1  ✡ 11:1 फिलेपियो 3:5तानकेरता मी केथु, काय बोगवान तान माणहाह टाक दियेल हे? केदिस नाह! काहाकाय मी बी इस्राएली हे; अब्राहामान वोच एने बिन्यामीन ने जातीम रेन हे। 2 बोगवान तान ता माणहाह नाह सोड्यो, जाह तो सुरवात माय निवाड्यो। काय तुमू नाह जाणते काय पुस्तेक एलियान बाराम काय किथे, काय तो इस्राएलान विरोद माय बोगवाना से विन्ता किरेह 3 “एय मालीक ता तारा जाणाव केरनाराह मार देना, ता तारी वेदीह ओदार दियेल हेते; एने मीच एखालोच वोचेल हे, एने ता मारो जीव लेणेन होदतेह।” 4 पुण बोगवाना फाय रेन ताह काय जापाप जुड़नो? “मी मार केरता हात एजार एदम्याह मेल रिनोह, जा जुठा बाल देवतान ओंगाण गुटण्या नाह टेकाड़ेल सोता।” 5 इहीचकेरीन ज्या टेमाम बी गीण से निवाड़ेल थोड़ाक माणहे बाकी हेते। 6 केदी ज्य गीण से ईयेल हे, ताहार ओवतो कामा केरीन नाह; नाहते गीणुस गीण नाह रेन्यु।

7 ते काय ईनो? ज्य काय इस्राएली जान होद माय एता, तो ताह नाह सापेड़नो; पुण निवाड़ेलाह सापेड़नो, एने बाकीन माणहे कठोर केराय गीया। 8 जिहकेरीन लिखेल हे, “बोगवान तान मोनाह आजीन दिह वोर बारी निंद माय टाक मीलेल हे, देखाय नाय ओहला डोला, एने होमलाय नाय ओहला कान आप्यो।” 9 एने दाऊद किथे, “तान खाणो तानकेरता जाल एने फासा एने ठोकेर एने डेंडान कारेण एय जाय। 10 तान डोला माय आदारो सावाय जाय काय नाय देखी, एने तु कायेम तान सेरीराह वाकाड़ीन मेल।”

11 केरीन मी केथु काय ता पोड़नेन केरता ठोकेर खाईल? केदिस नाह! पुण तान पोड़नेन वोजेसे बिगेर यहुदिह सुटकारो जुड़नो, काय ताह एतखाय एय। 12 तानकेरता केदी तान पोड़नो दुनियान केरता मालदेन एने तान कोमी बिगेर यहुदिन केरता मालदेनान कारेण ठेरानो, ताहार तान बोरपुरी केरीन काय कायच नाय एय।

13 मी तुमूह बिगेर यहुदिह जी वातु केथु। जाह वोर मी बिगेर यहुदिन केरता प्रेरित हे, ताहार मी मारी सेवान बोड़ाय केरथु। 14 काहाकाय किहीक बी केरीन मी मारा कुटूम माय एतखाय पायदा केरीन ता माय रेन मोकतान सुटकारो केरावु। 15 काहाकाय बोगवानान द्‍वारा जेवी तान नाकारनो ज्याकेरीन बोगवाना हेऱ्यो मेल मिलाप ईथे ताहार तान मेल दुनियान मेल मीलापान कारेण एनो, ताहार काय तान स्वीकार केराय जाणे ज्य तान मुरेल माय रेन जीव उठणेन बाराबोर नाय एय?

16 जेवी बेटीन पेल्लो मुठ चोखालो ठेरानो, ताहार पुरो कुहणेल फिट बी चोखालो हे; एने जेवी मुल चोखालो ठेरानो, ताहार डालख्यु बी ओहल्युस हेत्यु।

