1 ཕོ༌ཉ༌ ཉིས༌ཀོ༌ ཏེན༌ན༌ ཕི༌ཏོག༌ སོ༌དོམ༌མ༌ ལེབ༌བ༌ཅིག༌, ལོཊ༌ གྱལ༌སའེ༌ གྱས༌སྒོའེ༌ཀ༌ དུགས༌ཏེ༌ ཡོད༌པིན༌། ཁོང༌གུན༌ ཐོང༌ང༌ཅིག༌ ཁོ༌ ཐུག༌ག༌ལ༌ སོང༌ ཡང༌ ཀུས༌པ༌ ལྟན༌ཏེ༌ གོ༌ ས༌ ཐུག༌ ཅུགས༌ཏེ༌ སྒུས༌། 2 ཡང༌ ཁོའེ༌ ཟེརས༌, "སྤོན༌བོ༌གུན༌, ཇུ༌ཇུ༌ ཉེ༌ཞའེ༌ ཞབ༌སྟོག༌པའེ༌ ཁང༌པ༌ སྐྱོད༌ད༌ ཛད༌ ཡང༌ རྐང༌པ༌ ཁྲུའ༌ ཛད༌ཏེ༌ ཚན༌ལ༌ ཞུགས༌ས༌ཛད༌, ཏེ༌ནེ༌ ང༌མོ༌ནེ༌ ཞངས༌ཏེ༌ ཉེ༌ཞ༌གུན༌ རང༌ངི༌ བེས༌ལ༌ སྐྱོད༌།"

ཁོང༌གུན༌ནི༌ མོལས༌ "ཐུག༌རྗེ༌ཆེ༌, ང༌ཞའེ༌ ཚན༌བོ༌ གྱལ༌སའེ༌ ལམ༌མི༌ཀ༌ ཕུད༌ཨིན༌།"

3 ཨིན༌ནའང༌ ཁོའེ༌ རང༌གྱལ༌ ཏངས༌ པ༌སང༌ ཁོང༌གུན༌ ཁོ༌ ཉམ༌པོ༌ ཁོའེ༌ ཁང༌པ༌ སྐྱོདས༌། ལོཊ༌དི༌ ཁོང༌གུན༌ནི༌ ཕིའ༌ སྐྱུར༌ མེད༌ཁན༌ནི༌ ཏ༌གི༌ དང༌ དོན༌ཏང༌ གྱས༌པ༌ ཅོ༌ཅུགས༌ ཡང༌ ཁོང༌གུན༌ནི༌ དོནས༌། 4 ཁོང༌གུན༌ ཉིད༌ལོག༌ག༌ སྐྱོད༌དི༌ སང༌ སྔུན༌ལ༌ སོ༌དོམ༌པ༌ ཞོན༌ནུ༌ དང༌ རྒད༌པོ༌ བུ༌ཚ༌ ཚང༌མའེ༌ ལོཊ༌དི༌ ཁང༌པའ༌ ཐའ༌ སྐོརས༌། 5 ཁོང༌གུན༌ནི༌ ཀུ༌ཅོ༌ ཏངས༌ཏེ༌ ལོཊ༌ལ༌ ཏྲིས༌, "དི༌རིང༌ ཚན༌ལ༌ ཁྱོ༌རང༌ངི༌ ཁང༌པ༌ དུག༌ག༌ལ༌ ཡོངས༌ཁན༌ནི༌ མི༌གུན༌ ཀ༌ནེ༌ ཡོད༌, ང༌ཞའ༌ ཁོང༌གུན༌ ཉམ༌པོ༌ ལུས༌བྲེལ༌ ཅོ༌ཉན༌ཅེས༌ལ༌ ཁོང༌གུན༌ ཕི༌ལོག༌ག༌ ཕིང༌།"

