1 Yusufu ahorwaaninya Wiciipitu. Wonwo Putifari wanthumilyawe Yusufu mmatatani mwAnnasumayili. Putifari ari nhooleli a mayoorontta inupa ya Farawoomu, mwene o Wiciipitu, ahonthuma mmatatani mwAnnasumayili yammwiihile. 2 Mwaneene Nluku ari ni Yusufu, ni uyo anareeriya venci, nuupwaherera ni aakhala wapuwani wa nkunya awe munnaciipitu. 3 Putifari ucuwela wawe wiira Mwaneene Nluku ari ni Yusufu ni yaammunnuwiha nuureeriha miteko cothene cavarawe, 4 ni ahoncivela Yusufu mpaka onvaha ukhala nlamuli o wapuwani wawe wothene. Putifari ahonhiyera Yusufu ulamula wapuwani wawe wothene ni citthu cothene caarinawe. 5 Ukhuma ukati wanhiyenryawe ulamula wapuwani wothene ni citthu cothene, Mwaneene Nluku ahovaha iparakha inupa ya munnaciipitu, mwanlattu wa Yusufu. Iparakha ca Mwaneene Nluku cahomwareela mwa citthu cothene carinawe Putifari, ukhuma wapuwani mpaka umattani. 6 Vano, ahohiya citthu cothene carinawe, mmatatani mwa Yusufu, ni khaarina isukuli weetthu phi itthu, aawehererya ulya paahi. Yusufu aari ooreera ni aancivela na atthu.

7 Wakhanlyawe ukati vakani, amwaara a nkunya awe yahanca unthokoca numwiihana yiiraka: Uwe wakirupane! 8 Nanso ule ahokhotta ni aheera: Nkunya aka khanasukuli weetthu phi itthu ciri wapuwani ni cothene cirinawe hiile mmatatani mwaka. 9 Khaawo wapuwani va ookipwaha mi, ni khiiwo ikateelihilyawe, nanso nyu paahi, kontha amwaarawe. Kaahala upankelani itthu yoonanara toko ila, nuunkosera Nluku? 10 Toko coo, ale yaanankhanyereriha Yusufu khula nihuku, nanso uyo anawakhotta ni khaatthuna waattamanana. 11 Nihuku nimoca ahokela mpani wiira avare miteko cawe ni yooyo ukati uyo, khaariwo ntthu hata mmoca. 12 Vano ale yahovara ikuwo awe ni yahomwiirela tho: Nrwee, ukirupane! Nanso uyo ahokhuma mpani mmo ni waahiyera ikuwo eyo mmatatani mwaya. 13 Waatthawawe va, yahoona wiira hohiya ikuwo awe mmatatani mwaya, 14 ni yaheehana akarumeya ni weerelaca: Nkoonani! Ula Nheperewu ula niwiiheriyehu ula uwa uniruwana! Ule hokela mu ni aphavela ukirupana, nanso mi kihokhuwela. 15 Wakiwiilyawe kikhuwaka, hokihiyera ikuwo awe nuukhuma mpani mmo. 16 Vano ale yahosunka ikuwo eyo mpaka wawilyawe nkunya uwaani. 17 Vano yahaakulela uttonka itthu yakhumile yiiraka: Ile ipottha yo uHeperewu ile iniwiihenryaa eyo, yahokiwela mi ukiruwana. 18 Nanso wakhuwenlyaka wiira kaakuveliye, uyo hokihiyera ikuwo eyo nutthawa. 19 Wewilyawe nkunya awe itthu yattonkaya amwaarawe yiiraka: Coo phikipankilyaya ipottha iyo. Ahorusiya. 20 Ahoruma wiira arweeliye Yusufu ni ahovonyeriya nkalaposo mwatthukeliyaya anantthukiya a amwene. Yusufu ahokhala nkalaposo, 21 nanso Mwaneene Nluku ari nuule, yahomweettiha nnema, mpaka wiiwanana ni nhooleli onkalaposo. 22 Phimaana nhooleli onkalaposo ahomvaha Yusufu iyuulupale ya anantthukiya, ni yooyo phakhulela citthu cothene cakhumelela nkalaposo mmo. 23 Nhooleli khaarina masukuli ni Yusufu, kontha Mwaneene Nluku ari ni Yusufu ni yahonvaha iparakha wo miteko cothene cavarawe.