22
Mpangano kuti aphe Jezu
1 Pomwe idafika nthawe ya cikondweso ca mikate, comwe cikhacemeredwa Paxikwa. 2 Ndipo akulu-akulu wa azibaba wa ntsembe na apfundzisi wa mtemo adanyan'gana njira kuti aphe Jezu. Tsono iwo akhana mantha na wanthu.
Judasi adapindukira Jezu
3 Ndipo Sathan adagwanira Judasi omwe akhacemeredwa Xikalioti. Iye akhali m'bodzi wa ateweri wace khumi na awiri. 4 Ndipo iye adayenda kukapangana na akuku-akulu wa azibaba wa ntsembe na atsogoleri wa acikunda anyakulindira nyumba ya Mulungu, kuti apereke Jezu. 5 Na tenepo iwo adakomedwa nabzo kwene-kwene. Ndipo adabverana naye kuti an'dzamupasa kobiri. 6 Napo ndiyembo adabvuma. Ndipo iye akhanyang'ana m'mpata kuti am'pereke, wanthu wentse acisaya kudziwa.
Ateweri wa Jezu adakondzekera cikondweso ca Paxikwa
7 Idadzafika nthawe ya cikondweso ca Mikate. Ndipo ntsiku imweyo bzikhafunika kuti kuphedwe kabira kakuikhira nako ntsembe ya Paxikwa. 8 Ndipo Jezu adatuma Pedru na Juwau aciwauza kuti:
Ndokoni mukondze cikondweso ca Paxikwa, kuti tidzadye. 9 Ndipo iwo adamubvundza kuti: “Kodi mun'funa kuti tikakondzere kuponi?” 10 Ndipo Jezu adawatawira aciti: “Mukafika mumzindamo mun'kaona munthu adasendza tacu ya madzi. Mukamutewere mpaka panyumba yomwe an'kapitayo. 11 Ndipo mukamuwuze mwenekaciro nyumbayo kuti Misiri atituma kuti tidzabvundze kuti: “Kodi iri kuponi nyumba ya alendo yomwe iwo na ateweri wao an'funa kudzadyera cikondweso ca Paxikwa?” 12 Ndipo iye an'kakulatizani nyumba ikulu ya m'ndzulu yomwe ina bzombo bzentse, imwepo mukakondzere mwemo. 13 Pomwe iwo adayenda adakawona bzentse ninga momwe iye adawawuzira. Ndipo iwo adakakondza cikondweso ca Paxikwayo.
Cilaliro ca Mbuya cakumalizira
14 Pomwe nthawe idakwana, Jezu adakhala patsantsali lakudyera pabodzi na atumiki wace. 15 Ndipo iye adawawuza kuti:
Ndikhafuna kale kuti ndidyenamwe pabodzi Paxikwai, pomwe ndikanati kuyamba kubonera. 16 Na tenepo ndirikukuwuzani cadidi kuti:
Nin'dzaidya lini pomwe, mpaka cikadzacitika cire caico ca mu Umambo bwa Mulungu. 17 Ndipo adatenga m'kombo aciwusimba aciti: “Tambirani mumwe pabobzi.” 18 Na tenepo ndirikukuwuzisai kuti ndinidzamwa lini pomwe msuzi wa uva, mpaka kufika kwa umambo bwa Mulungu. 19 Ndipo iye adatenga pomwe mkate aciwusimba, adaubedula aciti: “Iri ni thupi rangu lomwe ndakupasaniri. Mbacitani bzimwebzi mucimbandikumbukira. 20 Pomwe adamala kudya adacita pomwe bzibodzibodzibzo ndipo adatenga mkombo acilewa kuti:
M'komboyu ngwa ciphatano cipsa ca mulopa wangu omwe wataikira imwepo.” 21 Tsono dziwani kuti nyakundipindukira ndidakhala naye pabodzi patsantsali lakudyera pano. 22 Nakuti Mwana wa Munthu aniyenda kukafa cadidi ninga momwe bzidalewedwa. Tsono tsoka kuna munthu nyakumupindukirayo. 23 Pamwepo iwo adayamba kumbabvundzana aciti: “Kodi mbani wa ife-pano omwe an'funa kumupindukirayo?” .
