1 येशू ताङ लोमातिवा यरूशलेमला फेपिन कितुप पेला यरूशलेम चाकी जैतुन पम्‍दोकला वोतुप बेथफागे ताङ बेथानिया युलला लेप्‍सुङ। तमा येशूकी खोरो लोमा मिरा ङ्‍यीला दुक सुङ्‍नी ताङ्‍सुङ, 2 “ख्‍यिराङ ते फो वोतुप युलला ग्‍युक। ते शुसिमा सी साङ माशेन्‍दुप पुङ्‍गोक तिवु यी तानी वोतुप ख्‍यिरा थोङ्‍गितो। तीला पि ताङ्‍नी दे दा शोक। 3 दोजो मी ललाइकी ख्‍यिराङला ‘च्‍यिला दुक क्‍यावु यिन?’ सिनी टिसिन ‘दी ति चोवोला गोकिवी। खोकी शार्क्येक छुर लोङ तोङ्‍गिवी।’ सिनी ख्‍यिरा सी।”

4 तमा तिवा गल्‍नी ल्‍हासालेन्‍सिन पुङ्‍गोक तिवु ति लामकी गारीला वोतुप खाङ्‍बा यीकी गे चाला तानी वोतुप थोङ्‍सुङ, तमा तिवी तीला पि ताङ्‍सुङ। 5 ती पेला ते लानी वोतुप मीतिवी पर्ला ललाइकी तिवाला “ख्‍यिरा च्‍यिला दी पुङ्‍गोक तिवु ति पि तङ्‍गुप यिन?” सिनी टिसुङ। 6 तमा लोमातिवी येशूकी खोप्‍राङला सुङ्‍गुप दोके सिक्‍यासिमा मीतिवी तिवाला पुङ्‍गोक तिवु ति दानी डो च्‍यिसुङ। 7 लोमातिवी ती पुङ्‍गोक तिवु ति येशूकी चाला टि वानी खोप्‍रे मज्‍या ती पुङ्‍गोक खला तिङ्‍सिमा येशू तीकी खला शेन्‍सुङ। 8 ती पेला मी मङ्‍मी खोप्‍रे मज्‍या लामला तिङ्‍सुङ, तमा ललाइकी दिङ्‍मा नेसुर दोङ्‍बी येल्‍कातिवा च्‍येन वानी लामला तिङ्‍सुङ। 9 येशूकी गोमाला डोपतिवा ताङ खोकी तिङ्‍ला तिङ्‍योकुपतिवी दुक सिनी थोर ग्‍यकिन सिरा सिक्‍यासुङ,

11 तमा येशू यरूशलेमला फेप्‍नी यहूदी ल्‍हङाङ नाङ्‍ला शुसुङ, तमा खोकी ल्‍हङाङ नाङ्‍ला फला छुला तेरी ल्‍हासुङ। यिने नाम ल्होवु छलुप तप्‍की खो लोमा च्‍यिङ्‍ङी ताङ मुला बेथानिया युलला फेप्‍सुङ।

12 ती सला तीला येशू ताङ खोकी लोमातिवा बेथानिया नेसुर लोक्‍नी फेपुप पेला खोला ल्‍होवा लानोक। 13 तमा खोकी फेचेक ग्‍यक्‍ला लोमा मङ्‍मु वोतुप अन्‍जीर दोङ्‍बुला थोङ्‍नी तीला डेलु वोते नोनी ती दोङ्‍बी चाला फेप्‍नी ल्‍हासालेन्‍सिन तीला लोमा मिसिन यम्‍बा काङ साङ मिन्‍दुक। च्‍यिलासिसिन ती पेला ति अन्‍जीर दोङ्‍बुला डेलु गोरुप पेला मालेप्‍नोक। 14 येशूकी ती दोङ्‍बुला “तफेन्‍ला ख्‍युरुङ नेसुर डेलु मोगोर्सिता।” सिनी सुङ्‍सुङ। खोकी तुक सुङ्‍गुप ति लोमातिवी थोनोक।

15 ती ज्युक्‍ला खोतिवा यरूशलेमला फेप्‍सुङ। तमा येशू यहूदी ल्‍हङाङला शुनी ते ल्‍हङाङकी लेङाङ खला छोङ कितुप ताङ ङ्‍योप्‍चे ग्‍यकुप मीतिवा तेरीला पाङ्‍ला तेन ताङ्‍सुङ। तमा टङ्‍गा ज्‍येपतिवी च्‍योक्‍चीतिवा ताङ बुर्केन चोङ्‍गुपतिवी देतुप तेक्‍पातिवा आलोक ग्‍यप्‍सुङ। 16 लोङ खोकी मी सुला साङ यहूदी ल्‍हङाङकी लेङाङ ख नेमा छोङ कितुप च्‍यालकतिवा खुन डोप ताङ खुर वुङ्‍गुप कि माच्‍यी। 17 ती ज्‍युक्‍ला खोकी मीतिवाला येन्‍देन लोपिन सिरा दुक सुङ्‍सुङ,

