1 Yun te ni ndekuei ndiꞌi ñayiu Israel nuu ñuꞌu teꞌa nani Sin, te ni ka jikai ndijoo ndijoo kuaꞌankuei, nagua tatnuni maa Jitoꞌo, te ni ka jinkoi Refidim, su tu na ndute ñuꞌu yun ja vi koꞌo ñayiu ñuu. 2 Te ni ka jinkondee ñayiu ñuu ka tee ñai jin Moisés, te ka jiñaꞌi:

―Taa ni ndute na vi koꞌo san.

Te jiñaꞌa Moisés:

―¿Nau ja ka tee ña ni jin san? ¿Nau ja ka jito tnuni ni Jitoꞌo? ―jiñaꞌa de.

3 Su ka yichi ñayiu yun, te ni ka kaꞌan kuechi siki Moisés, te ka jiñaꞌi:

―¿Nau ja ni ndeneꞌe ña ni ñuu Egipto ja vajikueio nani ja kaꞌni ña ni soko ndute jin san vi jin seꞌe san vi kiti san? ―ka jiñaꞌi.

4 Yun te ni kana jaa Moisés nuu Jitoꞌo, te jiñaꞌa de:

―¿Naxa saꞌa san jin ñayiu ñuu yaꞌa? Te vi joo ni ka te vi kaꞌni ñai jin yuu ―jiñaꞌa de.

5 Te jiñaꞌa Jitoꞌo nuu Moisés:

―Yaꞌa ichi nuu ñayiu ñuu, te kuaka ron sava tee ka kuu nijaꞌnu nuu ñayiu Israel, te suni konee ron yutnu ja ni kani ron nuu ndute yute Nilo, te kuaꞌan. 6 Te ja koo maa rin kondetu ña rin siki kava oo yuku Horeb, te kani ron yika kava yun, te kee ndute kava yun, nagua ja vi koꞌo ñayiu ñuu yaꞌa ―jiñaꞌa ya.

Te saa ni saꞌa Moisés jin nuu tee ka kuu nijaꞌnu nuu ñayiu Israel. 7 Te ni xnani de yun Meriba, chi yun ni ka tee ña ñayiu Israel jin de. Te suni ni xnani de Masah, chi yun ni ka jito tnuni ñai jin Jitoꞌo, te ni ka kachi: “¿A oo Jitoꞌo neꞌuo axi tuu?”, ni ka kachi.

8 Yun te ni jaꞌankuei ñayiu amalec nuu nani Refidim ja vi kaxin tnaꞌi jin ñayiu Israel. 9 Te jiñaꞌa Moisés nuu Josué:

―Kaji ni sava tee ka oo jion yaꞌa, te kuaꞌankuei ni xtnee vi kaxin tnaꞌa ni jin ñayiu amalec. Te ja koo maa san ndee nuu yuku sukun yun, koso ndaꞌa san yutnu ia Dios ―jiñaꞌa de.

10 Te ni saꞌa Josué nagua ni tatnuni Moisés, te ni kekuei de ja ni ka jaxin tnaꞌa de jin ñayiu amalec, su Moisés vi Aarón vi Hur ni kakuei de ndee nuu yuku sukun yun. 11 Te nini kaneꞌe sukun Moisés ndaꞌa de, te kuaꞌankuei ñayiu Israel ka kundei, su nuu nuneꞌe de ndaꞌa de, te ka kundee ñayiu amalec. 12 Su nuu kuaꞌan makutnuu ndaꞌa Moisés, te ni ka kiꞌin sava ka de in kava, te ni ka jakin de, te ni jinkoo Moisés siki kava yun. Te ni ka oyituu Aarón jin Hur jioo jioo ndaꞌa de, in de ndaꞌa kuaꞌa, te inka de ndaꞌa satni. Saa te ni kundee Moisés ja ni oyutnu ndaꞌa de guaa ndee nuu makee nikandii. 13 Saa te ni ka kundee Josué siki ñayiu amalec, te ni ka jaꞌni ña de jin yuchi kani de.

14 Yun te jiñaꞌa Jitoꞌo nuu Moisés:

―Tee ndiꞌi yaꞌa nuu in liuru, nagua ja na vi kondakaꞌan ñayiu naxa ni kuu, te kaxtnoꞌo nuu Josué ja xnaa ndiꞌi rin ñayiu amalec nuu ñuyiu, te ma vi koo kai ja vi kondakaꞌan ña ñayiu jin ―jiñaꞌa ya.

15 Yun te ni saꞌa Moisés in nuu soko de kiti, te ni xnani de “Jitoꞌo kuu ia chituu ña ja kundee san”. 16 Te jiñaꞌa de:

―Ja siun ni ndoneꞌe ndaꞌa Amalec siki mesa nuu tatnuni Jitoꞌo, te vi kokaxin tnaꞌa Jitoꞌo jin Amalec ndi in ndi in tatatnoꞌo ja vajikuei ―jiñaꞌa de.