1 Unavinre ukati vakani, hutumu ni mayamikatthe o wamwene o Wiciipitu, yahonkosera nkunya aya, mwene o Wiciipitu. 2 Farawoo ahorusiya na ahooleli awe ale, nhooleli o mahutumu ni nhooleli o mayamikatthe, 3 ni aholamula utthukelaciya uwannyawe nhooleli o mayoorontta, nkalaposo mwaryawe Yusufu. 4 Nhooleli o mayorontta ahiile anantthukiya mmatatani mwa Yusufu ni eera aawehawehaka, ni yahokhala ukati vakani nkalaposo. 5 Vano yaholohaca hutumu ni mayamikatthe a mwene o Wiciipitu, yatthukeliye nkalaposo. Khula ntthu aholoha nttora nawe, oyeeli uhiyu mmoca yooyo ni khula nttora wahaana mataphuleleliyo aya. 6 Yusufu warwawe waweha wicisu, ahoona wiira yanacukulaca. 7 Phimaana ahaakoha akhuulupale a Farawoo, ni ale yaatthukiye wawaanyawe nkunya aya, eeraka: Nlattuni nyu ilelo nkhalaka oohitta? 8 Ale yahaakhulaca yiiraka: Nihaana nttora ehu ni khaawo oonitaphulela. Yusufu aheerelaca: Utaphulela nwo khunakhala wa Nluku? Nkihimerye mittora nnyo.

9 Vano hutumu ahonttonkela Yusufu nttora awe uyo: Munttorani mwaka kihoona mwiri unari vakhiviru ni mi, 10 ni mwiri uyo wahaana miritta miraru. Ni uyo wahophuwa, mpaka ukhalana ithutu ni wiima ni uttokottha mavareene. 11 Ikoomisi ya Farawoo yaari mmatatani mwaka. Kahokusa cowiima nnye ni waamela nkoomisini mwa Farawoo nuumvaha mmatatani mwawe. 12 Yusufu ahomwiirela: Mataphuleleliyo aya pha ala: Miritta miraru nnyo phi mahuku mararu. 13 Nhina wo mahuku mararu, Farawoo nowoowusa muru aa, ni nowowuutaphula ni wuuhokolosera nteko aa ni we ummomvaha ikoomisi mmatatani mwawe toko caalemalenlyaa umpanka waarya hutumu awe. 14 Ukiviriyane cothene caweettelaka ratta ukuupuweleleke mi, wakihimye wooreera wa Farawoo nwo, wiira kikhume nkalaposo mu. 15 Maana kiwiihiye utthuna nuuhitthuna, ukhuma ilapo yo maheperewu, ni ciicammo, uno khiiwo ipankilyaka yooreerela utthukeliya nkalapooso mu.

16 Weewilyawe muulupale omayamikatthe mataphuleleliyo omaana ale, ahomwiirela Yusufu: Ni mi ciicammo kihaana nttora aka: Wamuru waka cahaawo itthuttu tthaaru co mikatthe cootteela. 17 Itthuttu yooculu iyo cahaawo mikatthe co khula nnanna ni cooviyola cikina caancivela Farawoo, nanso asaanuni yaanaawa ulya ntthuttuni yarinaaka wamuru iyo. 18 Ni Yusufu aheera: Ala phi mataphuleleliyo aya: Itthuttu tthaaru nnyo, phi mahuku mararu. 19 Nhina wo mahuku mararu, Farawoo nowowutthukacera ni wuuthomya mmwirini, ni asaanuni ammoolya irutthu aa.

20 Waphilyaya nihuku noneeraru, naari nihuku napiiherawe Farawoo myakha ceyarelo ni ahaalattula mayoonlaka othene ni waavaha yoolya. Wamiithoni waya atthu ale ahaawusaca myuru nhooleli o mahutumu ni nhooleli o mayamikatthe. 21 Ahonhokolosera nteko awe hutumu, mpaka wakhanlyawe tho yoole mayonvaha ikoomisi Farawoo. 22 Nanso, ahoruma wiiviya wootthukaceriya nhooleli o mayamikatthe toko Yusufu caahimenryawe muutaphulelani nttora. 23 Paahi, nhooleli o mahutumu ule khamuupuwenle tho Yusufu, mpaka ahonliyala.