Ateweri wa Jezu akhaganizana kuti mkulu mbani pakati pawo
24 Ndipo ateweri wace adayamba kuganizana kuti mkulu mbani pakati pawo. 25 Tsono Jezu adawawuza kuti: Azimambo wa wanthu ana mpambvu zakuwatonga. Ndipo iwo ambafuna kuyesedwa wanthu wabwino. 26 Tsono kuna imwepo mbabzileke kukhala tenepoyo. Nkulu pakati panupa mbaakhale ninga ng'ono. Ndipo m'tsogoleri mbaakhale ninga nyakutumika. 27 Kodi mkulu mbani na munthu omwe adakhala patsantsali lakudyera na ule omwe ali kutumika? Ngule omwe adakala patsantsaliyo. Na tenepombo kuna imwepo ine-pano ndiri ninga nyakutumika. 28 Imwepo ndimwe mukhanande pakubonera kwangu kwentse. 29 Ninga momwe Baba adandipasira umambo, na inembo ndin'kupasanimbo 30 kuti mudye na kumwa pabodzi na ine patsantsali lakudyera mu umbambo bwangu. Ndipo mun'dzakhala m'mipando mucidzatonga madzindza khumi na mawiri ya kuJirayeri.
Jezu adacenjeza Pedru kuti iye an'dzamulamba
31 Simau, Simau, cenjera!
Sathani wakumbira kale kuti akuwunguleni ninga mapira! 32 Tsono ine ndakukumbirira kale kuti cikhulupiro cako cisaye kumala. Na tenepo iwepo ukadzakhumbula udzakhwimisembo abale wako. 33 Ndipo iye adatawira kuti: Mbuya, ine-pano ndidakondzekera kuti ndiyende namwe kwentse. Napo mkawoko ayai kukafa.” 34 Tsono Jezu adamutawira aciti: “Ndiri kukuwuza Pedru kuti lero iwepo un'dilamba katatu kentse uko congwe akanati kulira.
Jezu adacenjeza ateweri wace kuti akhale adakondzekera
35 Ndipo Jezu adawabvundza kuti:
“Kodi pomwe ndidakutumani mucisaya kunyamula bzikhwama, na mabudu na xango, ciripo cinthu comwe mudasaya? Ndipo adatawira kuti: “Palibe.” 36 Tsono iye adawawuza kuti: Penu munthu ana cikhwama na budu mbaanyamule, na ule omwe alibe mbadzo agulise bhachi wace kuti akagule.” 37 Nakuti bzin'funika kuti bzitewezeke kuna ine bzomwe bzidanembedwa kuti:
Iye adyesedwa kambowa. Thangwe bzentse bzomwe bzidalewedwa bziri kucitikadi. 38 Pamwepo iwo adamuwuza kuti: “Mbuya, tinazo mbadzo bziwiri izi! “Ndipo iyembo adawatawira kuti: “Zakwana.”
Jezu adakapemba mphiri la Olivera
39 Na tenepo Jezu adayenda mphiri la Olivera ninga ukhali msambo wace. Ndipo ateweri wace adayendambo naye. 40 Pomwe adafika pambutopo adawawuza aciti: “Pembani kuti musaye kupumpsidwa.” 41 Ndipo iye adafundukira pang'ono ndipo adagodama acimbapemba aciti: 42 “Baba, mukafuna cosani m'komboyu kuna ine. Sikuti na kufuna kwangu maka kwanu imwe. 43 Pamwepo adawoneka anjo wakudzulu kuti amulimbise mtima. 44 Pomwe Jezu adabva ciaya adapemba na mphambvu kwene-kwene. Ndipo iye akhacoka kaluma ninga mathotho ya mulopa uli kogoga pantsi. 45 Ndipo Jezu adalekeza kupemba aciyenda kuna ateweri wace. Pamwepo adakawaguma adagona na kusunama. 46 Ndipo iye adawabvunza kuti:
Kodi mun'goneranyi kani? Lamukani mupembe kuti musaye kupumpsidwa.
