27
Hodáwand mani rozhn o rakkénók ent
Dáuday Zabur.
1 Hodáwand mani rozhn o rakkénók ent,
cha kayá betorsán?
Hodáwand mani zenday kalát ent,
cha kayá bimmé bebit?
2 Wahdé badkár hamlaha kanant ke mani jesm o jáná bederrant o ér bebarant,
wahdé dozhmen o badwáh mani sará orosha kanant,
á wat thagala warant o kapant.
3 Bell ke lashkaré mani chágerdá wati gedánán mekk bekant,
angat mani dela nalarzit,
agan jangé ham mani sará bekapit,
angat deljam án.
4 Cha Hodáwandá yak chizzé lóthetagon o
hameshiay pad o randá bán,
ke wati zenday sajjahén róchán
Hodáwanday lógá jahmenend bebán,
tánke Hodáwanday zébáiá begendán o
parasteshgáhá cha hamáiá rahshóni belóthán.
5 Chiá ke sakki o sóriáni róchá
maná wati sáhegá dárit,
wati tambuay tahá chéra dant o
taláréay sará borzá óshtárénit.
6 Nun dozhmenáni angerrá
sarperáza bán o
gón shádmániáni kukkárá áiay tambuay tahá korbániga kanán,
Hodáwandá pa sawt o sáza názénán.
7 Oo Hodáwand! Wahdé peryáta kanán mani tawárá beshkon,
mani sará rahm kan o passaw beday.
8 Taw gwashtag: “Mani chehragay shóházá bebay.”
Dela gwashit: “Hodáwandá! Tai chehragay shóházá án.”
9 Démá cha man chér maday,
wati hezmatkárá gón hezhm per matarrén,
taw ke mani madatkár butagay.
Oo mani rakkénókén Hodá!
Maná dawr maday o yalah makan.
10 Agan mát o pet ham maná yalah bekanant,
Hodáwand wat maná zurit o dasta gipt.
11 Oo Hodáwand! Wati ráhá maná sój day,
dozhmenáni sawabá maná rást o tachkén ráhá rahshón bay.
12 Pa dozhmenáni wáhagá maná yalah makan,
chiá ke drógén sháhed mani helápá pád átkagant
ke jang o chópay ásá damant.
13 Deljam án ke Hodáwanday nékiá
zendagénáni zeminá gendán.
14 Hodáwanday wadárá bay,
zórmand bay o delá dhaddh kan.
Haw! Hodáwanday wadárá bay.