141
Bab-Dummadse-goled ibmar-isganagi be an-onoye
David, we-namaked narmaksad.
1 Bab-Jehová, sabsuli an bese goled: ¡Gwae be an-bendakdage!
An bese gotele, be an-itoge.
2 An-bese-goledi, ina-wawadikid-nakwemaidaeyob bese nakwemai gusun.
An-argan-bese-onakwedi, sedo-ibmar-ogumakar-ukledaeyob be dake.
3 Bab-Jehová an-gwabinduku-bargaed be an-imake.
Bab-Jehová, mer ibmar-yogasaar-sunmaked be an-imake.
4 Melle an-gwage ibmar-isganagi-binsaega be imake,
dulemar-ibmar-isgana-imakbiedba melle akaed be an-imake.
Dulemar-ibmar-isgana-imaked-abargi,
melle ibagi-masgulleged-gunnega be an-imake.
5 Dule-ibmar-innikii-imaked an-bibyoye-sogele, sabsur ibmar anga sogele,
we, ibmar-nued anga imaknaid.
Dulemar-isgana-e-gwallu-wawamar, an-nonogi, mer eolegega be imako.
Bab-Dummad, mer an dule-isgana-e-ibmar-isgana-imakedgi-yolegega, an bese gornai guoed.
6 E-dummagan-negsemamaid akwasaila-birgi-gwichi gulluse barmelledmalale, agi geb itomaloed,
an-ibmar-sogsadi, napiragwad.
7 Geb sogdemaloed:
Anmar-garmar, napa-imules-argaarmaiyobi, anmar-garmar neg-uangi omiledoed.
8 Bab-Jehová-Dule-Dummad, bebi an-bendakedid.
Bendakleged beginbi an amied.
¡Melle dulemar an-oburgwed be imako!
9 Dulemar an-idu dub-nasiksamaladgi mer aimukued be an-imako.
Dule-isganamar yamo dule-yardakega-ibmar-imakmaladgi, melle yardakleged be an-imako.
10 Dule-isganamar na dukin e-sakigi-argwaned be imake.
Bab-Dummadye, be an-bendake.
Mer ese galegega be an-imako.