17 पुण केदी थोड्युक डालख्यु तोड़ाय जात्यु, एने तु जेंगली जेतुन एन ता माय साटाय गीयो, एने जेतुनान मुलान हाजाला रूहान बागी ईयेल हे, 18 ताहार डालख्यु पोर गोमेंड मा किरहे; एने केदी तु गोमेंड किरहे ताहार एर मेल काय तु मुलाह नाह पुण मुल तुवाह होमालेह। 19 उवतो तु किहे, “डालख्यु ज्यानकेरता तोड़ाय गीयो काय मी साटाय जाव।” 20 ठिक हे, ता ते बुरहो केरनेन वोजेसे तोड़ाय गीया, पुण तु बोरहा से टिकीन रीथे तानकेरता मोठलाय मा केरी, पुण बिय मानजे, 21 काहाकाय केदी बोगवान होबात्यु डालख्युह नाह सोड्यो ते तुवाह बी नाय सोड़ी। 22 तानकेरता बोगवानान गीण एने काठापोणाह दिखो! जा पोड़ गीया ता पोर काठोपोणा, पुण तार पोर गीण, केदी तु ता माय बोणीन रिहे ते ठिक हे नाह ते तु बी काटाय जाहे। 23 ता बी केदी विण बोरहा माय नाय रेती, ताहार जोड़ाय जाती; काहाकाय बोगवान ताकेतवालो हे काय ताह पोशो जोड़ सेकी। 24 काहाकाय केदी तु ता जेतुना से, जो सोबाव से जेंगली हे, काटाय गीयो एने सोबावान विरोद हाजाला जेतुनाम जोड़ाय गीयो, ताहार ज्‍यु हाजाल्यु डालख्यु हेत्यु, तास ने जेतुनाम काहा नाय जोड़ाय जाती।

25 एय बाय बोणहा, मी नाह होदित काय तुमू सोताह बुद्दीवाला सोमजीन ज्या रहस्य से एंजाणल्या रिहो काय जाह वोर बिगेर यहुदि पुरान पुरा रिग नाय जाती, ताह वोर इस्राएलान एक बाग इहीचकेरीन काठो रेय। 26 एने इहकेरीन आखा इस्राएल माणहान सुटकारो एय। जिहकेरीन लिखेल हे, “सोड़ेवणार सियोन माय रेन आवी, एने विणबोकत्याह याकुबान वोचीह रेन सेटो केरी; 27 एने ता हेऱ्यो मारो ज्योस वायदो बोणीन रेय, जेवी मी तान पापाह सेटो केर देह।” 28 काहाकाय ता हाजाली खोबरीन नाकार्‍या एने बिगेर यहुदिन वोजेसे यहुदि बोगवानान दुसमोन एना नेजरी माय ते ता तुमरी केरता बोगवानान दुसमोन हेते, पुण निवाड़ाय जाणेन वोजेसे एने तान डायडायान वोजेसे मोंगाल्ला हेते। 29 काहाकाय बोगवान केदी नाह बोदेलने एने तान चुनाव एने वरदान एने हादावणी मोजबुत हे। 30 काहाकाय जिहकेरीन तुमू पेल बोगवानान उकुम नाह मान्या, पुण एवी यहुदिन उकुम नाह माणने से तुमरी पोर किव एनी; 31  * 11:31 थोड़ाक लेख माय एवी नाह लिखेल हे।तिहेच केरीन ता बी एवी उकुम नाह मान्या, काय तुमरी पोर जी किव ईथे ज्याकेरीन ता पोर बी किव एय। 32 काहाकाय बोगवान आखाह उकुम नाह मान्ने माय बोंद केरीन मीलेल हे, काहाकाय तो आखा पोर किव केरी।

33 आहा! बोगवानान मालदेन, बुद्दी एने इकेल कोलीक गंबीर हे! तान निर्णयाह स्पष्ट विचार कोहला अथाह, एने तान वाट कोहली अगम हे! 34 चोखाली पुस्तेक ज्य किथे, “मालीकान बुद्दीह कुण ओलख्यो? एने तान मोंत्री कुण बोणनो? 35 काय एगदो बोगवानाह काह आपेल हे जाह तो पोशो आपी?” 36  ✡ 11:36 1 कुरिंथीयो 8:6काहाकाय तास ने उगे रेन, एने तान द्‍वारा, एने तास ने केरता एने तास ने द्‍वारा बाणायेल हे तान बोड़ाय जेलेम ईती रेय आमेन।