18 ती ताम्‍ङे थोनी कोङ्‍यार छ्‍येतिवा ताङ यहूदी छ्‍योकी गेकेनतिवी चुक क्‍यानी खोला सेतुप सिनी च्‍यु छाल्‍सुङ। तिवा खोला ज्‍यिवा किनोक, च्‍यिलासिसिन मी मङ्‍मु खोकी येन्‍देनला हलेवा क्‍यासुङ। 19 नाम र्‍होसिमा खोतिवा ती ग्‍येसा नेसुर थेन्‍नी फेप्‍सुङ।

20 ती सला टोपला टेताङ खोतिवा फेपिन कितुप पेला ती अन्‍जीरकी दोङ्‍बु ति मार नेज्‍युन तेरी कम्‍बुप ति तिवी थोङ्‍सुङ। 21 तमा येशूकी ती दोङ्‍बुला सुङ्‍गुप ताम्‍ङे ति पत्रुसकी टेन्‍नी येशूला “गेकेन, ल्हो ताङ! दी गेकेनकी मोताप तपुप अन्‍जीरकी दोङ्‍बु याङ शिनोक।” सिनी सिक्‍यासुङ। 22 तमा येशूकी लोमातिवाला सुङ्‍सुङ, “कोन्‍छ्‍योकला तेपा की। 23 ङ ख्‍यिराङला टेङ्‍बो सिरिन। दोजो ख्‍यिरा दी रीला ‘ख्‍युरुङ पोक्‍नी ग्‍येम्‍छो नाङ्‍ला लुम्‍शी।’ सिवी, तमा नाम्‍दोक माक्‍यानी खोरो सिक्‍यावु दोके च्‍युङ्‍गिवी सिनी तेपा क्‍यासिन तुकै राङ च्‍युङ्‍गिवी। 24 तुक क्‍यानी ङ ख्‍यिराङला सिरिन, ख्‍यिरा मोपोर क्‍यानी काङ लङ्‍सिनाङ ती ति ख्‍यिराङला ङ्‍येन वे सिनी तेपा की, तुक क्‍यासिन ती ति ख्‍यिराङला थोप्‍किवी। 25 येलुङ ख्‍यिराङ मोपोर कितुप पेला मी ललाइला ङ्‍यिर्मु लान वोतुप ताम्‍ङे वोसिन तीला माफ बिन। तुक क्‍यासिन देवाच्‍येनला ज्‍यु वोतुप ख्‍यिरा पपा कोन्‍छ्‍योककी साङ ख्‍यिरा क्‍यावु दिक्‍पातिवाला माफ नङ्‍गिवी। 26 (यिने मी यम्‍बाला माफ माबिन्‍सिन देवाच्‍येनला ज्‍यु वोतुप ख्‍यिरा पपा कोन्‍छ्‍योककी साङ ख्‍यिरा क्‍यावु दिक्‍पातिवा माफ मनङ्‍गिवी।)”* ११:२६ ती पदकी ताम्‍ङे ति ललइ ग्रीक बाइबलला मे।

27 येलुङ येशू ताङ लोमातिवा यरूशलेमला फेप्‍सुङ। येशू यहूदी ल्‍हङाङ नाङ्‍ला फार छुर युकिन वोतुप पेला कोङ्‍यार छ्‍येतिवा ताङ यहूदी छ्‍योकी गेकेनतिवा ताङ यहूदी गोमा कितुप छ्‍येतिवा खोकी चाला वानी, 28 “ख्‍युरुङला कनी नेसुर ओङ्‍ज्‍येन ङ्‍येनी दी लाका कियी वे? दी लाका कितुप ओङ्‍ज्‍येन ति सी ख्‍युरुङला बिन्‍सुङ?” सिनी टिसुङ। 29 तमा येशूकी तिवाला सुङ्‍सुङ, “ङ साङ ख्‍यिराङला ताम्‍ङे यी टेयिन, ङला टिलेन नाङ। तमा ङे चुका ओङ्‍ज्‍येन नेमा दी लाका कियी वे, ती ति ख्‍यिराङला सिरिन। 30 यूहन्‍नाकी बप्‍तिस्‍मा तेरुप ओङ्‍ज्‍येन ति देवाच्‍येन नेमा वावु यिनाङ की, मी नेमा वावु यिन? ङला टिलेन नाङ।” 31 ती थोनी तिवा खोप्‍रे पर्ला केवुल कियी सिरा “दोजो ‘देवाच्‍येन नेमा वावु यिन।’ सिक्‍यासिन ‘ख्‍यिरा च्‍यिला तीला तेपा माक्‍या।’ सिनी सिवी। 32 यिने ‘मी नेमा वावु यिन।’ सिनी चुक क्यानी सिरुप्‍जा?” सिनी सिक्‍यासुङ। तिवा मी मङ्‍मुला ज्‍यिवा लानोक, च्‍यिलासिसिन तेरी मीतिवी यूहन्‍नाला कोन्‍छ्‍योककी लुङ्‍तेम्‍बा यिन सिनी तेन्‍गिनोक। 33 तुक क्‍यानी तिवी येशूला “ङ्‍यिराङला याङ छ्‍या राङ मे।” सिनी सिक्‍यासुङ। तमा येशूकी तिवाला सुङ्‍सुङ, “तुकै यिन्‍सिन ङ साङ सी ओङ्‍ज्‍येन नेमा दी लाका कियी वे सिनी ख्‍यिराङला मिसिर।”