23
Jezu kumphala ya Pirato
1 Ndipo wanthu wentse adalamuka adatenga Jezu aciyenda naye kuna Pirato. 2 Iwo adayamba kumunamizira aciti: Tamugumana munthuyu alikunamiza wanthu wa mwathu muno. Iye ali kuwalambiza kuti aleke kupima mtsonkho kuna Seza. Ndipo iye ali kulewa pomwe kuti ni Krixtu Mambo.
3 Ndipo Pirato adamubvundza kuti:
Kodi iwepo ndiwe cadidi mamboi wa ajudeu? Tsono Jezu adamutawira aciti: Imwepo ndimwe muli kulewayu. 4 Ndipo Pirato adauza akulu-akulu wa azibaba wa ntsembe na wanthu wentse kuti:
Ndiri kuwona lini mulandu wace munthuyu.
5 Tsono iwo adangingimira kwene-kwene, acimbalewa kuti: Umweyu ali kuvungisa misolo wanthu na bzomwe iye ambapfundzisa muJudeya muno, kuyabira kuGalileya mpaka kwentsene kuno.
Pirato adatumiza Jezu kuna Erody
6 Pomwe Pirato adabva bzimwebzo adabvunza kuti penu munthu omweyo akhali wa kuGalileya. 7 Pomwe adadziwa kuti akhali wa kudziko lomwe likhatongedwa na Erody. Ndipo iye adamutumiza kuna Herodyko nakuti iye akhali kuJeruzalema panthawe imweyo. 8 Pomwe Erody adawona Jezu, adokondwa kwene-kwene thangwe iye akhabva kale mbiri yace. Na tenepo akhafuna kumuwona kuti penu angadacite matsenga. 9 Ndipo iye akhamubvundza na njira zakusiyana-siyana.Tsono iye akhamutawira lini cinthu. 10 Na tenepo akulu-akulu wa azibaba wa ntsembe na apfundzisi wa mtemo adangingimira kwene-kwene kumumanga mulandu. 11 Tsono Erody na acikunda wace anyakulindira adamunyoza na kumutukwana. Ndipo adamubvazika cakubvala ca umambo acimubweza pomwe kuna Pirato. 12 Pantsiku imweyo Pirato adayanjana pomwe papsa na Erody thangwe iwo akhadapsomezana.
Jezu adayenda pomwe pamphala ya Pirato kaciwiri
13 Ndipo Pirato adakonkhana na akulu-akulu wa azibaba wa ntsembe na atongi na mbumba. 14 Ndipo iye adawauza kuti: Mwandibweresera munthyu nakuti mwalewa kuti ali kuvunga misolo wanthu. Na tenepo ndamubvundza mucibva na makutu yanu. Tsono ndiribe kuuwona mulandu omwe muli kumumangayu. 15 Napo ndiye Erody adamubweza kuno, nakuti alibe kuwonambo thangwe lomwe lingamuphese 16 Na tenepo ndini mulanga ndikamala ndicimuleka aciyenda. 17 Bzikhafunika kuti Piratoyo acose munthu m'bodzi m'mkaoko panthawe ya cikondweso ca Paxikwa. 18 Ndipo wanthu wentse adakuwa aciti: “Musiyeni umweyo mucose Balabasi!” 19 Tsono Balabasiyo akhali mkaoko na thangwe ra kunyosa phiringu mu mzinda na kupha wanthu. 20 Na tenepo Pirato akhafuna kuti atsudzule Jezu ndipo adawawuza pomwe wanthuwo. 21 Tsono iwo adanyanyiratu kukuwa aciti: “Mukhomerereni! Mukhomerereni!” 22 Ndipo iye adawabvundza pomwe kacitatu aciti:
Kodi umweyu wacita cakuipa canyi? Ndiribe kuwona thangwe lomwe lingamuphese. Na tenepo, ndinimulanga, ndicimuleka aciyenda.
23 Tsono iwo ndipo akhanyanyiratu kukuwa na mphambvu acimuuza kuti amukhomerere. Ndipo iwo adamukonwesa na kukuwako. 24 Ndipo Pirato adabvuma kucita bzomwe iwo akhakumbirabzo.
25 Adacosa munthu akhakumbira iwoyo omwe akhali mkaoko na thangwe ra kunyosa phiringu na kupha wanthu. Ndipo acipereka Jezu kuti amuciti bzomwe iwo akhafuna.
Jezu adakhomereredwa pamtanda
26 Pomwe akhayenda naye, adaimisa munthu m'bodzi dzina lace Simau wa kumzinda wa Sireni. Iye akhacokera kumui winango. Ndipo iwo adamukupikisa mtanda kuti atewere nawo Jezu. 27 Na tenepo, nthithi wa wanthu azinji ukhamutewera na akazimbo pomwe akhabzimenya pacifuwa acimbalira na kumubvera ntsisi. 28 Tsono Jezu adaceuka aciwauza kuti: Azimai wa kuJeruzalema, lekani kundirira ine-pano. Bzirireni mwekha imwepo na wana wanu! 29 Nakuti ntsiku inango imwepo mun'dzalewa kuti: 'Wakusimbidwa mbale omwe an'bala lini, na wale omwe nthumbo yawo ikanati kubala ayai masuku yawo yakanati kumamisa. 30 Ndipo ntsiku imweyo an'dzauza mapiri kuti:
“Tigwereni!”
