13
Din Naianakan Samson
(13:1-5,17-25)
1 Idi kasin inamag din Israelita din lawa sin pangilan Diyos, inpalobos na ay iturayan din Filisteo si daida si opatapolo ay tawen. 2 Sin doy ay timpo, waday lalaki sin tribun Dan ay manngadan si Manoa ay taga-Zora ay basig di asawa na. 3 Nanpaila din anghel Diyos sin babai yan kanana, “Adi kan nan-an-anak ed idi, ngem awni et mawad-an ka et ianak mo di esa ay lalaki. 4 Ilaem ta adi ka polos man-in-inom si arak ono kompormi ay nabobodan ya adi ka mangmangan si ibilang di linteg ay baken nalinis. 5 Mo bemela din anak yo, masapol ay adi kayon pokpokisan, tan naidadaton ay mansilbi en Diyos manipod sin kaianakana enggana sin kateyana. Sisya di mangilogi sin kaisalakanan di Israelita sin turay di Filisteo.”
Dinad-at din babai en asawa na din nanpailaan din anghel Diyos en sisya, ngem adi na baw ammo ay anghel, isonga kanana en ipogaw Diyos di nanpaila. Pag mankararag si Manoa ay mankedaw en Diyos ta omali kasin din ipogaw na ay mangitdo en daida si kosto ay iyat da ay mangay-ayowan sin anak. Pinatgan Diyos din kararag na et inmey kasin din anghel et inpidwa na din inbaga na sin babai sin damo. (13:6-16)
6 7 8 9 10 11 12 13 14 15 16
17 Kanan Manoa sin anghel Diyos, “Ibagam kod di ngadan mo ta dayawen mis sik-a mo matongpal din inbagam.”
18 Ngem kanan din anghel, “Apay nga damagen yo din ngadan ko? Palalo adi ay nakaskasdaaw.” 19 Pag man-a si Manoa si bomaro ay kalding ya daton ay arina et indatona sin altar Diyos ay mangam-amag si ad-ado ay nakaskasdaaw. 20-21 Idi komaykayang din apoy sin altar, inilan da Manoa din anghel Diyos ay maid-idsan sin apoy ay komaykayang. Say nangammoan Manoa ay anghel Diyos baw din lalaki ay doy. Et kalakpap da ay sin-asawa sin lota. Idi makdeng di, adi nanpaila kasin din anghel Diyos en daida. 22 Pag kanan Manoa en asawa na, “Adi pay matey ta tan inila ta si Diyos.”
23 Ngem kanan asawa na ay sinombat, “Mo panggep Diyos ay mamse en daita, adi na koman inawat din daton ta. Adi na koman inpaila ya inbaga am-in dadi en daita.”
24 Idi siya di, nan-anak tet-ewa din babai si lalaki et nginadanana si Samson. Dinmakdake din anak ay sana et binindisyonan Diyos. 25 Sin kawadan Samson sin kampon di tribun Dan sin nan-gawaan di Zora ya Estaol, nilogian din Ispiriton Diyos ay tignayen sisya.