1 येलुङ येशूकी तिवाला पे नेसुर दुक सुङ्‍सुङ, “मी मिरा च्‍यिककी गुन्‍डुम शिङ जोनी तीकी गारी गुरीला खोर क्‍यासुङ। तमा गुन्‍डुम चिरुप समा ज्‍योकुपला मुक्‍तुम टुनी गुन्‍डुम शिङ र्‍हेन्‍दुप मतेन यी जोसुङ। ती ज्‍युक्‍ला गुन्‍डुम शिङ ति पिज्‍यिङ्‍बातिवाला तङ ज्‍याक्‍नी खोरुङ ति थाक्‍रिङ्‍बु मी लुङ्‍बाला गाल। 2 तमा गुन्‍डुम छोसिमा ती गुन्‍डुम शिङगी ज्‍यिन्‍दाक तीकी खोरुङला थोपुप गुन्‍डुम लङ्‍गुपला खोरो लावा यीला पिज्‍यिङ्‍बातिवी चाला ताङ्‍सुङ। 3 यिने पिज्‍यिङ्‍बातिवी ती लावा तीला जिम दुनी लाक्‍पा तोङ्‍बा राङ लोक्‍नी ताङ्‍सुङ। 4 येलुङ ज्‍यिन्‍दाककी लावा यम्‍बा यीला पिज्‍यिङ्‍बातिवी चाला ताङ्‍सुङ। तमा तिवी ती लावाकी गोला पोप्‍नी खक्‍योवा लङ्‍नी ताङ्‍सुङ। 5 ती ज्‍यिन्‍दाककी येलुङ खोरो लावा यम्‍बा यीला ताङ्‍सुङ। तमा तिवी तीला ति सेसुङ। ज्‍यिन्‍दाककी खोरो लावा बङीला ताङ्‍सिनाङ तिवी ललाइला दुसुङ, ललाइला सेसुङ। 6 त ज्‍यिन्‍दाककी ति खोरो ङ्‍यिङ्‍ज्‍येवु पुज्‍युङ च्‍यिक तिराङ लुनोक। तमा तीकी ‘तिवी ङे पुज्‍युङला याङ ताङ्‍देन किते यिन्‍दे।’ सिनी तेरी सिनाङ तिङ्‍ला खोरो पुज्‍युङला पिज्‍यिङ्‍बातिवी चाला ताङ्‍सुङ। 7 यिने पिज्‍यिङ्‍बातिवी पुज्‍युङला थोङ्‍सिमा खोप्‍रे नाङ्‍ला ‘दी याङ ज्‍यिन्‍दाककी अंश थोप छ्‍योवु यिन। तीला सेतुप। तुक क्‍यासिन तीला थोपुप अंश ति दाक्‍पुला थोप्‍किवी।’ सिनी सिक्‍यासुङ। 8 तमा तिवी ती पुज्‍युङला जिम टि गल्‍नी सेनी गुन्‍डुम शिङगी फिला क्‍युर्सुङ। 9 त ती गुन्‍डुम शिङगी ज्‍यिन्‍दाक तीकी काङ किताङ? ती ज्‍यिन्‍दाक वानी ती पिज्‍यिङ्‍बातिवाला सेकिवी, तमा गुन्‍डुम शिङ ति यम्‍बा पिज्‍यिङ्‍बातिवाला तोङ्‍गिवी। 10 ख्‍यिरा कोन्‍छ्‍योककी सुङगी नाङ्‍ला दुक सिनी टिवु ति मारा?

12 येशूकी ती पे ति खोप्‍रे तेन्‍दोकला सुङ्‍गुप यिन सिरुप हाक्‍कोनी तिवी येशूला जिम्‍बुप छाल्‍सुङ। यिने मी मङ्‍मुला ज्‍यिवा लानी तिवी खोला क्‍युर ज्‍याक्‍नी गाल्‍सुङ।

