1 Ndipo Jezu adawuza ateweri wace kuti: “Bzin'dzawoneka bzinthu bzomwe bzin'dzaphonyesa wanthu, tsono tsoka kuna munthu omwe an'dzabzicitayo. 2 Na tenepo bzikhali bwino kuti munthu omweyo amangiriridwe thumba m'khosi acikamuthusa pakati panyandza, kuti aleke kudzaphonyesa munthumbo bzace. 3 Cenjerani. Penu m'bale wako wakuphonyera, mutsimule. Penu iye an'khumbula, iwepo mulekere. 4 Penu iye an'kuphonyera kanomwe pantsiku, acidzakukumbirambo pomwe kanomwe kuti umulekerere, na tenepo iwepo mulekereni basi.”

5 Ndipo atumiki adakumbira kuna Mbuya aciti: “Tithumizireni cikhulupiro cathu!” 6 Ndipo Mbuya adatawira aciti: “Penu imwepo muna cikhulupiro ninga njere ya ntowe mungadawuwuza mkuyuyu kuti: 'Zuka ukabzizike panyandza! Ndipo iwo ungabvume.'

7 Ndipo Jezu adabvundza kuti: “Penu munthu ana nyabasa wace wakulima ayai nyakuusa ng'ombe, akatenepo iye wakotoka, kodi angamuuze kuti atom kukhala patsantsali adye? 8 Ne-ne-ne, maka kuti: “Ndoko katome kubvala kuti undiphikire na kunditumikira kuti ndidye, ndicimwa . Ndipo ndikamala unidya ucimwambo bwino.” 9 Kodi iye angamutende nyabasayo na thangwe ra kucita bzimwebzo? Ne-ne-ne! 10 Na tenepo imwepo mun'dzalewa kuti: “Ndiro basa lathu limwero, nakuti tacita bzomwe mwatiuza.”

11 Pantsiku ibodzi pomwe Jezu akhayenda kuJeruzalema, iye adapita na m'malire mwa Samaliya na Galileya. 12 Pomwe iye adafika m'mui winango, ndipo adagumana anyamapere khumi. Tsono iwo adaima kutali na iye. 13 Ndipo iwo adakuwa aciti: “Nandi Misiri Jezu! Tibverenimbo ntsisi.” 14 Pomwe iye adawawona adawauza kuti: “Ndokoni mukabzilatize kuna azibaba wa ntsembe.” Pomwe iwo akhayendapo mapereyo yadapola. 15 Na tenepo m'bodzi wao pomwe adawona kuti wapola, adabwerera acimbapasa mbiri Mulungu na kukuwa. 16 Ndipo iye adagodama pana Jezu acimutenda. Tsono iye akhali m'Samaliya. 17 Ndipo Jezu adabvundza kuti: “Kodi mukhali lini wanthu khumi omwe mwapolesedwa maperemwe? Apa winango apfembawo ali kuponi? 18 Kodi palibe munthu mwinango omwe angadadzatenda Mulungu kuposa nyakudzayu?” 19 Ndipo iye adamuuza kuti: “Lamuka uyende, nakuti cikhulupiro cako cakupulumusa.

20 Pomwe Jezu adambvundzidwa na afalizeu kuti umambo bwa Mulungu bun'dzafika lini, pamwepo iye adawatawira aciti: Umambo bwa Mulungu bun'bwera lini bucicita kuwoneka na maso. 21 Palibe munthu omwe an'dzalewa kuti: “Ubu pano” ayai “Ubo apo!” Thangwe umambo bwa Mulungubo buli m'mitima mwanumu.” 22 Pomwe adamala bzimwebzo adawuza ateweri wace kuti: “In'dzakwana nthawe yomwe mun'dzafuna kuwona mabwerero ya Mwana wa Munthu. Tsono mun'dzaiwona lini. 23 Ndipo wanthu an'dzakuwuzani kuti: “Uyu pano”, ayai “Uyo apo!” Tsono imwepo lekani kudzayenda ayai kudzawatewera. 24 Ninga momwe mpheni imbacetukira kudzulu, phampha na phampha ndipo bzin'dzacitikambo tenepo pantsiku yakubwera kwa Mwana wa Munthuyo. 25 Tsono bzifunika kuti atome kubonera kwene-kwene acilambidwa pomwe na ntundu omweyu wa wanthu. 26 Ninga momwe bzidacitikira panthawe za Nowa. Na tenepo bzin'dzacitikambo pantsiku zomwe Mwana wa Munthu adzafuna kubwera. 27 Nakuti wanthu akhambalowola na kumbalowozana, acimbadya na kumwa, mpaka pantsiku yomwe Nowa adapita muxitima ya m'mmadzi. Ndipo kudawoneka malenga-lenga ya madzi, na tenepo yadapha wanthu wentse. 28 Na tenepo bzidacitikambo bzibodzi-bodzibzo pomwe panthawe ya Loti: Wanthu akhadya, akhamwa, akhagula na kugulisa, akhalima, na kumbamanga nyumba. 29 Tsono pantsiku yomwe Loti adacoka muSodoma, kudzulu kudagwa malaxa ya moto ndipo yadapha wentse. 30 Na tenepo bzin'dzacitikambo, pomwe Mwana wa Munthu akadzabzilatiza. 31 Pantsiku imweyo ule omwe an'dzakhala ali pantsodzi penu ana bzinthu bzace m'nyumba an'dzakwanisa lini kubuluka kuti adzabzitenge. Napo ulembo omwe an'dzakhala ali kumunda mbaadzaleke kubwerera kumui. 32 Ndipo kumbukirani mkazi wa Loti. 33 Nakuti munthu omwe an'funa kusunga moyo wace an'dzautaya. Tsono ule omwe an'dzataya moyo wace ni cadidi kuti iye an'dzaupulumusa. 34 Ndiri kukuwuzani bzacadidi kuti, usiku bumwebo wanthu awiri an'dzakhala adagona pamphasa ibodzi, ndipo m'bodzi an'dzatengedwa mwinangoyo acisala. 35 Ndipo akazi awiri akadzakhala ali kupeya pabodzi, pamwepo m'bodzi an'dzatengedwa mwinango acisala. 36  37 Na tenepo iwo adamubvundza kuti: “Kodi bzimwebzi bzin'dzacitira kuponi Mbuya?”

Ndipo iye adawatawira kuti: “Pale pomwe pan'dzakhala cinthu cakufa pamwepo pan'dzakonchezana magola.”