6 ཁོང༌གུན༌ ཉམ༌པོ༌ སྤེ༌ར༌ ཏང༌ང༌ལ༌ ལོཊ༌ ཕི༌ལོག༌ག༌ བིང༌ཏེ༌ སོང༌ ཡང༌ སྒོ༌བོ༌ ཅུགས༌། 7 ཁོའེ༌ ཁོང༌གུན༌ལ༌ ཟེརས༌, "ཇུ༌ཇུ༌ ཛ༌འོ༌གུན༌ འི༌ཙོགས༌ ལས༌ ངན༌པ༌ མ༌ཅོ༌ཤིག༌། 8 ལྟོས༌, ངའ༌ བུ༌ཚ༌ ཉམ༌པོ༌ མ༌ གྲེས༌ཁན༌ནི༌ བུ༌མོ༌ ཉིས༌ ཡོད༌། ངའེ༌ ཁོང༌གུན༌ ཁྱོ༌ཞ༌གུན༌ནི༌ ཕིའ༌ ཕིངས༌ཏེ༌ ཁྱོང༌ཨིན༌ ཡང༌ ཁྱོ༌ཞ༌གུན༌ནི༌ ཁོང༌གུན༌ ཉམ༌པོ༌ ཅི༌ ཅོ༌ཨིན༌ སམ༌ནའང༌ ཅོས༌, ཨིན༌ནའང༌ འི༌ མི༌གུན༌ལ༌ ཅའང༌ མ༌ཅོ༌ཤིག༌། ཁོང༌གུན༌ ངའེ༌ གྲོན༌པོ༌ ཨིན༌ཅེས༌པོའེ༌ ངའེ༌ ཁོང༌གུན༌ སྐྱོབ༌གོས༌།"

9 ཨིན༌ནའང༌ ཁོང༌གུན༌ནི༌ ཟེརས༌, "ང༌ཞ༌གུན༌ནི༌ ལམ༌མི༌ ཀ༌ནེ༌ ལོངས༌, ཁྱོད༌ ཞན༌མ༌ ཡུལ༌ལི༌མི༌, ང༌ཞའ༌ ལམ༌སྟོན༌ ཏང༌ཁན༌ ཁྱོ༌རང༌ སུ༌ ཨིན༌། ང༌ཞ༌གུན༌ནི༌ ཁྱོ༌རང༌ང༌ ཁོང༌གུན༌ནི༌ སང༌ མང༌ང༌ ངན༌པ༌ ཅོ༌ཨིན༌།" སྒོ༌བོ༌ ཅག༌ཅེས༌ལ༌ ཁོང༌གུན༌ནི༌ ལོཊ༌ གྱབ༌བ༌ སྲན༌ཏྲེ༌ ཕུལས༌།

10 ཨིན༌ནའང༌ ནང༌ཀུག༌ག༌ ཡོད༌ཁན༌ནི༌ མི༌ ཉིས༌ཀོའེ༌ ལོཊ༌ ནང༌ཀུག༌ག༌ དྲུད༌ཏེ༌ སྒོ༌བོ༌ ཅུགས༌། 11 ཏེ༌ནེ༌ ཁོང༌གུན༌ནི༌ སྒོའེ༌ དུན༌ལ༌ ཡོད༌ཁན༌ མི༌ཚང༌མ༌ལ༌ སྒོ༌བོ༌ མི༌ཐོང༌ཅེས༌ལ༌ ཞ༌ར༌ གྱུར༌ཅུག༌ག༌ ཛདས༌།

12 ཕོ༌ཉ༌ ཉིས༌ཀོའེ༌ ལོཊ༌ལ༌ མོལས༌, "ཁྱོ༌རང༌ང༌ འི༌རུ༌ ཞན༌སུ༌ ཡོད༌? བུ༌ཚ༌, བུ༌མོ༌, བུ༌མོའེ༌ མག༌པ༌ ཡ༌ ཞན༌ ཉེན༌གྲུང༌ འི༌ གྱལ༌སའེ༌ ནང༌ང༌ དུག༌ཁན༌, ཁོང༌གུན༌ འི༌ཀ༌ནེ༌ ཕིངས༌ཏེ༌ ཁྱེར༌, 13 ཅིའ༌ཟེར༌ན༌ ང༌ཞའེ༌ འི༌ ནས༌ས༌བོ༌ མེད༌ཁན༌ ཅོ༌ཅེས༌ ཨིན༌། འི༌ མི༌གུན༌ནི༌ གྱབ༌གལ༌ལ༌ ཉད༌གལ༌ ངན༌པ༌བོ༌ ཡ༌ཝའེ༌ སན༌ན༌ ཛདས༌ཏེ༌ ང༌ཞ༌གུན༌ འི༌ ནས༌ས༌ མེད༌ཁན༌ ཅོ༌ཅེས༌ལ༌ ལམ༌ཅུག༌ག༌ ཛདས༌།"

