1 A sa langolango. Iau a aposel. A tama tari ut o Iesu anundat a Labino. Anumot a nilaun tomo nam a Labino, i a wino tagun anung a pinapam. 2 Sako ara taro det nuki lena ausur iau a aposel, ikut torom mot, i lingmulus lena iau a aposel. Uni anumot a nilaun tomo nama Labino i ulingmulusi.

3 Ra a taro det takun iau una nung a pinapam, a balu det lenri: 4 Ra mir nam o Banabas mir papam epotor tamot, i tokodos ut sur mot in tabor mir sur mir in nangon ma mir in inum. 5 A kum aposel, ma a kum tistisin a Labino, ma o Pita det ser ben tuptupukus anundet a kum ino ra det nurnur. I tokodos ut sur mir nam o Banabas kai mir in pami lenra. 6 Ke tokodos sur mir kut, mir in papam nama lamamir sur a mani ra mir in laun nami.

7 Osi na tene inaim ra i ut in kul pas a kum utna ra i sibo suri? Osi ra in marut a kinobot na wain ma ken nan pas lako wino gusuni? Osi ra in tamtamabat a kum sipsip ma ken inum pas lako polo na sus tagun det? 8 A wasiso ri a watungi, ausur tagun a nuknukin a taro, awu. A kum Warkurai anun o Moses kai i watungi lenri, 9 “Gong u ker bat a wan a karabau ra i pas rumrum a wit, i kai in nangon ut.” Lo 25:4

Ikut ka met ungongos pas mot sur anumot tu warut. Met taramo a susut na mamaut, ikut ka met saring mot sur tu warut, sur gong met turbat a Wakak na Wasiso anun o Karisito. 13 Mot tasmani lena det ra det papam una rumu na etabor, det nangon tagun a rumu na etabor. Ma det kai ra det tuntun a kum etabor una lu na tuntun etabor, det wangon ut tagun a utna ra det tuni. 14 Lenkutkai ra, a Labino i warkurai tari lena, det ra det warawai nama Wakak na Wasiso, det in los a ikul gusun a Wakak na Wasiso sur det in laun nami.

15 Ikut, iau ut ka los pas tu utna tagun a kum utna ri, ma ka tumtumus sur an los tu utna, awu. A gas doko ra a warawai torom mot ma ka los tu ikul uni. A minat a utna oros kut torom iau, ikut anung a gasgas ri i labo doko torom iau, ma ka nemi sur taio in rakon ru i gusun iau. 16 Ra a warawai nama Wakak na Wasiso, ka ulabo pas iau nami, awu. Uni o God i sa pitar tar a pinapam na warawai tang, ma kan pet lar pasi sur an mana gusuni. Ma in laulau doko torom iau ra kan warawai nama Wakak na Wasiso. 17 Ra iau ut a nemi sur an warawai, an losi ut anung tu ikul. Ikut, ra ausur anung tu nemnem suri, an pami kut a pinapam ra o God i sa pitar tari tang. 18 Asau ra anung a ikul? Anung a ikul i lenri: An gas sur an warawai nama Wakak na Wasiso, ma kataio in kul iau. A pami lenra sur gong a saring mot sur anumot tu warut ra i tokodos sur mot in pami torom iau.

19 A lingmulus a sa langolango, ma ka papam na karabus torom taio. Ikut a pitar tar iau kut sur an papam na karabus torom a taro rop, sur an ben lako susut torom o Karisito. 20 Ra a kis tomo nama taro Juda, a muri ut a ngas na nilaun anun a taro Juda, sur an ben pukus pas det torom o Karisito. Ka kis utuntudu ina kum Warkurai anun o Moses. Ikut, ra a kis tomo nama taro ra det kis utuntudu ina kum Warkurai anun o Moses, a pitar tar iau sur an kis utuntudu ina kum Warkurai ra, sur an ben pukus pas det torom o Karisito. 21 Ra a kis tomo nama taro ra ka det kis utuntudu ina kum Warkurai anun o Moses, iau kai ka kis utuntudu ina kum Warkurai ra, sur an ben pukus pas det torom o Karisito. Ikut, ausur a rosumur una Warkurai anun o God, awu. A kis utuntudu ina Warkurai anun o Karisito. 22 Ra a kis tomo nama taro ra ka det dekdek, iau kai ka dekdek, sur an ben pukus pas det torom o Karisito. A elaro iau sur an elar nama kum ngas na taro rop, ma a mur a kum ngas na kisapi rop sur an ulaun lako taro. 23 A kum utna ri a pami sur a Wakak na Wasiso in lubung, sur in udan iau tomo nam det.

24 Pepetlai, ka mot tasmani lena, det rop ra det ililu una kinalabor det kalabor, ikut ara kut tagun det in los a ikul? Mot kai mot in dekdek una kinalabor sur mot in los a ikul. 25 A taro rop ra det wap una kum wapap, det ulason dekdek a pinindet. Det pami sur det in los pas a ikul ra in rop kut. Ikut dat, dat ulason dat sur dat in los pas a ikul ra ken rop. 26 I mo ra, ka kalabor tuptupukus, awu, a kalabor tokodos sur a tuktukino. Ka itubul elar nama musano ra i tubuli kut a maino. 27 A tumtubul a pining sur in mur wakak anung a nemnem. A pami lenri, uni a ngara, sako a sa warawai taru nama Wakak na Wasiso torom a taro gisen, ikut iau ut, o God in ipul ru iau kut, ma kan los tu ikul.