1 !Ahi Tamer en vat ir houlu mok! Anatin, rokilea envatien onen marite mok veni vise ir en titan. !Ka anatin eli, ir rovi titan kati! Ka meatin keil ten out netan arlei kileatei keke rovi titan Ahi veni arkileatei Ahi. ✡ Sion 1:12,13; 1Sion 3:10; Sion 16:3 2 Onak eli keil, anatin keke rovi titan Ahi tuai, ka rorkilea revitei veah keke aver ilesi hemukave en avong keil koa hemai. Ka avaseini, rokilea enges keke navong Iesu Kristo hemai hekistal, ir rehelei kilea suk kei hesuval asa. Ka aver hehiles hemai hesuval aven. ✡ 2Kor 3:18; Plp 3:21 3 Ka meatin vasi koa akur desien koanik, ilei kat revi moulien one hetolas, hesuval koa moulien onen Iesu Kristo mutolas.

4 Meatin koa mules mumon tisaen mul kum vulvul mengkatien keil onen Ahi, veni vatte ten tisaen vi kumvulvulien ten mengkatien onen. ✡ Mat 7:23 5 Mikilea keke Iesu Kristo kistal valah lat tisaen keil, ka tisaen tovuol ien. ✡ Sion 1:29; 1Pit 2:24; 1Sion 2:2; 4:10; Aes 53:9; Sion 8:46; 2Kor 5:21; Hib 4:15; 7:26; 9:14; 1Pit 1:19; 2:22; 3:18 6 Sakini, meatin vasi keil koa moulien one kapil ral min Iesu Kristo, keil analtei anahikiti anoumon tisaen. Ka koakeil amules avikit tisaen, arie lati keke arkapiltei vatal Iesu ka arkileatei kei varei. ✡ Rom 6:2,14; 1Sion 3:9

7 !Kami koa misuval titak keil, minamaentei meatin etai naluvos kami! Koakeil amumon sakien koa mal, keil amal revi mok suval Iesu Kristo emun mal revi. ✡ 1Sion 2:29 8 Koakeil amules avikit tisaen, keil avi titan Temat, veni Temat mum tisa en avong mulamu rokol kosa. Ka Natin Ahi kistal ven koanik, vou rasilin tounah keil koa Temat mul mumoni. ✡ Sion 8:44

9 Meatin keil koa Ahi sakin keil avi heite hau avi titan kati, keil irmultei ihikit tisaen, veni suvalien onen Ahi mul en moulien one. Ka ven Ahi koa tisaen tovuol ien vi Tame, keil asakras aval avahikit tisaen. ✡ 1Sion 5:18 10 Rolei kilea isei vi titan Ahi vuo titan Temat en sise koa mukok: koakeil armumontei asa koa mal vuo envatien one romul entei tue keil, keil arvitei titan Ahi keil, keil avi titan Temat varei. ✡ Sion 1:12,13; 1Sion 3:1

11 Selusien koa melonge navong mikur rohtoh en demkatien onami mukok: er hehathat ir. ✡ Sion 13:34; 15:12,17; 2Sion 1:5 12 Ronasuvaltei Ken koa vi onen Temat ka mu vini tunali kati Ebel. ?Ken mu vini vensa? Veni tounah keil kei sasen mumoni romaltei, ka tounah keil koa tunali mumoni mal. ✡ Sen 4:8

13 Sakini, tuak keil, navong meatin keil ten out netan tine kat kami, minatimanintei eni. ✡ Sion 15:18,19; 17:14 14 Rokilea keke ir romaluv ran keihoen ten matien ka romul tuai en moulien koa ten lisenges. Rokilea en koanik veni envatien orer mul en tuer keil. Koakeil envatien tovuol amul veah en keihoen ten matien. ✡ Sion 5:24; 1Sion 2:11 15 Koakeil tine kat tue keil vuo ahine keil, en meten Ahi suval keil avou vini keil tuai. Ka mikilea tuai keke moulien ten lisenges romultei en koakeil amu vini meatin. ✡ Mat 5:21,22; Kal 5:20-21; Rev 21:8 16 Iesu Kristo rie lat sakien ten envatien min ir mukok: kei kataun ir navong maen moulien onen vavuol vahinat ir. En sakien enek, ir emun rehekataun tuer ka ahiner keil, avaseini munak moulien orer hevuol ven keil. ✡ Sion 13:1; 15:13; Kal 2:20; 1Tim 2:6; Taet 2:14; Plp 2:17; 1Tes 2:8 17 ?Navong roles meatin sav koa tounah onen tovuol, ka ir koa tounah orer mul rorkatauntei, hemukave rokilea rovahiteni keke er vat Ahi? ✡ Dut 15:7-8 18 Titak keil, envatien orer nahiteis en selusien vuo en hiliver enges. Vuo, envatien koa vi anatin hekistal en sakien ten kataunien ka en ualien orer. ✡ Tiem 2:15-16

19 Navong rorie lat envatien en sakien ka ualien orer, rokilea keke roro en anatinien onen Ahi. Sakini, navong rovit rovamai vesesal ven Ahi, rehendem usili hetal min tomat 20 en avong vasi koa milonge keke Ahi mul lele tisa en ir ven tounah koa mimumoni romaltei. Veni rokilea keke more envatien onen Ahi marite mok mulin rendemien orer ka kei kilea en tounah vasi en moulien orer. 21 Sakini, onak eli keil, munak rehendem usil tounah keil enek, rokilea rovahati ir keke rehermetautei en meten Ahi. 22 Mukonek, rokilea keke rehekur tounah koa rovisi rani, veni romul rolong kat mengkatien keil onen ka romumon asa koa kei si veni. ✡ Mat 21:22; Mak 11:24; Sion 14:13; 15:7; 16:23-24

23 Ka koanik mengkatien onen: ir reheling demkatien orer en Natnali, Iesu Kristo; ka er hehathat ir, suval koa Iesu Kristo meng kat ir eni. ✡ Sion 6:29; 13:34; 15:12,17 24 Koakeil along kat mengkatien keil onen Ahi, keil akapil ral min Ahi ka kei mun mul kapil ral min keil. Ka rokilea keke Ahi mul kapil ral min ir navong Ninin Votut koa kei sani mul en ir.✡ Rom 8:9; 1Sion 4:13