18
Kutsikira matere kwa mtongi wakuipa mtima
1 Ndipo Jezu adatsikira matere ateweri wace kuti ambapembe nthawe zentse, ndipo aleke kuneta. 2 Ndipo mumzinda winango mukhana mtongi m'bodzi. Iye akhagopa lini Mulungu. Ndipo akhalibe basa na wanthu. 3 Na tenepo mumzindamo mukhana mamsiwa m'bodzi omwe akhabwera ntsiku zentse acimbadzamukumbira kuti: “Ndiyeruzenimbo pakundzatongedwa mulandu wangu ine-pano na nyamadulanthaka wangu. 4 Ndipo iye akhalamba kumutawira nthawe itali kwene-kwene. Tsono iye ntsiku inango adadzakumbuka yekha kuti: “N'cadidi kuti inepano nimbagopa lini Mulungu pomwe ndiribe basa na wanthu. 5 Nakuti mkaziyu ali kundinesa kwene-kwene, lekani ndimuyeruze mulandu waceyu kuti aleke kubwera-bwera pomwe kundzandinesa.” 6 Ndipo Mbuya adalewa kuti: “Bvesesani bwino bzomwe walewa mtongi wakuipa mtimayu.” 7 Kodi Mulungu angadzalekembo kucita cilungamo kuna wanthu wace omwe ambamupemba usiku na masikati? Kodi iye angadzacedwe kuwathandiza? 8 Ndiri kukuwuzani kuti an'dzawayeruza na kankulumize. Tsono, kodi Mwana wa Munthu akadzabwera, an'dzagumana wanthu wacikhulupiro pantsi pano?
Kutsikira matere kwa mfalizeu na nyakupimisa mtsonkho
9 Ndipo Jezu adatsikira pomwe matere kuna wale omwe akhabziyesa mbakulungama, omwe akhanyoza andzawo aciti: 10 “Wanthu awiri adayenda m'nyumba ya Mulungu kuti akapembe. Ndipo m'bodzi akhali mfalizeu mwinangoyo akhali nyakupimisa mtsonkho. 11 Ndipo mfalizeuyo akhapemba adaima acimbati: 'Mulungu, ndiri kukutendani thangwe ine-pano ndiribe kukhala ninga wanthu winango, omwe ni wanthu wa umbava, wakusaya kulungama na wa upombo ayai ninga nyakupimisa mtsonkhoyu.' 12 Ndipo ndinimbabzimana kudya kawiri pamdzinga, ndicipereka cacikhumi ca bzinthu bzangu bzentse bzomwe ndinimbatambira.” 13 Tsono nyakupimisa mtsonkho ule akhadaima kutali, ndipo iye akhajiguma lini kudzulu. Na tenepo akhambabzimenya pacifuwa aciti: “Mulungu, ndibverembo ntsisi ine-pano, thangwe ndine nyakuphonya!” 14 Na tenepo ndiri kukuwuzani kuti omweyu adabwerera kumui wakulungama kuna Mulungu kuposa mfalizeuyo. Nakuti ule omwe an'bzitumbiza, iye an'dzanyozedwa. Na ule omwe an'bzicesva, iye an'dzakuzidwa.
Jezu adasimba wana
15 Ndipo wanthu akhabweresa wana kuti Jezu adzawasanjike manja. Tsono pomwe ateweri wace adawona bzimwebzo adawatsimula. 16 Tsono Jezu adacemera wanawo kuti abwere pana iyepo, aciwawuza ateweri wacewo kuti:
“Alekeni wanawo abwere kuno, lekani kuwaletsa. Nakuti umambo bwa Mulungu n'bwa wanthu ninga wanawa. 17 Na tenepo ndiri kukuwuzani cadidi kuti munthu omwe an'saya kutambira umambo bwa Mulungu ninga mwana ndipo iye an'dzamupita lini.
Jezu na munthu wakulemekezeka
18 Pakhana munthu m'bodzi wakulemekezeka ndipo iye adabvundza Jezu kuti: “Misiri wabwino! Kodi ningacite tani kuti ndidzakhale na moyo wakusaya kumala?”
19 Ndipo Jezu adamutawira kuti: “Kodi thangwe ranyi uli kundicemera wabwino? Nakuti palibe munthu wabwino kuposa Mulungu.” 20 Ndipo iwepo umbaidziwa mitemo yomwe imbatii: “Leka upombo, leka kupha munthu, leka kuba, leka kunamizira mwandzako, lemekeza babako na mamako.” 21 Na tenepo iye adatawira kuti: “Ine ndinimbabzicita kale bzentsenebzo kucokera paubwana bwangu.”
