

14 येशूकी ङासोप ङ्‍यिमाला टेक च्‍यितुप तप्‍की ती यहूदी छ्‍योखाङकी मी छ्‍ये तीला ङ्‍यिर्मु लानी मीतिवाला सिक्‍यासुङ, “लाका कितुप ति ङ्‍यिमा टुक वे, तुक क्‍यानी ती ङ्‍यिमा टुककी नाङ्‍ला वानी दाक दाक्‍पुला टेक च्‍यी, यिने ङासोप ङ्‍यिमाला तुक माकी।” 15 यिने येशूकी तीला सुङ्‍सुङ, “ओ खोनक्‍पुतिवा, काङ ख्‍यिरा रे रेकी ङासोप ङ्‍यिमाला साङ खोरो लाङ ताङ पुङ्‍गोकतिवा गोठे नाङ नेमा ताङ्‍नी छ्‍यु लितुपला दा मोडोवी? 16 तुकै यिन्‍सिन लो च्‍याप्‍ग्‍ये सेक शैतानकी खोरो ओङला नरी टानी ज्‍यकुप दी अब्राहामकी गिपा यिन्‍दुप पुम्‍पेजा तीला ङासोप ङ्‍यिमाला पि तोङ्‍गुप मेङ्‍गिवी रो?” 17 येशूकी तुक सुङ्‍सिमा खोकी तेन्‍दोकला लावुतिवा तेरी खक्‍योवा लासुङ। यिने यम्‍बा मी माङ्‍छ्‍योक ति खोकी क्‍या नङ्‍गुप तेरी हलेवु लाकाला गा क्‍यासुङ।

18 लोङ येशूकी सुङ्‍सुङ, “कोन्‍छ्‍योककी ग्‍येल्‍खाप ति काङ च्‍यिन्‍दै यिन? तीला ङ काङ ताङ मुला डिक्‍नी ल्‍हाप? 19 दी ति मी मिरा च्‍यिककी खोरो शिङ खला तपुप राय छेर्माङकी सेन दोके यिन। ती ग्‍यानी दोङ्‍बु ग्‍येर्पु गाल, तमा तीकी यल्‍काला नामगी च्‍यच्‍युमतिवी छाङ जोसुङ।” 20 येलुङ खोकी सुङ्‍सुङ, “लोङ कोन्‍छ्‍योककी ग्‍येल्‍खाप ति ङ काङ ताङ मुला डिक्‍नी ल्‍हाप? 21 ती ति खमीर दोके यिन। पुम्‍पेजा यीकी तीला फे किलो खल्‍ज्‍यिक ताङ ङकी नाङ्‍ला लुक्‍सिमा टम्‍दोक तेरीला बोसुङ।”

22 तमा येशू ग्‍येसा ग्‍येसा ताङ युल युलला येन्‍देन नङ्‍यिन सिरा यरूशलेम नेवा फेप्‍सुङ। 23 ती पेला मी मिरा च्‍यिककी खोला टिसुङ, “चोवो, दिक्‍पा ने थरुप मीतिवा ति चेयी तिराङ वे?” तमा खोकी तिवाला सुङ्‍सुङ, 24 “गच्‍चा वोतुप गो नेमा शुकुपला हुर्ताक की। ङ ख्‍यिराङला सिरिन, मी बङी ती नाङ्‍ला शुकुप छल्‍सिनाङ शुक मुथुपी। 25 तमा खाङ्‍बी ज्‍यिन्‍दाक लानी गो च्‍येन सिन्‍सिमा ख्‍यिराङ ति गे फिला लानी गोला डक डक ग्‍यकिन सिरा, ‘ओ ज्‍यिन्‍दाक, ङ्‍यिराङला गो पेनी।’ सिनी गोङ्‍बा शिवी। यिने ती ज्‍यिन्‍दाककी सिवी, ‘ख्‍यिराङ कनी नेसुर वावु यिन, ङे याङ ख्‍यिराङला ङो राङ माशे।’ 26 तमा ख्‍यिरा दुक सिवी, ‘ज्‍यिन्‍दाककी मुला ङ्‍यिरा सोवु यिन, थुवु यिन, तमा ज्‍यिन्‍दाककी ङ्‍यिरा युलला येन्‍देन लाप नङ्‍गुप यिन।’ 27 येलुङ तीकी दुक सिवी, ‘ख्‍यिराङ कनी नेसुर वावु यिन, ङे याङ ख्‍यिराङला ङो राङ माशे। ओ ख्‍यिराङ तेरी दुक्‍टा कितुप टेङ, ङ नेसुर ग्‍युक!’ 28 ख्‍यिरा अब्राहाम ताङ इसहाक ताङ याकूब ताङ तेरी कोन्‍छ्‍योककी लुङ्‍तेम्‍बातिवा ति कोन्‍छ्‍योककी ग्‍येल्‍खापला वे, यिने खोरुङ ति फिला तेन तङ्‍गुप थोङ्‍गुप पेला ख्‍यिराङ ङुप्‍राङ कियी स मुर्कितो। 29 तमा शरकी थाका नेसुर, नुपकी थाका नेसुर, ल्‍होकी थाका नेसुर, च्‍याङगी थाका नेसुर मीतिवा वानी कोन्‍छ्‍योककी ग्‍येल्‍खापकी डेनला दाक दाक्‍पी दासाला देकिवी। 30 वुतुङ के तिङ्‍ला वोतुपतिवा ति गोमाला ख्‍येल्‍गितो, तमा गोमाला वोतुपतिवा ति तिङ्‍ला ख्‍येल्‍गितो।”

31 ती पेला राङ ललाइ फरिसीतिवा येशूकी चाला वानी, “देसुर थेन्‍नी यम्‍बा दासाला फेप। हेरोदकी ख्‍युरुङला सेतुप छोल्‍गिनोक।” सिनी सिक्‍यासुङ। 32 तमा खोकी तिवाला सुङ्‍सुङ, “गल्‍नी ती च्‍यिप्‍च्‍याङ तीला दुक सी, ‘ङ हारिङ ताङ सला डेतिवा थेन्‍दुप ताङ नेर्पुतिवा टेक ज्‍यिकिवी, तमा ना ति ङे लाका तेरी सिन्‍दा किवी।’ 33 यिने हारिङ ताङ सला ताङ ना ति ङ यु युवा राङ दे गोकिवी, च्‍यिलासिसिन चुका कोन्‍छ्‍योककी लुङ्‍तेम्‍बा साङ यरूशलेमला मिसिन यम्‍बा दासाला शि मुथुपी। 34 ओ यरूशलेमकी मीतिवा, ओ यरूशलेमकी मीतिवा, ख्‍यिरा याङ कोन्‍छ्‍योककी लुङ्‍तेम्‍बातिवाला सेतुप ताङ कोन्‍छ्‍योककी ख्‍यिरा ते तङ्‍गुपतिवाला दो थ्‍वोनी बेप्‍किवी। च्‍यमुङकी खोरो च्‍यप्‍रुकतिवाला पुशोक वोक्‍ला रुकुप दोके ङे थेङ्‍मा अलायी ख्‍यिरा आङातिवाला मुला राङ रुकुप छलिन, यिने ख्‍यिराङ माङ्‍येन। 35 ल्‍होसा, तफेन्‍ला कोन्‍छ्‍योककी ख्‍यिरा खाङ्‍बा क्‍युर्नी ज्‍योकितो। चो पेला ख्‍यिरा ‘चोवोकी मिङला फेपुप ति मोलाम थोपुप यिनो।’ मिसिर्वे, ती पेला सेक ख्‍यिरा ङला येलुङ मोथोङ्‍गितो।”