Na tumapiri kuti:
“Timpsinkheni”
31 Penu wanthu ali kucita bzimwebzi pomwe nkhuni zikali ziwisi, kodi tsono ndiye tani zikadzauma? 32 Ndipo iwo adatengambo pomwe akapondo awiri kuti akaphedwe naye pabodzi. 33 Pomwe adafika nawo pambuto yomwe ikhacemeredwa Nkhadzi, adamukhomerera pamwepo Jezuyo pabodzi na akapondo wale. M'bodzi kuboko ladidi mwinango ladzere. 34 Tsono Jezu adalewa kuti:
“Baba alelekereni, nakuti iwo an'dziwa lini bzomwe ali kucita.” Ndipo iwo adacita mayere kuti agawane bzakubvala bzace.
35 Wanthu omwe akhali pamwepo akhaona bzentse. Na atsogolerimbo wa mbumba akhamunyoza acimbalewa kuti: “Iye adapulumusa wanthu winango, mulekeni abzipulumusembo yekha penu iye ndiye cadidi Krixtu wa Mulungu, Wakudankhukidwa. 36 Na acikundambo pomwe kubodzi adamunyoza, adafendera pafupi acimupasa vinyu ya kuwawa acimbalewa kuti:
37 Penu iwepo ndiwe mambo wa ajudeu bzipulumuse wekha. 38 Ndipo padzulu pace pakhadanemba kuti: “UYU NI MAMBO WA AJUDEU.” 39 Na tenepo m'bodzi wa akapondo omwe akhadakhomereredwambo adamutukwana Jezu aciti: “Kodi ndiwe lini Krixtu?” Bzipulumuse wekha na ifembo.” 40 Tsono mwandzaceyo adamutsimula aciti: Kodi iwepo ulibe mantha na Mulungu? Napo iye wapasidwa nyathwa ibodzi-bodzi na ife. 41 Nyathwa yathu idathemera na bzomwe tacita ife-panobzi. Tsono uyu alibe kucita cinthu cakuipa. 42 Ndipo iye adathumizira pomwe kulewa aciti: “Jezu udzandikumbukembo ukadzabwera mu umbambo bwako.” 43 Ndipo Jezu adamutawira aciti: “Lero-lino iwepo un'kakhala na ine kudzulu.”
Kufa kwa Jezu
44 Ndipo yakhali masikati panthawe khumi na ziwiri. Na tenepo dzuwa lidathima kudacita mdima dziko lentse mpaka nthawe zitatu za kumaulo. 45 Ndipo nguwo yagwatisira M'nyumba ya Mulungu idang'ambika pakati na kati. 46 Pamwepo Jezu adakuwa kwene-kwene aciti: “Baba, ndiri kupereka mzimu wangu m'manja mwanu!” Pomwe adamala kulewa bzimwebzo adafa. 47 Pomwe mkulu wa acikunda adawona bzimwebzire ndipo iye adapasa mbiri Mulungu aciti: “Cadidi munthuyu akhali wakulungama.” 48 Pomwe nthithi wa wanthu omwe ukhadakonkhana pamwepo udawona bzimwebzo, udabwerera kumui ucimbadandaula na kubzimenya pacifuwa. 49 Na tenepo anantsi azinji wa Jezu na akazi omwe akhamutewera kucokera kuGalileya adakaima patali acimbawona bzimwebzo.
Kupendesedwa kwa Jezu
50 Akhalipo munthu m'bodzi dzina lace Zuze omwe akhali Mphala ikulu. Iye akhali munthu wabwino na wakulungama. 51 Iye akhalibe kubvuma bzomwe bzikhadatonga andzace. Ndipo iye akhadacokera kumzinda wa Alimateya, cigawo ca Galileya. Na tenepo iye akhadikhira Umambo bwa Mulungu. 52 Ndipo iye adayenda kukakumbira citanda ca Jezu kuna Pirato. 53 Pamwepo iye adakacosa citanda ca Jezu pamtanda acifunyizira panguwo icena acikapendesa paphanga lomwe likhanati kuikhidwa kale munthu. 54 Ndipo Ikhali ntsiku yakukonzekera Sabudu kuti adzapume. 55 Akazi omwe akhadacokera kuGalileya acitewera Jezu adayenda naye panthutu acikakawona kupendesedwa kwa Jezu. 56 Ndipo adabwerera kumui acikakonzekera mafuta yakunuchira. paSabudu iwo adapuma ninga momwe mtemo ukhalewera.