1 Txajũ' Agripa' na'wẽk Pablo's we'we:

—Idx kĩh yũuna fxi'zeçxawa mpeeta'sx jĩte', Pablo' kuse's kiisçxa na'wẽk pta'sx:

2 —Judiuwe'sxa' adxa's ewmeesa' jĩnatx pãatxhĩ'khe' txã'sa' jxkaahsa Agripa iidx dxi'pte ãate pta'sxwa'ja's ji'phuçxa' wala weçxa'th. 3 Idxa' jxuka ew jiig kwe'sx judiu ji'j fxi'zeni vxite' na'wẽ fxiyfxiyçxah yajkxçxa puutx we'we'tha'w txã'sna. Txãasa wejx wa'lmée mwẽese'j.

4 Adx le'çxkuẽjũjx ma'wẽne'tka fxi'ze adx kiwete vxite' Jerusalente txã'sa' judiuwe'sx jxukaysa jiita'. 5 Fxariseowe'sxa' seena' juuna' jxkaaja'tx Dxus leya's jxuka kxtey yuukahn adxa' txãatewe'sxthu yu' piçtakxtey, aça' txãawe'sxa' jiita' na' txã'sa' pta'sxya' ãjatxna wa'lmeeçxa yu'. 6 Dxusa' kwe'sx yaçgawe'sx yakh puutx we'weçxa uusaawe'sxtxi ki' ĩtxĩ vxit-ya' neeyũuk txã'sa' kxtey yuuna sũhnath fxi'ze', naa pa'ga yuuçxáatx paapẽjxya' ayte nuypa'j. 7 Jxkaahsa Agripa mjiyu: Israelwe'sx docesate ji'j jxukaysatx ki' ĩtxi yuuwa'ja's ũythasu', txãasatx een isa petx kus Dxusa's selpi'. Txã'wẽ yũuwa'ja's ũythaspa'ga yuuçxáatx judiuwe'sx adxa's ewmeesa' jĩçxa açe'. 8 Dxusa' txã'wẽ uusaawe'sxtxi ĩtxi vxituna ¿sũju'çmeekwe' wakx i'kwe'sxwa?

9 Adxa' nyafxíia' Jesus Nasarethuwe'sxa's ahçeçxa kĩhwa yu'nja sũhçxa, 10 Jerusalente sacerdote npiiçthẽ'jwe'sx jxkaathe', Jesus kaapiya'jni's nwẽese'jsawe'sx maazkuẽesatxwa karcelte txahth. Sa' ikheçte uyçxa', ew yuh yuuçta' sũhnath fxi'ze'. 11 Maazkuẽe uswa iipkxuuth, Jesus yase's açewe'wekahn. Msuuwa judiuwe'sx pkhaakheni yat-su txã'wẽçxaçxáath yuu. Sa' seena' pxũuskwe yuute', vxite kiwesuwa u'th, txã'wẽy ahçeçxa pkxuuya'.

12 Txã'wẽ yũuya' sũhçxa, Damasko dxi'j u'jweçthu yu', sacerdote npiiçthẽ'jwe'sx kaahni. 13 Nawa jxkaahsa mwẽese'j: dxi'the u'jweçte ẽepxãh yuuçpkaçxha', sekte jxthaakwe eena'sa ẽejũ kweethku adx vxite' pi'kxna yuusáa jxukaysatx. 14 Txajũ' jxukaysa wetetha'w, naapkaçxha' adxa' wẽse'th hebreo yuweju na'wẽ we'weni's: Saulo, Saulo, ¿kĩjxa'ga adxa's ahçeçxa pkxuuya' pakwé'? Idxa' peekíiçxáa ya'kpã'yuuwa'ja's pakwena ũsgu jĩte', 15 pẽjxthu: ¿Idxa' kimga? jĩte', pta'sxku: Adxa' Jesusthu, idx na'wẽ ahçeçxa pkxuuya' pakwe'g txãath. 16 Nawa ãçxha' mkiite. Ãçxh na'wẽ vxyaath sa' vxite entewa vxya'nja, aça' txã'wẽk vxyaa jĩna mteewa pta'sxya' u'jwene'ga adxna selpiina. 17 Idxa's nwe'we'nja judiuwe'sx kuseju, sa' judiu ji'jmée vxite nasa kiwesu kajaçthu kxsũwa nwe'we'nja. 18 Txãawe'sx tasxsu kajaçthu, aça' idxa' txãawe'sx yafxtxi phaadene'ga, peena yu' çxhi'dxte fxi'zemée eena'sa's uykahn, sa' eçxthẽ'j kusete fxi'zemée Dxus yakh fxi'zekahn. Adxa's jxpa'gasa' txãawe'sx pkaltxi peltunãyni neeyũuçxa cielute ũswa'ja's jxpa'gatxna Dxus txhitxhnisawe'sx yakh ja'daçxah jĩk adxa's.