14 ཏེ༌ནེ༌ ལོཊ༌ ཁོའེ༌ བུ༌མོ༌གུན༌ ཉམ༌པོ༌ བག༌སྟོན༌ ཅོ༌ཅེས༌ཅན༌ བུ༌ཚ༌གུན༌ནི༌ཀ༌ སོང༌, ཡང༌ ཟེརས༌, "གྱོགས༌པ༌ འི༌ ནས༌ས༌ནེ༌ བིང༌། ཡ༌ཝའེ༌ འི༌ ནས༌ས༌བོ༌ མེད༌ཁན༌ ཛད༌ཅེས༌ དུག༌།" ཨིན༌ནའང༌ ཁོང༌གུན༌ནི༌ ཁོའེ༌ ཡངས༌པ༌ ཏང༌ཏེ༌ ཨིན༌ནོག༌ སམ༌།

15 ང༌ཏོག༌ ནམ༌ལངས༌ལ༌ ཕོ༌ཉ༌གུན༌ནི༌ ལོཊ༌ལ༌ མོལས༌, "གྱོགས༌པ༌ རང༌ངི༌ ན༌མ༌ དང༌ བུ༌མོ༌ ཉིས༌ཀོ༌ ཁྲིད༌ཏེ༌ འི༌ཀ༌ནེ༌ བིང༌ཏེ༌ སོང༌ ཏེ༌མན༌ནེ༌ གྱལ༌ས༌བོ༌ མེད༌ཁན༌ ཅོའ༌ཅིག༌ ཁྱོ༌རང༌ངའང༌ མེད༌ཁན༌ ཆེན༌།" 16 ལོཊ༌དི༌ ཐེ༌ཚོམས༌ ཅོས༌པ༌ ཕོ༌ཉ༌གུན༌ནི༌ ཁོ༌, ཁོའེ༌ ན༌མ༌ དང༌ བུ༌མོ༌ ཉིས༌ཀོ༌ ལག༌པ༌ ཐམས༌ཏེ༌ གྱལ༌ས༌ནེ༌ ཕི༌ལོག༌ག༌ ཕིངས༌ཏེ༌ ཁྱེརས༌, ཡ༌ཝའེ༌ ཁོའེ༌ཀ༌ སྙིང༌རྗེ༌ ཛདས༌། 17 ཏེ༌ནེ༌ ཕོ༌ཉ༌ ཅིག༌གི༌ མོལས༌, "ཤོར༌ ཡང༌ རང༌ངི༌ མི༌ཚེའེ༌ སྐྱོབ༌, གྱབ༌ ལོགས༌ཏེ༌ མ༌ལྟ༌, ཡང༌ ཤི༌ མི༌ཤི༌ཅེས༌སི༌ ཕིའ༌ ལུང༌པའེ༌ ནང༌ང༌ མ༌དུག༌ག༌ བྲག༌གུན༌ ཆོགས༌ལ༌ ཤོར༌།"

18 ལོཊ༌དི༌ ཟེརས༌, "ཇུ༌ཇུ༌ སྤོན༌བོ༌ལེ༌ ང༌ཞ༌གུན༌ལ༌ ཏེ༌ཟུག༌ ཅོ༌ཅུག༌ག༌ མ༌ཛད༌། 19 ཉེ༌རང༌ངི༌ ངའེ༌ མི༌ཚེ༌ སྐྱོབ༌བ༌ ཛད༌ཏེ༌ ངའ༌ ཐུག༌རྗེ༌ ཆེན༌མོ༌ ཛདས༌། ཨིན༌ནའང༌ ངའ༌ འ༌ ཐག༌རིང༌ང༌ ཡོད༌ཁན༌ནི༌ བྲག༌གུན༌ ཚག༌པ༌ ཤོར༌ཐུབ༌ཅེས༌ མེ༌རག༌། ངའ༌ ཇིགས༌ས༌རག༌ འི༌ རྡུག༌ངལ༌བོ༌ ངའེ༌ཀ༌ ལེབས༌ཏེ༌ ང༌ མེད༌ཁན༌ ཆའ༌ནོག༌། 20 ཟིགས༌སའང༌, འ༌ གྲོང༌ཁྱེར༌བོ༌ དུན༌ལ༌ དུག༌ལེ༌, ང༌ ཏེ༌རུ༌ ཤོར༌ཅུག༌ག༌ ཛད༌, ཏེ༌བོ༌ ས༌ཆ༌ ཆུ༌ངུན༌ཞིག༌ མ༌ནེ༌ མི༌དུག༌ ཡང༌ ང༌ ཐར༌ཨིན༌ལེ༌།"