13 ती ज्‍युक्‍ला तिवी येशूला ताम्‍ङे गो कोरुपला ललाइ फरिसीतिवा ताङ ग्‍येल्‍वु हेरोद छोक्‍पाकी मीतिवाला येशूकी चाला ताङ्‍सुङ। 14 तिवा वानी खोला “गेकेन, गेकेन याङ टेङ्‍बु वे सिरुप ति ङ्‍यिराङला छ्‍या वे। गेकेनकी याङ मी यम्‍बी खोरुङला काङ सिते सिनी ङ्‍याम मिकिवी। गेकेनकी मी ङो ल्‍हानी लाका मिकिवी, यिने कोन्‍छ्‍योककी लाम टेङ्‍बु क्‍यानी लोप्‍किवी। त ङ्‍यिरा रोमी ग्‍येल्‍वु कैसरला से तेतुप ति कोन्‍छ्‍योककी ठिमला गिवी ताङ मेङ्‍गिवी? 15 ङ्‍यिरा से ते गोकिवी ताङ मोगोवी?” सिनी सिक्‍यासुङ। येशूकी तिवी सेम खोनक्‍पु वोतुप हाक्‍कोनी तिवाला “ख्‍यिराङ च्‍यिला ङला खोक्‍पा ल्‍हेवी? ङुलकी डप्‍बु* १२:१५ ङुलकी डप्‍बु च्‍यिक ति लावा मिरा च्‍यिककी ङ्‍यिमी ल यिन। च्‍यिक दे खुर वानी ङला छ्‍या तेन।” सिनी सुङ्‍सुङ। 16 तिवी शिकाकी डप्‍बु च्‍यिक खुर्नी वासिमा खोकी तिवाला “दीकी लोला वोतुप रिमुङ ति सी ति यिन? ती यिकी ति सी ति यिनाङ?” सिनी टि नाङ्‍सुङ। तिवी “कैसरकी ति यिन।” सिनी सिक्‍यासुङ। 17 येशूकी तिवाला सुङ्‍सुङ, “कैसरकी ति कैसरला ते, तमा कोन्‍छ्‍योककी ति कोन्‍छ्‍योकला पुल।” खोकी दुक सुङ्‍गुप थोनी तिवा हलेवा क्‍यासुङ।

18 तमा शेप ने सेन्‍बु मलङ्‍गिवी सिरुप सदुकीतिवा येशूकी चाला वानी दुक सिनी टिसुङ, 19 “गेकेन, मोशाकी दाक्‍पुला टिवु ठिमकी नाङ्‍ला ‘मी ललाइकी ति अच्‍यु ति पेजा माच्‍युङ्‍वा क्‍यानी शिनी तीकी पेर्मी लुसुङ सिसिन तीकी नुप तीकी छाम तीला लानी खोरो अच्‍यी थोक्‍ला गिपा फेल ज्‍यि गोकिवी।’ सिनी सिक्‍यानोक। 20 दासा यीला अच्‍युनुप पिन दिन नोक। तमा अच्‍यु छ्‍ये तीकी पेर्मी लासिमा पेजा माच्‍युङ्‍वा क्‍यानी शिसुङ। 21 तुक राङ क्‍यानी तीकी नुप तीकी छाम तीला लानी ती साङ पेजा माच्‍युङ्‍वा क्‍यानी शिसुङ। लोङ तीकी नुप सुम्‍बा तीकी साङ तुक राङ क्‍यानी शिसुङ। 22 पिन दिन्‍करला पेजा माच्‍युङ। ती ज्‍युक्‍ला ति छाम तिङ शिसुङ। 23 तमा तिवा शेप ने सेन्‍बु लङ्‍गुप पेला ती पुम्‍पेजा ति सी पेर्मी च्‍युङ्‍गिवी? पिन दिन्‍करकी तीला जेन्‍दी क्‍यावु यिन।” 24 तमा येशूकी तिवाला सुङ्‍सुङ, “ख्‍यिरा नोरुप यिन, च्‍यिलासिसिन ख्‍यिरा कोन्‍छ्‍योककी सुङ ताङ खोकी ओङ ति हाक्‍माकोनोक। 25 मीतिवा शेप ने सेन्‍बु लङ्‍गुप पेला जेन्‍दी मिकिवी, यिने देवाच्‍येनकी लेन क्‍योलुप थुतिवा दोके च्‍युङ्‍गिवी। 26 शेपतिवा सेन्‍बु लङ्‍गुप कोर्ला मे बरिन वोतुप बुलुक दोङ्‍बी पर नेमा कोन्‍छ्‍योककी मोशाला काङ सुङ्‍नोक, ती ति मोशाकी टिवु थेप नाङ्‍ला ख्‍यिरा मारा? ती पेला कोन्‍छ्‍योककी मोशाला ‘ङ ति अब्राहामकी कोन्‍छ्‍योक ताङ इसहाककी कोन्‍छ्‍योक ताङ याकूबकी कोन्‍छ्‍योक यिन।’ सिनी सुङ्‍सुङ।* १२:२६ प्रस्‍थान ३:६ 27 कोन्‍छ्‍योक ति शेपतिवी कोन्‍छ्‍योक मिन, यिने सेन्‍बुतिवी कोन्‍छ्‍योक यिन। ख्‍यिराङ छासे नोर्नोक।”