Kumangidwa kwa Jezu
47 Pomwe iye akhalewalewapo, udafika nthithi wa wanthu. Tsono Judasi m'bodzi wa atewweri wace khumi na awiri ndiye akhali patsogolo. Na tenepo iye adafendera pana Jezupo kuti amumuse mpsompsono. 48 Tsono Jezu adamubvundza kuti:
“Judasi, kodi iwepo ulikupereka Mwana wa Munthu na mpsompsonoyu?” 49 Pomwe ateweri wa Jezu omwe akhali pamwepo adawona bzimwebzo adamubvunza kuti: “Mbuya, kodi tiwateme na mbadzo?” 50 Na tenepo m'bodzi wao adatema acigwatiratu khutu la didi la nyabasa wa mkulu wa azibaba wa ntsembe. 51 Tsono Jezu adawawuza kuti: “Lekani kucita bzimwebzi.” Iye adamukhuya khutulo licilumikidzika pomwe. 52 Ndipo Jezu adawabvundza akulu-akulu wa azibaba wa ntsembewo na atsogoleri wa anyakulindira Nyumba ya Mulungu na atsogoleri wa wanthu kuti: “Kodi imwepo mwabwera na mbadzo na mabhonga kuti mudzandimange ndine kambowa?” 53 Nakuti ine-pano ndikhakhala namwe ntsiku zentse m'mnyumba ya Mulungu, ndipo imwe mulibe kundimanga. Tsono ino ni nthawe kuti mucite bzomwe munfuna nakuti Sathani ndiye ali kutonga.
Pedru adalamba Jezu
54 Pamwepo adamuphata aciyenda naye kunyumba ya mkulu wa azibaba wa ntsembe. Ndipo Pedru akhambamutewera na kutali. 55 Pomwe adaphatiza moto kuseri, Pedru adayenda kukakhalambo nawo pabodzi. 56 Pomwe muleke wa cikazi adamuona adakhalambo pamotopo, adamunyang'anisisa acilewa kuti: “Uyu akhanayembo pabodzi umweyu.” 57 Tsono Pedru adagaza aciti: “Mai! Ndinimudziwa lini ine uyu.” 58 Padandopita nthawe pang'ono, pomwe mwinango adamuwona adalewa aciti: “Na iwepombo ndiwe m'bodzi wace. “ Tsono Pedru adagaza basi aciti: “Nandi baba imwe ndine-pano lini!” 59 Pandopita pomwe nthawe ibodzi yokha, mwinango adalewa pomwe kuti: “Cadidi umweyu uyu akhanayembo pabodzi, thangwe iye ni m'galileu.” 60 Ndipo Pedru akhangingimirambo basi kugaza aciti: “Baba imwe! Ine ndin'bzidziwa lini bzomwe muli kulewabzi.” Pomwe akhalewa bzimwebzopo ndipo congwe adalira. 61 Ndipo Mbuya adaceuka acinyang'anisa Pedru. Pamwepo Pedruyo adakumbukira bzomwe Mbuya akhadamuwuza kale kuti: “Iwepo u'ndilamba lero katatu, congwe akanati kulira.” 62 Na tenepo Pedru adacoka pamwepo acimbalira kwene-kwene na ciya.
Jezu adasekedwa na anyakulindira
63 Wanthu omwe akhalindira Jezuyo akhambamuseka na kum'menya. 64 Ndipo akhambamumpsinkha m'maso acimbalewa kuti: “Vima tiwone kuti mbani wakumenyayu.” 65 Ndipo adamulewa pomwe mafala mazinji yakutukwana.
Jezu adaperekedwa kumphala ikulu
66 Pomwe kudacena, adakonkhana atsogoleri wa wanthu, na akulu-akulu wa azibaba wa ntsembe na apfundzisi wa mtemo. Ndipo iwo adayenda naye pamphala ikulu, acimubvundza kuti: 67 “Tiuze! Iwepo ndiwe Krixtu?” Pamwepo Jezu adatawira aciti: “Napo ndikakuuzani imwepo mun'mbvuma lini. 68 Ndipo ine ndikakubvunzanimbo mun'ditawira lini cinthu. 69 Kuyambira tsapano lino, Mwana wa Munthu an'dzakhala kuboko ladidi la Mulungu Wamphambvu-Zentse.”
70 Pamwepo wentse adamubvundza aciti: “Na tenepo iwepo ndiwedi Mwana wa Mulungu?” Ndipo iye adawatawirambo kuti: “Imwepo mwalewa mwekha kuti ndine.” 71 Pamwepo wentse adatawira aciti: “Kodi ni umboni bwanyi bwinango bomwe tin'funa? Nakuti ife-pano tabva kale tekha mafala ya pamulomo pacepa.”