142
David Bab-Dummadse bendakleged-egisnaid
David we-namaked-Masquilʼye-nugad narmaksad. David akwasailayaba-dukusigu, Bab-Dummadse gornai gusad.
1 Bab-Jehováʼse ise-gollar bendakleged an egised,
Bab-Jehováʼse ise-wilegar an e-sabgued egisnaid.
2 Bab-Dummadga naibi-itodiid, an sogoed,
an-sulibinsa-itodiid, an ega sogoed.
3 Bab-Dummad, an geggus-itogele, bato be an-daksabinnedaed.
An bia nadele, abala dulemar an-yardakega, an-iduar ibmar-sisadamalad.
4 An-argan-nuedsik an atakdele, dule-an-bendaked wargwensaale gwen daklesurdaed.
Neg-dukued an sulid,
dule-wargwensaale angi binsasulid.
5 Bab-Jehová, be-an-bendakegala, an bese gochad.
An bega sogsad: “Bebi unnila an-bendaked maid.
We-napneggi dulemar-bukwad-abargi bebi unnila anga gudiid.”
6 Bab-Dummadye, an-gornaid be itoge,
an sulibinsa itoged.
An-bareginnanamaladgi be an-bendake,
ar anba bur bule gangumalad.
7 An be-nug-odummogega, wegi-an-galessiidgi be an-onodage.
Ar be-sabed be anga oyononikile, dule-inniki-gudimalad weligwar an-ebiris ambikunonimaloed.