21 ཁོང༌ངི༌ ལན༌སལས༌, "ངའེ༌ ཁྱོ༌རང༌ངི༌ ཕིའ༌ འི༌བོའང༌ ཅོ༌ཨིན༌, ང༌ཞའེ༌ གྲོང༌ཁྱེར༌བོ༌ མེད༌ཁན༌ མི༌ཅོ༌། 22 གྱོགས༌པ༌ སོང༌ ཁྱོ༌ཞ༌གུན༌ ཏེ༌རུ༌ ལེབས༌ཏེ༌ མ༌ནེ༌ ངའ༌ ཅའང༌ ཅོ༌མི༌ཉན༌།" ལོཊ༌དི༌ ཏེ༌ གྲོང༌ཁྱེར༌རི༌ མིང༌ང༌ ཟོ༌འར༌ * 19:22 ཨིབ༌རི༌པའེ༌ སྐད༌དི༌ ནང༌ང༌ ཟོ༌འར༌རི༌ ཏོན༌ ཆུ༌ངུན༌ ཨིན༌ནོག༌། ཏགས༌།

23 ལོཊ༌ ཟོ༌འར༌ གྲོང༌ཁྱེར༌ལ༌ ལེབ༌བ༌ཅིག༌ ཉི༌མ༌ ཤར༌ཏེ༌ ཡོད༌པིན༌། 24 ཏེ༌ནེ༌ ཡ༌ཝའེ༌ མེ༌ དང༌ མུ༌ཟི༌ ཆར༌པ༌ ནམ༌ཁའ༌ནེ༌ སོ༌དོམ༌ དང༌ གོ༌མོ༌རའི༌ གྱལ༌ས༌ གུན༌ནི༌ཀ༌ ཕབ༌བ༌ ཛདས༌, 25 ཡང༌ གྱལ༌ས༌གུན༌ དང༌ ལུང༌པ༌ གང༌པོ༌, མ༌ཚད༌ ཏེ༌ནང༌ང༌ དུག༌ཁན༌ དང༌ རྩ༌ཁའ༌ ཚང༌མ༌ མེད༌ཁན༌ ཅོའ༌ ཛདས༌། 26 ཨིན༌ནའང༌ ལོཊ༌དི༌ ན༌མའེ༌ གྱབ༌ ལོགས༌ཏེ༌ ལྟས༌པ༌ ཁོའ༌ ཚཱའེ༌ ཀ༌ཝ༌ ཞིག༌ག༌ གྱུར༌།

27 སྟིང༌མ༌ཞག༌ག༌ ང༌ཏོག༌ ང༌མོ༌ནེ༌ ཨབ༌ར༌ཧམ༌, ཡ༌ཝ༌ ཉམ༌པོ༌ ཞལ༌ཏ༌ སལ༌ཁན༌ནི༌ ནས༌སའེ༌ཀ༌ ཡང༌སྐྱར༌ སོང༌། 28 ཁོའེ༌ ཐུར༌ལ༌ སོ༌དོམ༌, གོ༌མོ༌ར༌ དང༌ ལུང༌པ༌ ཚང༌མ༌ ལྟས༌པ༌ ཁོའ༌ མེ༌ བྲག༌པོ༌ བར༌ ཟ༌ནེ༌ བིང༌ཁན༌ ཙོགས༌ སྐན༌ཏེ༌ ཏུད༌པ༌ ཀེན༌ལ༌ བིང༌ཨིན༌ ཐོང༌། 29 ཨིན༌ནའང༌ དཀོན༌མཆོག༌གི༌ ཏེ༌ ལུང༌པའེ༌ གྱལ༌ས༌གུན༌ མེད༌ཁན༌ ཅོའ༌ ཛད༌ ཟ༌ནེ༌ ཁོང༌ངི༌ ཨབ༌ར༌ཧམ༌ ཨིད༌ཏུ༌ ཛད༌ཏེ༌ ལོཊ༌ ཏེ༌ གྱལ༌ས༌གུན༌ མེད༌ཁན༌ ཅོའ༌ ཛད༌ཅེས༌སི༌ ཇིགས༌ནང༌ནེ༌ ཕིང༌ཏེ༌ ཁྱོང༌ང༌ ཛདས༌།

