1 Yun te ni ndekuei ndiꞌi ñayiu Israel Elim yun, te kuaꞌankuei ja ni jinokuei nuu ñuꞌu teꞌa nani Sin ja oo maꞌñu Elim jin Sinaí, kiuu xaꞌun yoo kuu uu, nuu kuee ka ja ni ndekuei ñuu Egipto. 2 Te ndiꞌi ñayiu Israel ni ka kaꞌan kuechi siki Moisés vi siki Aarón nuu ñuꞌu teꞌa yun. 3 Te ka jiñaꞌa ñayiu Israel:

―Vaa nuu suaꞌa te ni jaꞌni ña Jitoꞌo ndee nuu ni ka oo ka san ñuu Egipto nuu ni ka ojinkoo san yika kisi ndei kuñu, te ni ka ojaa san xtaa ndee ni ka ondutu chii san. Su ni ka ndeneꞌe ña ni ja vajikueio nuu ñuꞌu teꞌa yaꞌa ja vi kaꞌni ni ndiꞌi ñayiu yaꞌa jin soko ―ka jiñaꞌi.

4 Yun te jiñaꞌa Jitoꞌo nuu Moisés:

―Saꞌa rin ja kuun xtaa ndee andivi, te ndiꞌi kiuu kokekuei ñayiu ñuu vi kondaxtutui na kuaꞌa vi kai in kiuu in kiuu. Saa nagua ja koto tnuni rin jin, kondioꞌni a ka jantnoꞌi ley rin axi tuu. 5 Su kiuu kuu iñu, te vi ndaxtutui na kuaꞌa uu kiuu, te ndiꞌi vi saꞌa tuaꞌi ja vi kai inka kiuu ―jiñaꞌa ya.

6 Yun te ka jiñaꞌa Moisés jin Aarón nuu ndiꞌi ñayiu Israel:

―Jañini te vi kuni ni ja maa Jitoꞌo kuu ia ni ndeneꞌe ña ñuu Egipto. 7 Te neꞌe ka xtnee te vi kuni ni jakaꞌnu ndevaꞌa kuu maa Jitoꞌo, chi ni onini ya ja ka kaꞌan kuechi ni siki ya. Te sein, chi masu na in ka kuu saꞌun san ja vi kokaꞌan kuechi ni siki san ―ka jiñaꞌa de.

8 Te suni jiñaꞌa ka Moisés:

―Jañini vitna taa Jitoꞌo kuñu ja vi kaa ni, te neꞌe ka xtnee taa kuaꞌa ya xtaa ja vi kaa ni ndee vi ndutu chii ni, chi ni onini Jitoꞌo ja ka kaꞌan kuechi ni siki ya. Te sein chi masu na in ka kuu saꞌun san, te masu siki sein ka kaꞌan kuechi ni, chi siki maa Jitoꞌo ―jiñaꞌa de.

9 Te jiñaꞌa Moisés nuu Aarón:

―Kuñaꞌa ni nuu ndiꞌi ñayiu Israel ja na vi kitnaꞌa yatni nuu Jitoꞌo, chi ni onini ya ja ka kaꞌan kuechi nuu ya ―jiñaꞌa de.

10 Te vi nini kaꞌan Aarón nuu ndiꞌi ñayiu Israel, te ni ka ndakondiaꞌa ndiꞌi de ichi nuu ñuꞌu teꞌa, te ni ka jini de jakaꞌnu maa Jitoꞌo ja ni kenta nuu viko. 11 Te ni kaꞌan Jitoꞌo nuu Moisés, te jiñaꞌa ya:

12 ―Ni onini rin ja ka kaꞌan kuechi ñayiu Israel. Kaꞌan nui te kuñaꞌa ron suaꞌa: “Nuu mañini te vi kaa ron kuñu, te tnoꞌo neꞌe vi kaa ron xtaa ndee vi ndutu chii ron. Saa te vi kuni ron ja maa rin kuu Jitoꞌo Dios ron”, jiñaꞌa ya.

13 Te nuu mañini kiuu yun, te ni jinokuei kañuꞌu ja vi ni ka chitu ti nii nuu ka ndaa veꞌe saꞌun. Te nuu ni tuu inka kiuu, te ni nuu yuyu nii nuu ka ndaa veꞌe saꞌun yun. 14 Te nuu ni ndute yuyu nuu ñuꞌu teꞌa yun, te ni ka kendoo in ja yaxin kueli, te tikute yaxin na kuinio yuaꞌa ndute ja junkonduei nuu ñuꞌu. 15 Te nuu ni ka jini ñayiu Israel, te ka jikan tnoꞌo tnaꞌa in in:

―¿Nagua kuu jayaꞌa? ―Chi tu ka jini nagua kuu. Yun te jiñaꞌa Moisés:

―Xtaa ja ni taa Jitoꞌo ja vi kao kuu. 16 Te tnoꞌo yaꞌa kuu ja ni tatnuni Jitoꞌo: Vi ndaxtutu in in maa ni na kuaꞌa vi kaa ni, nasaa maa ni ka oo nuu veꞌe ni, te saa vi ndaxtutu ni. Vi tau ni kuaꞌa ja uu uu litro vi kaa in in ni ―jiñaꞌa de.

