14
Si Samson Ya Din Babai Ay Taga-Timna
1 Sin esa ay agew, nanballalong si Samson ed Timna et isdi ay inila na di esay babai ay Filisteo. 2 Sinmaa yan kanana en da ama na en ina na, “Waday inilak ay babai ay Filisteo ed Timna ay naipketan di matak. En kayo koman makikali tan laydek ay asawaen.”
3 Ngem kanan da ama na, “Apay nga mangasawa kas anak di baken nakogit ay Filisteo? Ay tan maga aya di mapilim si kapolian tako ono iib-a tako ay Israelita?”
Ngem kanan Samson en ama na, “Sisya met di laydek ay ton-oden yo ta asawaek.” 4 Adin ammon da aman Samson ay si Diyos di mangiturturong en sisya ay mangamag isna ta way iyat na ay manglaban sin Filisteo ay madama ay mangiturturay sin Israelita. 5 Et kinoyog Samson da ama na en ina na ay nanballalong ed Timna. Idi manmandan da sin kad-an di kaob-obasan isdi, wada et di manngangaed ay bomaro ay layon ay en mangabet en sisya. 6 Bigla ay inpapigsan din Ispiriton Diyos si Samson, isonga olay magay armas na yan binisngibisngit na din layon ay kaman owat olbon di kalding di inyat na. Ngem adi na inis-istoryan da ama na din inamag na. 7 Pag manballalong ay en makikali sin babai et nalaydalaydan sisya.
8 Nalabas pay di piga ay timpo et kasin inmey si Samson ta asawaena din babai. Kinombas sin danan ta ilaena din layon ay pinse na, kambaw nanbeey di anig yan nalamsan. 9 Et nan-a si kinkinana sin danan. Idi domateng sin kad-an da ama na, inyaanas daida et kinan da abe. Ngem adi na inbagbagan daida ay ina na sin bangkay di layon.
10 Inmey da sin beey di babai et nanparti si Samson isdi tan say ogali das di ay iyat di mangasawa. 11 Idi inilan din Filisteo sisya, nan-ibaa das tolonpo ay lalaki ay mangadkadwa en sisya. 12 Siya et di, kanan Samson en daida, “Manbontiyaak, et mo mapontosan yo sin oneg di pito ay agew ay ragragsak, idawtak dakayo si tolonpo ay mayamayat ay lopot ya tolonpo ay paris ay nangina ay bado. 13 Mo adi kayon makapontos, dakayo di omya si tolonpo ay lopot ya tolonpo ay bado.”
Kanan abe din Filisteo, “May kod kayman, ibagam san bontiyam ta dengngen mi.”
14 Pag kanan Samson,
“Nawaday makan ay napo sin mangamangan,
Nawaday mam-is ay napo sin kapipigsaan.”
Inmey di tolo ay agew yan adi dan makasongbat. 15 Sin maikap-at ay agew,* Din kanana sin odom ay manuskrito et: Sin maikapito ay agew. kanan da sin asawan Samson, “Sikapam si asawam ta ibaga nan sik-a di songbat din bontiya na. Mo sigaam, pooan mis sik-a ya din pamilyam ta matey kayo am-in. Ay inmayag kayo baw ta pabitegen yos dakami?”
16 Inmey si asawan Samson sin kad-ana et nan-og-oga ay nangwani, “Malmaliget ka baw en sak-en! Baken tet-ewa ay laylaydem sak-en, tan waday bontiyam sin kailiak yan adi kan inbaga di songbat nan sak-en.”
Kanan Samson, “Adiak to pay inbaga en da amak en inak, apay nga ibagak en sik-a?” 17 Ngem adi sinmaldeng ay nan-og-oga sin pito ay agew ay doy ay ragragsak, et kanayon ay damdamagena en sisya, isonga sin maikapito ay agew, inbagan Samson. Pag aben ibagan asawa na sin kailiana.
18 Idi dandani ay madipos di agew sin maikapito, kanan din man-ili en Samson,
“Ay baken anig di kakam-isan?
Ay baken od layon di kapipigsaan?”
Kanan Samson en daida,
“Mo adi kayon in-alado din bakak,
Adi kayo koman nasongbatan din bontiyak.”
19 Pag et senggep en sisya din Ispiriton Diyos ay nangipapigsa en sisya et nanballalong ed Askelon. Pinse na di tolonpo ay lalaki ay Filisteo et ina na din bado da ay say indawat na sin nanongbat sin bontiya na. Makdeng pay di, sinmaa ed beey da ama na, tan palalo di bonget na begew sin napasamak. 20 Din asawa na pay yan inpaasawa da sin lalaki ay nangadkadwa en sisya sin kasal na.