30 ལོཊ༌ ཟོ༌འར༌ གྲོང༌ཁྱེར༌རི༌ ནང༌ང༌ དུག༌ག༌ལ༌ ཇིགས༌པ༌, ཁོ༌ དང༌ ཁོའེ༌ བུ༌མོ༌ ཉིས༌ཀོ༌ རི༌གུན༌ནི༌ཀ༌ གྲག༌ཕུགས༌ ཤིག༌གི༌ ནང༌ང༌ དུགས༌། 31 བུ༌མོ༌ ཆེན༌མོ༌བོའེ༌ ཁོ༌རང༌ངི༌ ནོ༌མོའ༌ ཟེརས༌, "ང༌དང༌ངི༌ ཨ༌བ༌ སྒས༌ཏེ༌ ཨིན༌ནོག༌ ཡང༌ འི༌ ནས༌སའེ༌ ནང༌ང༌ ང༌དང༌གུན༌ནི༌ བག༌མ༌ ཅོས༌ཏེ༌ ཕྲུ༌གུ༌ ཇོར༌ཅེས༌ལ༌ བུ༌ཚ༌ཞིག༌ མེད༌ཏེ༌ ཨིན༌ནོག༌། 32 ཡོང༌ ང༌དང༌ངི༌ ཨ༌བ༌ ར༌རོས༌ ཅུགས༌ཏེ༌ ང༌དང༌གུན༌ནི༌ པུར༌གྱུད༌ ལུས༌ཤེས༌ལ༌ ཁོང༌ ཉམ༌པོ༌ ལུས༌བྲེལ༌ ཅོ༌ཨིན༌།

33 ཏེན༌ན༌ ཚན༌ལ༌ ཁོང༌གུན༌ནི༌ ཨ༌བའ༌ ཆང༌ ཐུང༌ཅེས༌ལ༌ ཏངས༌ ཡང༌ བུ༌མོ༌ ཆེན༌མོ༌བོའེ༌ ཁོ༌ ཉམ༌པོ༌ ལུས༌བྲེལ༌ ཅོས༌། ཨིན༌ནའང༌ ཁོ༌ མ༌ བྲག༌པོ༌ ར༌རོས༌ཏེ༌ ཡོད༌ པ༌སང༌ ཁོའ༌ ཏེ༌བོ༌ གྱུས༌ མ༌སོང༌།

34 སྟིང༌མ༌ཞག༌པོ༌ བུ༌མོ༌ ཆེན༌མོ༌བོའེ༌ ནོ༌མོའ༌ ཟེརས༌, "དའང༌ ཚན༌ལ༌ ང༌ ཨ༌བ༌ ཉམ༌པོ༌ དུགས༌པིན༌, དི༌རིང༌ ཚན༌ལ༌ ཁོང༌ ར༌རོས༌ ཅུག༌ཏེ༌ ཁྱོ༌རང༌ངི༌ ཁོང༌ ཉམ༌པོ༌ ལུས༌བྲེལ༌ ཅོས༌། ཏེ༌ནེ༌ ཨ༌བ༌ གྱུད༌ཏེ༌ ང༌དང༌ངི༌ ང༌དང༌ རང༌ངི༌ པུར༌གྱུད༌ སྐྱོབ༌ཨིན༌།" 35 ཏེ༌ནེ༌ ཏེ༌ ཚན༌བོའ༌ ཁོང༌གུན༌ནི༌ ཨ༌བ༌ ཆང༌ ཏངས༌ ཡང༌ བུ༌མོ༌ ཆུང༌ང༌བོའེ༌ ཁོ༌ ཉམ༌པོ༌ དུགས༌། ཡང༌སྐྱར༌ ཁོ༌ མ༌ བྲག༌པོ༌ ར༌རོས༌ཏེ༌ ཡོད༌ པ༌སང༌ ཁོའ༌ ཏེ༌བོ༌ གྱུས༌ མ༌སོང༌།

36 ཏེན༌ན༌ ཟུག༌ག༌ ལོཊ༌དི༌ བུ༌མོ༌ ཉིས༌ཀོ༌ ཁོང༌རང༌གུན༌ནི༌ ཨ༌བ༌ གྱུད༌ཏེ༌ སྐྱེ༌ཅེས༌མ༌ གྱུར༌། 37 བུ༌མོ༌ ཆེན༌མོའ༌ བུ༌ཚ༌ཞིག༌ ཇོར༌ ཀ༌བོའ༌ ཁོའེ༌ མོ༌འབ༌ མིང༌ ཏགས༌། ཁོ༌ ནི༌ འི༌ ཏུས༌སི༌ མོ༌འབ༌པའེ༌ ཕ༌མེས༌པོ༌ ཨིན༌ནོག༌། 38 བུ༌མོ༌ ཆུ༌ངུན༌བོའང༌ བུ༌ཚ༌ཞིག༌ སྐྱེས༌, ཀ༌བོའ༌ ཁོའེ༌ བིན༌ཨམ༌མི༌ མིང༌ ཏགས༌། ཁོ༌ ནི༌ འི༌ ཏུས༌སི༌ ཨེམ༌མོན༌པའེ༌ ཕ༌མེས༌པོ༌ ཨིན༌ནོག༌།