1 Kukue komfo etsyi mi bafokanɔfɔ eto ditsyukpa eto uninǝ ɔflɔ kutǝ fǝ usio wǝ Onanto dílǝkǝ útǝ wǝ ǝsuǝ ku wǝ bebi ba maala tinti. Enni mɔ maate laala mi, bomu ku mba tã nyi ɔnukualɛ eto ditiki nǝmǝ laala mi sitinti. 2 Itsyise ɔnukualɛ eto ditiki nǝmǝ eyi bo lǝ ǝsuǝ nya diɔkɛ lǝ bo isu ese manlo.

3 Boanto Onanto ǝmǝ ku Yesu Kristo, Anto eto Ubi ǝmǝ lǝ bǝnǝ bo kafo nya lǝ bǝnyǝ bo kaminsǝ, bǝtǝ bo diyuǝ, bo mba laala bo bǝtsyuǝ lǝ ɔnukualɛ nǝmǝ ǝsuǝ.

4 Iyifo mɛ disuǝyuǝ tinti se mínyǝ miǝ fǝ bebi bǝtsyuǝ si nkpǝ lǝ ɔnukualɛ ǝmǝ ǝsuǝ fe kase Anto ǝmǝ lɛtɔ utsyiko bo ɔflɔ. 5 Mmǝ eso minlɛ kukue komfo bɔwɔni katsyese mi, Ambe Ububutidi, bǝ bola bǝtsyuǝ. Nyamfo enni kɔfi fɔfɔ minlɛ bɔwɔni kǝtǝ mi, bomu iyifo kɔfi ko bófo itsyi taa kasɔ ketsyikokɔ ke. 6 Lelabi eto asa nnya minlɛ mi bɔtɛyi ni nkǝ ele bǝ buyifo lǝ Onanto eto kɔfi ǝsuǝ. Nya kɔfi komfo, fe kase mimblɛ kenke lɛnɔ idu taa kasɔ ketsyikokɔ ni bǝnkǝ, mimblɛ siǝ lelabi ǝsuǝ ku mi bǝtsyuǝ.

7 Betidi ba laawɛ betidi kpǝ ébɔbɔ batsyilama kawunsiǝ. Mǝ ni betidi ba laatɛyi bǝnkǝ Yesu Kristo mǝmbǝ kawunsiǝ mfo fe utidinini seka. Nwǝ laawɛ betidi ǝmǝ, eyifo Kristo eto olo. 8 Nyaso bebe mi ǝsuǝ kukɔnɔ bǝ nnya bekplatsya bɛnlɛ kusu bobe kǝtǝǝ, manya, bomu bǝ lǝ binyǝ nnya kayofofo ka lɛflɔ.

9 Utsyuǝ saa ke dímanlɛ Kristo eto asatete nyamǝ lǝ kɔni bomu óté asa bambaa, Onanto ensiko wǝ. Fɛɛ utsyuǝ saa ke lɛlɛ Kristo eto asatete lǝ kɔni, Anto ǝmǝ ku Ubi ǝmǝ tsya si ko wǝ. 10 Nyamfo esoo, lǝ utsyuǝ ǝbǝ mi ɔflɔ nya ɔnnlɛ asateete nyamfo lǝ kɔnii, biamfo wǝ lǝ mi ayo, nya biǝntǝ wǝ diyuǝ eto edufǝ. 11 Itsyise utsyuǝ saa wǝ loofo wǝ utǝ wǝ diyuǝ eto edufǝǝ, éyifo ani ku wǝ lǝ wǝ asa buayifoyifo ǝsuǝ.

12 Nkpe asa kpe nya ele bǝ ntɛyi mi, fɛɛ manla miǝ lǝ nwɔni nya lǝ kukue ǝsuǝ ntsyese mi. Bomu nlɛ kusu bɔbɛbɛ bǝ lǝ mbǝ mi ɔflɔ lǝ budi etiki ǝnǝmi ku ǝnǝmi butǝ bǝtsyuǝ bǝ lǝ bo disuǝyuǝ nǝmǝ lǝ lɛflɔ.

13 Fǝ ɔyimisio wǝ tsya Onanto dílǝkǝ eto bebi bǝ bǝǝsiǝsǝ fǝ kukɔnɔ.