1 Betidi ba kenke lefo banɔ bǝ Yesu ni Nwǝ Onanto Lékpo Ɔhile Utsyǝǝ, eyifo Onanto eto bebi. Nya utsyuǝ saa ke laala antoo, ala wǝ ubi tsya. 2 Nyaso lǝ boala Onanto nya boeyifo lǝ wǝ afi ǝsuǝǝ, eté bo boǝ boala Onanto eto bebi tsya. 3 Lǝ buyifo lǝ Onanto eto afi ǝsuǝǝ, ete bǝ boala wǝ. Onanto eto afi ǝsuǝ buyifoo, enni lesa nǝ nso ale bɔkɛ. 4 Itsyise utsyuǝ saa wǝ ni Onanto eto ubi, ǝtǝkǝ kawunsiǝ kamfo kato. Nya boafo nyamfo buyifo ɛyɛ lǝ bofokanɔ ǝsuǝ. 5 Nya owoe loofo kawunsiǝ kato butǝkǝ? Nwǝ hã te léfo ɔnɔ́ nkǝ Yesu ni Onanto eto ubi.

6 Yesu Kristo ni utidi wǝ díbǝ kawunsiǝ lǝ ntu ku kɔtɔ ǝsuǝ, nya ntu ɛyɛ lǝ ntuflǝsǝflǝsǝ eto lekpa ǝsuǝ ku kɔtɔ ɛyɛ lǝ wǝ ukpe ǝsuǝ. Wǝǝmbǝ lǝ ntu mate ǝsuǝ, bomu lǝ ntu ku kɔtɔ ǝsuǝ. Nya Lɛwɔnɔ Kɛnkɛ kosate lɛ adansiɛ budi kate nkǝ nyamfo eyifo sitinti, itsyise Lɛwɔnɔ nǝmǝ eyifo ɔnukualɛ. 7 Badansiɛ itsyǝ nkpe. 8 Mǝ ni Lɛwɔnɔ nǝmǝ, ntu bomǝ ku kɔtɔ komǝ. Nya mǝ itsyǝ bamǝ lɛ adansiɛ ani budi. 9 Bofo utidi eto adansiɛ bɔnɔ, fɛɛ Onanto eto adansiɛ kpé kɛnyɛale kaso, nya wǝ dídi adansiɛ nyamfo itsyi lǝ wǝ Ubi ǝsuǝ. 10 Nyaso utidi wǝ ke lefo Onanto eto Ubi ɔnɔɔ, waafo asa nnya Onanto lɛtɛyi itsyi lǝ wǝ Ubi ǝsuǝ ɔnɔ. Fɛɛ utidi wǝ ke dímamfo Onanto ɔ́nɔɔ, ǝǝnyǝ Onanto fe odia etsyise wámfo sedansiɛ sia údi lǝ wǝ Ubi ǝsuǝ ɔ́nɔ 11 Nnya ɔ́tɛyi ni nkǝ, útǝ bo nkpǝ bo lǝmbǝ kalosǝkɔ ɛyɛ lǝ wǝ Ubi ǝsuǝ. 12 Utsyuǝ saa wǝ léfo Onanto eto Ubi ɔ́nɔ, nkpǝ bomfo éboka mi kɔni nkoko. Fɛɛ utsyuǝ saa wǝ dímamfo Ubi ǝmǝ ɔ́nɔɔ, embǝ nkpǝ bomfo.

13 Nlɛ kukue komfo bɔwɔnɔ kǝtǝ mimba léfo Onanto eto Ubi ǝmǝ bɛnɔ lǝ bete biǝ nkpǝ manlo éboka mi kɔni. 14 Boakpé utu, kefi ǝnǝ kǝtǝkǝ lǝ Onantoo ǝsuǝ boǝ lǝ bɔtɔ wǝ lesaatsyuǝ ɛyɛ lǝ wǝ lelabi ǝsuǝǝ, woanɔ nnya. 15 Waanɔ lefe nǝ ke bɔtɔ wǝ asa, nya se bunyi nko esoo, buyi tsya boǝ wǝǝtǝ bo lesa nǝ bɔtɔ wǝ.

16 Lǝ utsyuǝ ǝnyǝ wǝ ɔyimitsyuǝ ɔnlɛ lebua ditsyue nǝ lǝǝnnǝ ukpe kaboko buyifoo, ele bǝ oto ola utǝ Onanto wǝ luutǝ wǝ nkpǝ. Mba leeyifo lebua nǝ lǝǝnnǝ ukpe kaboko eto etiki ni nyamfo nɛ. Fɛɛ lebua ditsyuǝ kpe nǝ lǝǝnǝ ukpe kaboko. Inni lebua nǝmfo eto okle eto disi minlɛ miǝ bato ola. 17 Lesa saa nǝ lanyɛ lǝ kusu ǝsuǝ buyifo eyifo lebua, fɛɛ abua ǝtsyuǝ kpé nya lǝǝnnǝ utidi kakpe lǝ ukpe ǝsuǝ.

18 Buyi boǝ utsyuǝ saa ke ni Onanto eto ubii, enyifo lebua, itsyise Onanto eto Ubi ǝmǝ aabe wǝ, nya obuale ǝmǝ amfo wǝ kabua saa buyifo.

19 Buyi boǝ Onanto eto bale buni, fɛɛ kawunsiǝ kenke kpé lǝ obuale ǝmǝ eto ǝsuǝale kalɔ. 20 Buyi boǝ Onanto eto Ubi ǝbǝ, nya útǝ bɔ́nɔ asa kasɔ nya lǝ bote Onanto tinti ǝmǝ. Busi nkpǝ lǝ lɔniyifoyifo ku wǝ ni sitinti ku wǝ Ubi Yesu Kristo. Nwǝmfo ni Onanto tinti ǝmǝ, lǝǝtǝ bo nkpǝ manlo nɛ.

21 Nyaso, mɔ bebi lala, bilǝkǝ mi ǝsuǝ bitsyiko lǝ bǝfiǝ eto keditǝtǝ ǝsuǝ.