28 ती पेला यहूदी छ्‍योकी गेकेन यी वानी येशूला सदुकीतिवी मुला केवुल कियी वोतुप थोनोक। येशूकी सदुकीतिवाला टिलेन ल्‍यामु नङ्‍गुप थोनी तीकी खोला टिसुङ, “गेकेन, कोन्‍छ्‍योककी कतिवी नाङ्‍ला तेरी सिनाङ क छ्‍ये ति चुका ति यिन?” 29 तमा येशूकी तीला सुङ्‍सुङ, “तेरी सिनाङ क छ्‍ये ति दी राङ यिन। ‘ओ इस्राएलकी मीतिवा, ङ्‍येना। दाक्‍पी चोवो कोन्‍छ्‍योक ति च्‍यिक राङ वोतुप चोवो यिन। 30 ख्‍योरो तेरी सेमगी दिङ ने, ख्‍योरो तेरी मिजी ने, ख्‍योरो तेरी नासाम ने, ख्‍योरो तेरी ङार ने रङगी चोवो कोन्‍छ्‍योकला ङ्‍यिङ्‍ज्‍ये की।’* १२:२९-३० व्यवस्था ६:४-५ 31 तमा क ङ्‍यिवा ति दी राङ यिन। ‘ख्‍योरो युल्‍वाला रङला दोके ङ्‍यिङ्‍ज्‍ये की।’ दी सिनाङ यम्‍बा क छ्‍ये ति मे।”* १२:३१ लेवी १९:१८ 32 ती थोनी ती यहूदी छ्‍योकी गेकेन तीकी येशूला सिक्‍यासुङ, “गेकेनकी टेके सुङ्‍सुङ। कोन्‍छ्‍योक च्‍यिक राङ वे, खो मिसिन यम्‍बा सु साङ मे। 33 खोला रङगी तेरी सेमगी दिङ ने, रङगी तेरी रिक्‍पा ने, रङगी तेरी ङार ने ङ्‍यिङ्‍ज्‍ये कितुप ताङ खोरो युल्‍वाला रङला दोके ङ्‍यिङ्‍ज्‍ये कितुप ति सेम्‍ज्‍येन र्‍हेनी जिन्‍बा तोङ्‍गुप ताङ यम्‍बा जिन्‍बा तोङ्‍गुप सिनाङ मङ खक्‍छ्‍येवु यिन।” 34 तीकी सिक्‍यावु रिक्‍पा वोतुप ताम्‍ङे थोनी येशूकी तीला “ख्‍युरुङ ति कोन्‍छ्‍योककी ग्‍येल्‍खापला शुक्‍तु छ्‍येनोक।” सिनी सुङ्‍सुङ। तमा ती ज्‍युक्‍ला सी साङ खोला टिवा टेपला ङाडेङ माक्‍या।

35 तमा येशूकी यहूदी ल्‍हङाङला येन्‍देन लोपिन कितुप पेला खोकी दुक सुङ्‍सुङ, “च्‍यिला यहूदी छ्‍योकी गेकेनतिवी ख्रीष्‍ट ति दाऊदकी गिपा यिन सिनी सिवी? 36 दाऊदकी कोन्‍छ्‍योककी थु चाङ्‍मा नेमा ख्रीष्‍टकी कोर्ला दुक सिक्‍यासुङ,

37 दाऊदकी ख्रीष्‍टला खोरो चोवो सिनी सिसिन चुक क्‍यानी ख्रीष्‍ट ति दाऊदकी गिपा च्‍युङ्‍गिवी?” मी मङ्‍मुकी खोकी सुङ ति गा क्‍यानी ङ्‍येन्‍सुङ। 38 येलुङ येशूकी येन्‍देन लोपिन सिरा दुक सुङ्‍सुङ, “यहूदी छ्‍योकी गेकेनतिवा नेसुर च्‍याङ्‍से दे। तिवा छ्‍योवा रिङ्‍बु कोन्‍नी फार छुर युकुप गा किवी, हाला मीतिवी खोरुङला छ्‍याक पुलुप ति गा किवी। 39 तमा यहूदी छ्‍योखाङला टाल जिम्‍बुप ताङ डेनला टला देतुप गा किवी। 40 तिवा पेर्मी युक्‍सिमकी नोर ठोनी सेवी, मीतिवाला छ्‍या देन्‍दुपला मोपोर रिङ्‍बु किवी। तुक कितुपतिवाला ति मङ छ्‍येर्पा ल्‍हक्‍पा फोकिवी।”

41 येशू यहूदी ल्‍हङाङकी बुल्‍वा बुलुप गामकी फेचेक चा नेसुर मीतिवी बुल्‍वा लुकुप ति ल्‍हानी ज्‍युसुङ। ते मी छ्‍युक्‍पुतिवा बङीकी टङ्‍गा बङी लुक्‍सुङ। 42 ती पेला पेर्मी युक्‍सिम पेराङ्‍बु यी वानी सा डेवा ङ्‍यी लुक्‍सुङ। 43 तमा येशूकी लोमातिवाला चाला कताङ्‍नी सुङ्‍सुङ, “ङ ख्‍यिराङला टेङ्‍बो सिरिन, बुल्‍वा बुलुपतिवी पर्ला दी पेर्मी युक्‍सिम तीकी यम्‍बा सिनाङ मङ लुक्‍सुङ। 44 च्‍यिलासिसिन यम्‍बातिवा तेरीकी नोर मङ्‍मु वोतुप नेसुर लुक्‍सुङ, यिने दी पेर्मी युक्‍सिम तीकी याङ पेराङ्‍बु राङ वोसिनाङ खोरो मुला चो वोतुप ति तेरी टङ्‍गा लुक्‍सुङ।”