1 An inanos mot una petutna ra a taro det pami ra det wan a kum utna ra di sa etabor taru nami torom a kum torotoro na god.

Dat tasmani lena, dat rop dat sa mananos. A mananos i ser pam pat a petutna sur taio in ulabo pasi, ikut a marmaris i ser pam pat a petutna sur taio in udekdek a taro. 2 Ra taio i nuki lena i sa mananos doko un tu utna, anun a mananos ke sot utmakai. 3 Ikut, ra taio i nem o God, o God i sa tasman o naro ra.

4 An inanos mot una ngasino ra a taro det ser pami ra det wan a kum utna, ra di sa etabor taru nami torom a kum torotoro na god. Dat tasmani lena a toktok i a utna oros kut tagun a rakrakon bual, ausur a lalaun ino. Dat tasmani lena ara God sot kut, ma kataio melet. 5 A lingmulus ra a susut na utna sapat una langit ma nin una rakrakon bual, di watung det nam a kum god, ma a kum lamlabino. 6 Ikut, dat tasmani lena ara God kut, a Tamandat, i ra a kibin a kum utna rop, ma i ra dat laun suri. Ma dat tasmani lena ara Labino kut, i o Iesu Karisito, i ra i ukis a kum utna rop, ma i pitar tar a nilaun torom dat.

7 Ikut, ausur a taro rop det tasman a utna ri. A ramano kum tene nurnur, numugu ra ka det nurnur utmakai, det ser mur a petutna ra det etabor torom a kum torotoro na god. Ma tuk uniri, ra det wan a utna ra taio i sa etabor taru nami torom a kum torotoro na god, det nuki lena det ut det lotu torom a kum torotoro na god. Det taramo i lena a nuknukindet i takun det lena det pam a sakino. 8 Ikut, a utna na inangon ke warut dat sur dat in tokodos umatan o God. Ra ka dat wangon, ka dat in laulau umatan o God, ma ra dat in nangon kai, ken warut dat sur dat in wakak umatan o God.

9 Mot langolango sur mot in nan a utna ra taio i sa etabor taru nami torom a kum torotoro na god. Ikut mot in tumarong mot, sur gong anumot a petutna ra, in ben tar det ra anundet a nurnur ke dekdek, sur det in puku. 10 Ui, u sa mananos sur un nangon una rumu na lotu anun a toktok ma a nuknukim ausur in takun ui uni. Ikut ra un nangon tiro iai, ma o naro ra anun a nurnur ke dekdek in tama ui, un ben tari, sur i kai, in nan a utna ra di sa etabor taru nami torom a kum torotoro na god, ra in taramo i lena, a nuknukino i takuni lena, i pam a sakino. 11 Anum a mananos in banlaulau a musano ra anun a nurnur ke dekdek. A musano ra, a tisindat ra o Karisito i mat uni. 12 Ra mot pam a sakino lenra torom tu tisindat, sur in pam a utna ra a nuknukino in takuni uni, mot pam a sakino torom o Karisito. 13 Ra a utna ra a wani, i a kibino ra a tising in pam a sakino, kan nan melet mo tu du wewegua, sur gong iau a kibino ra a tising in puku una sakino petutna.