17 Te saa ni ka saꞌa ñayiu Israel. Savai ni ka ndaxtutu kuaꞌa, te savai joo ni. 18 Su nuu ni ka chikuaꞌi, te tu ni ndoo ka nuu ñayiu ni ndaxtutu kuaꞌa ka, ni tu ni jaꞌni ña jin ñayiu ni ndaxtutu joo ni. In in maa ñayiu ni ka ndaxtutui na kuaꞌa jaꞌni ña nuu veꞌi ja vi kai.

19 Te jiñaꞌa Moisés:

―Ni in ni ma vi xndoo saꞌun ni nagua vi kaa ni inka kiuu ―jiñaꞌa de.

20 Su tu ni ka jantnoꞌo savai tnoꞌo ni kaꞌan Moisés, te ni ka xndoi joo ka ja vi kai inka kiuu. Su ja ni ka tavaꞌi yun ni tnaa tindaku vi ni jiaa, te ni kiti ini Moisés nuu ñayiu yun.

21 Te ndiꞌi neꞌe ni ka ondaxtutu in in maa ñayiu na kuaꞌa vi kai, chi nuu kuu iꞌni ndaꞌa nikandii, te ndiꞌi ndute. 22 Su kiuu kuu iñu, te ni ka ndaxtutui na kuaꞌa vi kai uu kiuu, kuun litro in in. Yun te ni jaꞌankuei ndiꞌi tee ka tatnuni nuu ñayiu Israel, te ni ka ndakani de nuu Moisés ja siun ni ka saꞌa ñayiu yun. 23 Te jiñaꞌa Moisés:

―Vatuka, chi saa ni tatnuni maa Jitoꞌo: Te xtnee kuu kiuu ndatatu, kiuu ii ja vi chiñuꞌo Jitoꞌo. Te nagua vi chioꞌo ni, te vi chioꞌo ni vitna, te nagua vi skuiso ni, te vi skuiso ni vitna. Te ndiꞌi nagua ndoo, te vi tavaꞌa ni ja na kokuu kiuu xtnee ―jiñaꞌa de.

24 Te ni ka tavaꞌa ñayiu Israel ja kokuu inka kiuu, nagua ni tatnuni Moisés, te tu ni tnaa tindaku, ni tu ni jiaa. 25 Te jiñaꞌa Moisés:

―Vi kaa ni vitna, chi kiuu ndatatu kuu nuu maa Jitoꞌo, te vitna chi ma vi niꞌi saꞌun ni ja vi ndaxtutu ni nuu ñuꞌu. 26 Chi iñu kiuu guaa vi ndaxtutu ni, su kiuu kuu uja kuu kiuu ndatatu, te ma vi niꞌi saꞌun ni ―jiñaꞌa de.

27 Su sava ñayiu Israel ni kekuei kiuu kuu uja ja vi ndaxtutui, su tu nagua ni ka niꞌi saꞌuin. 28 Te jiñaꞌa Jitoꞌo nuu Moisés:

―¿Nasaa ka kiuu vi kokusoꞌo ron nuu tnoꞌo tatnuni rin vi nuu Ley rin? 29 Vi kondiaꞌa ja maa rin kuu Jitoꞌo ja ni taa rin kiuu ndatatu, te yun guaa kiuu kuu iñu, te taa rin xtaa ja vi kaa ron uu kiuu. Te vi koo in in maa ron veꞌe ron, te ni in ron ma kekuei kiuu kuu uja ―jiñaꞌa ya.

30 Saa te ni ka ndatatu ñayiu ñuu kiuu kuu uja.

31 Te ñayiu Israel ni ka xnani xtaa yun maná, te ja kuijin kuu, te na kaa ndikin kulantru kaa, te na jaa xtaa tikute kueli ja yiꞌi nduxi ñuñu jaa.

32 Te jiñaꞌa Moisés:

―Yaꞌa kuu tnoꞌo ja ni tatnuni Jitoꞌo, te kachi ya: “Vi chitu uu litro maná yaꞌa, te vi tavaꞌa ron nagua ja na vi kuni ndikin tata ron ja kikuei nuu kuee ka naxa kaa xtaa ni taa rin ja ni ka ojaa ron nuu ñuꞌu teꞌa na ni ndeneꞌe ña rin ñuu Egipto”, kachi ya ―jiñaꞌa de.

33 Yun te jiñaꞌa Moisés nuu Aarón:

―Kiꞌin ni in kisi te tnaa vaꞌa ni uu litro maná, te saꞌa ni nuu xika maa Jitoꞌo, nagua ja na koo vaꞌa ja vi kuni ndikin tata ni ja kikuei nuu kuee ka ―jiñaꞌa de.

34 Te ni saꞌa Aarón nagua ni tatnuni Jitoꞌo nuu Moisés. Ni jani de kisi yun nuu oo jatnu nuu ñuꞌu ley ia Dios, nagua ja na koo vaꞌa.

35 Te ni ka ojaa ñayiu Israel maná nuu uu xiko kuia, guaa ndee nuu ni kentakuei nuu oo in ñuu kaꞌnu yuꞌu ñuꞌu nuu tnii ñuu Canaán.

36 Te uu litro kuu in gomer, te uxi jichi ja in gomer kuu in efa.