19 Agripa, idxa'sthu pta'sxi': Txã'wẽ vxyaaçxa we'weni's wa'lmée kxtey nwẽese'jçxa 20 Damaskote ũssawe'sx khuẽ'ytxi pta'sxthu Dxus yuwe's, e'su' Jerusalente, vxite' Judea kiwesu jxuka. Sa' judiu ji'jmée vxite nasatxwa pi'kxthu, pkaltxi nvxihtçxa Dxusa's pakweçxa ew yũuna mfxi'zewe jĩna. 21 Txã'wẽ yũupa'gatx judiuwe'sxa' dxuus yatte adxa's tudçxa ikh wẽe. 22 Nawa Dxus pu'çxte', ãçxpkaçx Dxus yuwe's le'çxkwe yuhwa jxpubameeth pta'sxna fxi'ze' jxtuhthesa ma'tx yuu ma'wẽsatxwa jxukaysatx. Sa' Dxus yuwe pta'sxsawe'sx vxite' Moises pta'sxni txãaju bagaçxte yuhwa fxiy yu' pta'sxi'çmeeth. 23 Txãawe'sxa' na'wẽtx pta'sx: Dxus tasxuh yuusa Kristo' wala pxthaa yuuçxa uuçxawa ki' txãa khuẽ'y ĩtxĩ yuuna, sa' eena'te fxi'zewa'ja's pta'sxina kwe'sx ji'jtx txã'wẽy vxite kiweju nasatxwa jĩnatx pta'sx. Txã'wẽyçxáath adxwa pta'sxi'.

24 Pablo txã'wẽ we'wete', Fxesto' na'jĩnak sus we'we:

—Pablo, luuku yuunig. Jwee wala piyaçxane'ga txã'wẽ luuku yuu jĩte', 25 Pablo pasçxa':

—Ne'jwe'sx Fxesto idxa' mjiyu: Adxa' luukumeeçxa íith ũus yajkxçxa jxpubamée isasaçxáana pta'sxi'. 26 Txãa yuwe's jxkaahsa Agripa ayte u'pa' txãawa ew jiia'. Txãa pa'gath adxa' thaamemée pta'sxi' txajx dxi'pte. Naa yuwe' paaçte sũthçxa we'wenisame'. Txãa pa'ga jxkaahsawa txãa yuwe's ew jiina sũju'th. 27 ¿Dxus yuwe pta'sxsawe'sx we'weni's ew jiiyuhmeegá' wakx, jxkaahsa Agripa? Idxa' jiiyuhne'ga sũju'th jĩte', 28 Agripa' na'wẽk we'we:

—Adxa's Kristo ju'gu vxit-ya' le'çxkuẽeg pejíi jĩte', 29 Pablo we'weçxa':

—Le'çxkuẽe ma'k pejíi meeçxa' wala ma'k pejíi nawa idxçxáamée, ayte ãçxh wẽse'jna ũsta' txãawe'sx jxukaysatxku Kristo ju'gu yuu jxthãasu' Dxusa', adxwa ma'wẽtka Kristo ju'gu yuu txã'wẽy, nawa kadenaju tudnimée.

30 Pablo txã'wẽ we'wete', jxukaysa kiitetx, jxkaahsa, ne'jwe'sx, Berenice kxte ih pa'jsa jxuka. 31 Sa' fxiitx txuteena u'j, na'jĩna puutx we'weya' txãawe'sx pwe'sx:

—Naa piçthẽ'ja' kĩh yuhwa yuuwemeesa' ikhkahn yuuwa. Sa' karcelteçxáa yuhwa ũswa'j ji'phme' jĩçxa', 32 Agripa' na'wẽk we'we Fxesto's:

—Txã'wẽ txãaíi Cesar paapẽyni wejx ewna jĩmeewaça', naa piçthẽ'ja's txhweteya' ewna jĩk.