28
Peryát
Dáuday Zabur.
1 Oo Hodáwand, oo mani talár! Tará tawára kanán,
cha man nádelgósh mabay.
Agan taw bétawár bebay,
hamáyáni paymá bán ke kall o kabrá kapant.
2 Mani peryát o záriay tawárá gósh dár,
wahdé cha taw madata lóthán o
wati dastán dém pa tai pákén bárgáhá borza kanán.
3 Maná badkáráni hamráhiá gerrán makan o makassh,
hamá ke radén kára kanant o
gón hamsáhegán cha sohl o saláhá habará ant,
bale delesh cha sherr o shórá porr ent.
4 Kortagén káráni mozzáesh beday,
hamsang gón áyáni badén kárán,
dastay kortagénáni mozzáesh beday,
áyáni káráni kaddá.
5 Paméshká ke Hodáwanday káráni parwáhá nakanant,
áiay dazhonaray káráni háterá nadárant,
á eshán tabáha kant o
hechbar pa rost o rodómá naylit.
6 Hodáwandá satá bát,
chiá ke mani peryát o záriay tawári eshkotag.
7 Hodáwand mani zór o espar ent,
delon áiay sará tawkala kant o madaton rasetag.
Del cha shádmániá sarréch ent o
gón wati sawt o názénkán áiay shográ gerán.
8 Hodáwand wati mardománi zór o twán ent,
pa rógen per moshtagéná* 28:8 Rógen per moshag, bezán pa bádsháhiá gechén kanag. rakkagay kaláté.
9 Wati mardomán berakkén o wati kawmá barkat beday,
áyáni shopánk bay o tán abad wati kópagá bejallesh.