22 Pomwe Jezu adabva bzimwebzo adamuwuza kuti: “Casala cinthu cibodzi kuti ucite: Gulisa bzinthu bzako bzentse bzomwe unabzobzo, kobirizo ugawire anyakusauka. Na tenepo un'dzakhala na moyo wakusaya kumala. Ndipo ukamala unditewere.” 23 Tsono, pomwe iye adabva mafala yamweyo adasunama, nakuti akhadadala kwene-kwene.
24 Pomwe Jezu adawona kuti iye akhadasunama ndipo adalewa kuti: “N'bzakunesa kwene-kwene kuti wanthu anyakudala adzapite mu umambo bwa Mulungu! 25 Nakuti bzidapusa kuti ng'ombe ipite pabuli la ntsingano kuposa munthu nyakudala kuti apite mu umambo bwa Mulungu.”
26 Ndipo wale omwe adabva mafala yamweyo adabvundza kuti: “Penu n'tenepo, tsono mbani an'dzapulumusidwa?” 27 Ndipo iye adatawira kuti: “Comwe munthu an'kwanisa lini, Mulungu an'cikwanisa.”
28 Ndipo Pedru adatawirambo kuti: “Ife-pano tasiya nyumba zathu ticikutewerani.”
29 Na tenepo Jezu adawatawira aciti: “Ndiri kukuwuzani cadidi kuti palibe munthu omwe wasiya nyumba yace, mkazace, abale wace, azibabace, ayai wana wace na thangwe ra umambo bwa Mulungu, 30 ndipo iye acisaya kutambira kazinji-kentse bzentsenebzo tsapano lino na kutsogoloko, moyo wakusaya kumala.
Jezu adawuza ateweri wace kufa na kumuka kwace
31 Ndipo Jezu adacemera ateweri wace khumi na awiri kumbali aciwawuza kuti: “Onani, tsapano tiri kuyenda kuJeruzalema, ndipo bzin'katewezeka bzinthu bzentse bzomwe bzibadenembedwa na apolofeta kuna Mwana wa Munthu. 32 Na tenepo iye an'kaperekedwa kuna wanthu wakunja, an'kamunyaza, an'kamutukwana na kumupsipira mata. 33 Ndipo iwo an'kamumenya akakamala acikamupha. Tsono iye an'dzamuka pantsiku yacitatu yace. 34 Tsono iwo alibe kubvesesa bzinthu bzimwebzo. Nakuti mafalayo yakhali yakubisika. Ndipopo iwo alibe kubvesesa bzomwe adalewabzo.
Jezu adapenyesa maso zimola wa kuJerikoo
35 Pomwe adafika pafupi na mzinda wa Jerikoo adagumana na zimola m'bodzi akhadakhala m'phepete mwa njira acimbapempheza. 36 Pomwe iye adabva m'jinchi wa wanthu omwe akhapita ndipo iye adabvundza kuti: “Nandi, n'ciani cimweco?” 37 Ndipo wanthu adamutawira kuti: “Ni Jezu wa kuNazaree ali kupita.” 38 Na tenepo zimolayo adakuwa aciti: “Jezu, Mwana wa Davide, ndibverembo ntsisi ine!” 39 Ndipo wale omwe akhali kutsongo adamunyamalisa kuti aleke kucita ciwowo. Tsono iye ndipo akhanyanyiratu kukuwa kwene-kwene acimbati: “Nandi Mwana wa Davide, ndibverembo ntsisi ine!” 40 Ndipo Jezu adaima aciwawuza kuti abwere naye. Pomwe iye adafika pakhana iyepo, ndipo adamubvundza kuti: 41 “Kodi un'funa kuti ndikucitinyi?” Ndipo iye adatawira kuti: 'Ndin'funa kuti ndiwone pomwe, Mbuya.” 42 Na tenepo Jezu adamuwuza kuti: “Ona! Nakuti cikhulupiro cako cakupulumusa.” 43 Panthawe ibodzi-bodziyo, iye adapenya! Ndipo adamutewera Jezuyo acimbapasa mbiri Mulungu. Na tenepo wanthu wentse omwe adawona bzimwebzo adapasambo mbiri Mulungu.