21
Cakupereka ca mamsiwa wakusauka
1 Ndipo Jezu akhanyang'anisisa anyakudala momwe iwo akhathusira cakupereka cawo muntsengwa ya mnyumba mwa Mulungu. 2 Na tenepo iye adawona mamsiwa wakusauka m'bodzi acithusambo m'mwemo kobiri zace ziwiri zandzaya. 3 Ndipo Jezu adalewa kuti:
“Ndiri kukuwuzani cadidi kuti mamsiwa wakusaukayu ndiye wapereka bzizinji kuposa wanthu wentse. 4 Thangwe wentsene apereka bzomwe n'bzakusala bza cuma cawo. Tsono uyu na kusauka kwace waperekeratu bzentse bzomwe akhanabzobzo.
Jezu adalewa mapfudzikidwe ya nyumba ya Mulungu
5 Ndipo ateweri wace winango akhambasimba bza mantikade yomwe nyumba ya Mulungu ikhadakondzedwera, na minyala yakudeka na bzinthu bzomwe wanthu, akhadapereka kuna Mulungu.Tsono Jezu adalewa kuti: 6 “Ninga momwe muli kowoneramu bzinthubzi, idzafika nthawe yomwe mun'dzawona lini mwala udasanjika padzulu paundzace.
Kubonera na kutsautsika
7 Ndipo Iwo adamubvundza Jezu kuti: “Misiri, kodi bzin'dzacitika lini bzimwebzo? Kodi n'cizindikiro canyi comwe tin'dzawona bzikadzakhala bzin'funa kucitika? 8 Na tenepo iye adawatawira kuti: “Cenjerani kuti muleke kunamizidwa na wanthu. Thangwe azinji an'dzabwera mudzina langu acimbadzalewa kuti:
“Ine-pano ndine omweyo caiye-iye. Ayai kuti: “Yafika kale nthawe”. Tsono lekani kudzawabvera. 9 Ndipo mukadzabva kuti kuna nkhondo na masandulikidwe ya bzinthu, lekani kudzabva mantha. Thangwe bzin'funika kuti bzicitike bzimwezo. Tsono kumala kwa dziko kundzakhaliratu lini panthawe imweyo.
10 Na tenepo iye adawawuza pomwe kuti: “Dziko na Dziko yan'dzapindukirana, umambo na umambo bun'dzapindukiranambo. 11 Pantsi pan'dzatekenyeka, ndipo kun'dzawoneka nthenda, njala mu mbuto zakusiyana-siyana, na malengwa yanango. Ndipo kun'dzawoneka bzinthu bzinango bzakupasa mantha kwene-kwene na bzizindikiro bzinango bzikulu bzakudzulu. 12 Bzikanati kucitika bzinthu bzentsenebzi iwo an'dzakumangani, an'dzakulondani acidzakuperekani m'manyumba zakupembera, an'dzakuperekani pomwe kuna azimambo na kuna atongi na thangwe ra dzina langu. 13 Ndipo bzimwebzo bzin'dzakucitirani kuti imwepo mudzakhale mboni. 14 Na tenepo kondzekerani nthaweyo ikanati kufika. Ndipo lekani kudzakahala na thupo kuti mun'dzatawira ciani. 15 Nakuti Ine-pano nin'dzakupasani ndzeru na mafala yakudzalewa-lewa ndipo iwo an'dzakwanisa lini kutawira ayai kukugazani cinthu. 16 Ndipo imwepo mun'dzaperekedwa na azibabanu, na abale wanu na anantsi na azixamwali wanu. Ndipo iwo an'dzakuphani winangomwe. 17 Ndipo wanthu wentse an'dzakuwengani na thangwe rangu. 18 Tsono palibe tsisi na libodziro lomwe lin'dzadoda mumsolo mwanumu. 19 Na tenepo limbikirani kuti mudzapulumusiridwe moyo wanu.
Jezu adalewa bza mapfudzikiro ya Jeruzalema
20 Ndipo imwepo mukadzawona Jeruzalema wapaniriridwa na nthithi wa acikunda, dzadziweni kuti nthawe yafika yakupfudzidwa kwace. 21 Na tenepo wanthu omwe an'dzakhala ali muJudeya mbadzathawire m'mapiri. Ndipo wale omwe an'dzakhala ali mumzindamo mba'dzacoke. Na wale omwe an'dzakhalambo ali m'minda mbaadzaleke kupita mumzindamo. 22 Thangwe ntsiku zimwezo zin'dzakhala za nyathwa, kuti bzidzatewekeze bzentse bzomwe bzidanembedwa. 23 Tsisi kuna akazi anyamimba ayai an'dzakhala ali kumamisa pantsiku zimwezo! Thangwe pantsi pano pan'dzawoneka matsautso makulu kwene-kwene, na ciya cikulu kuna wanthu omwewo. 24 Ndipo wanthu azinji an'dzagwatidwa makhosi na mbadzo, winango adzayesedwa akapolo kumadziko yanango. Ndipo Jeruzalema un'dzapondedwa na wanthu anyakunja, mpaka kudzakwana nthawe yawo.
Kubwera kwa Mwana wa Munthu
25 Ndipo kun'dzawoneka bzizindikiro kudzuwa, kumwezi, na kunyenyezi. Ndipo pantsi pano, madziko yentse ya pantsi yan'dzadandaula na mantha thangwe ra kuunga kwa madzi ya nyandza na maimbi yace. 26 Na tenepo wanthu an'dzafumphira na mantha na nkhumbukira ya bzinthu bzomwe bzindzawoneka padziko la pantsibzo. Thangwe mphambvu zentse zakudzulu zin'dzagwededzeka. 27 Pamwepo ndipo pan'dzawoneka Mwana wa Munthu ali kubwera mumtambo, na mphambvu na mbiri ya Mulungu. 28 Ndipo bzingadzacitika bzinthu bzintsenebzi dzalamukeni mucidzakondzekera. Nakuti cipulumuso cakufikirani.
Kutsikira matere mtowe
29 Ndipo Jezu adawatsikira matere aciti: “Nyang'anani mtowe na miti yentse. 30 Nakuti ikayamba kufundira masamba mumbadziwa kuti maindza yafika. 31 Na tenepo mukadzawonambo bzinthu bzimwebzi bzicicitika dzadziweni kuti umambo bwa Mulungu bwafika. 32 Ndiri kukuuzani cadidi kuti mtundu omweyu wa wanthu un'dzamala lini uko bzimwebzi bzikanati kucitaka. 33 Pantsi na kudzulu bzin'dzamala. Tsono mafala yanguya yan'dzamala lini.
Jezu adacenjeza ateweri wace kuti afungule maso
34 Ndipo iye adawauza kuti: “Cenjerani, kuti mitima yanu ireke kudzongeka na kumwa, na nkhumbukira za makhalidwe ya pantsi pano. Kuti ikadzafika ntsiku imweyo mudzasaye kudzidzimuka, ninga kugwa kwa diwa. 35 Nakuti iyo in'dzabwerera wanthu wentse wa dziko la pantsi. 36 Na tenepo fungulani maso, mucimbapemba ntsiku zentse kuti mudzasaye kugwedwa na bzinthu bzimwebzi bzikadzacitika. Ndipo mukhale mudakondzeka kuna Mwana wa Munthu. 37 Ndipo Jezu akhambapfundzisa ntsiku zentse m'nyumba ya Mulungu. Pomwe kukhambadoka iye akhakwira mphiri la Olivera. 38 Ndipo wanthu wentse macibece-bece akhabwera m'nyumba ya Mulungu kuti adzamubve.