1 Uniri an balu a kum utna ra mot tumtumus suri torom iau: In wakak torom a musano ra ke nolin. 2 Ikut, kibino una kum pamuk na petutna ra kura, i wakak sur arara musano in nolin nam anun a ino ut, ma arara ino kai in nolin nama nun a musano ut. 3 Gong a musano i putut bat a pinino gusun anun a ino, ma lenkutkai ra, gong a ino i putut bat a pinino gusun anun a musano. 4 A ino ra i nolin, ke warkurai sur a pinino, awu. Anun a musano i warkurai suri. Ma lenkutkai ra, a musano ra i nolin, ke warkurai sur a pinino, awu. Anun a ino i warkurai suri. 5 Gong der putut bat a pininder gusun der etalai. Ikut, i wakak kut ra der rop der in mulaot sur der in utabu i munung a pininder gusun der etalai, sur der in wararing. Ikut, numur der in madek melet a pininder torom der etalai, sur gong o Satan i ulam tar der, ma der in puku, uni ka der warkurai kodos a nemnem in a pininder. 6 A watung a wasiso ri torom mot sur in warut mot, ausur sur in elar nama warkurai torom mot. 7 A nemi lena a taro rop det in elar nam iau ra ka nolin. Ikut o God i pitar tar a kum etabor torom a taro rop taktakai. Ara i los ara ngas na etabor, ma ara kai i los a se etabor.

8 Ma a watungi tandet ra ka det nolin ma torom a kum ula lena, i wakak sur det in kis ut lenra, elar nam iau. 9 Ikut ra ka det pet lar pasi sur det in warkurai kodos a nemnem in a pinindet, i wakak kut sur det in nolin. Uni i wakak ra det in nolin, sur gong a nemnem in a pinindet i ukatutur a balandet.

10 Torom det kai ra det nolin, a pitar a warkurai ri. Ma ausur iau, a Labino ut i pitari. Gong tu ino i wan pas gusun anun a musano. 11 Ikut, ra in nan pas gusuni, gong i nolin melet. Ma ra i nemi sur in nolin melet, in milet melet torom anun a musano ma der in ukodos anunder a kinkinis na nolin. Ma gong kai tu musano i lu ru anun a ino.

12 A watungi torom a ramano taro kai. Ausur a Labino i watungi, iau ut a watungi lenri: Ra tu tisindat una nurnur, anun a ino ausur a tene nurnur, ma a ino ra i nemi sur der in kis tomo, gong a tisindat ra i lu ru i. 13 Ra tu ino, a tene nurnur, ra anun a musano ausur a tene nurnur, ma a musano ra i nemi sur der in kis tomo, gong a ino ra i wan pas gusuni. 14 Uni a musano ra ausur a tene nurnur, i anun o God, kibino un anun a ino ra i nurnur, ma a ino ra ausur a tene nurnur, i anun o God, kibino un anun a musano ra i nurnur.* Ausur i lenri det sa los pas a nilaun tukum, awu. Ra det ut det in nukpukus, det in los pas a nilaun tukum. Ra awu, a kum nutnutumot det in dur. Ikut, det sa talapor, det a taro anun o God.

15 Ikut, ra aru suano ra tu pasander ra ke nurnur i nem na wan gusun ara pasander, madek ru i in nan. Ra in nan, anun a musano o anun a ino, ra i tene nurnur, in langolango gusun anunder a kinkinis na nolin. Uni o God i sa kabo pas dat sur dat in kis na malmal. 16 Ui a ino, ko tasmani ra un warut anum a musano sur in tene nurnur o awu. Ma ui kai a musano, ko tasmani ra un warut anum a ino sur in tene nurnur o awu.

17 A rara in laun ut elar nama nilaun ra a Labino i pitar tari tano, ma elar nama ngas na kinkinis ra kura tano, ra o God i kabo pasi. A pitar a warkurai ri torom a taro na lotu una kum tamtamon rop. 18 Ra o God i sa kabo pas taio ra di sa tok talilis tar a pinino, madek ru i in lenutra. Ma ra o God i sa kabo pas taio ra ka di tok talilis a pinino, gong mo di tok talilisi. 19 A petutna ra di tok talilis a pinin taio, ma ra ka di tok talilis a pinino, i ra a utna oros kut. Ikut a petutna ra taio i mur a kum warkurai anun o God, i ra i labo sakit. 20 A rara in laun ut elar nama ngas na kinkinis ra kura tano, ra o God i kabo pasi. 21 Ra ui a musano ra i papam na karabus, ra o God i kabo pas ui, gong u nuknuk una num a kinkinis na karabus. Ikut, ra tu kisapi sur un langolango uni, i wakak un muri. 22 Uni i ra a musano ra i papam na karabus, ra a Labino i sa kabo pasi, i a langolango na musano anun a Labino. Lenkutkai ra, i ra a langolango na musano ra a Labino i sa kabo pasi, i a musano ra i papam na karabus mo anun o Karisito. 23 O God i sa kul pas mot nama ikul ra i labo sakit. Gong mot pitar tar mot sur mot a kum musano ra det papam na karabus anun a taro. 24 A kum tistising, una numot a nilaun tomo nam o God, i wakak ra mot taktakai mot in laun ut elar nama ngas na kinkinis ra kura tano, ra o God i sa kabo pas mot.

25 A Labino ke pitar tu warkurai torom iau un det ra ka det nolin. Ikut an inanos mot una nuknuking. Iau a ngas na musano ra a taro det nurnur un iau, uni a Labino i maris doko iau. 26 A nuki lena i wakak ra osi ra ke nolin, gong i nolin, uni a kum maut uniri i wanpat. 27 Pepetlai, u sa nolin? Gong u lu ru anum a ino. Pepetlai, ko nolin? Gong u sisio sur tu ino. 28 Ikut, ra un nolin, ausur u pam a sakino petutna. Ma ra tu toraro in nolin, ausur i pam a sakino petutna. Ikut, det ra det nolin det in taramo a susut na mamaut una nundet a nilaun, ra ka nemi sur mot in etorom a kum mamaut ri.

29 A kum tistising, a watungi lenri, a du bung i sa milau. Turpasi uniri, a kum musano ra det sa nolin, det in laun elar nam det ra ka det nolin. 30 Ma det ra det tangis, det in laun elar nam det ra ka det tangis. Ma det ra det gas, det in laun elar nam det ra ka det gas. Ma det ra det kukul, det in laun elar nam det ra kalako utna anundet. 31 Ma det ra det papam nama kum utna ra kuri upiso, det in laun elar nam det ra ka det nuknuk bing una kum utna ra. Uni a rakrakon bual ri dat laun uni, milau mo in rop.

32 A nemi sur mot in langolango gusun a kum nginara taginin upiso. A musano ra ke nolin, i balon una pinapam anun a Labino sur in ugasgas a Labino. 33 Ikut a musano ra i sa nolin, i balon una pinapam taginin una rakrakon bual, sur in ugasgas anun a ino. 34 A nuknukino ke takai, uni i nemi sur in ugasgas anun a ino ma a Labino kai. A ino ra ke nolin ma a toraro, i balon una pinapam anun a Labino. Anun a nemnem sur in pitar rop tar a pinino ma a niono torom a Labino. Ikut, a ino ra i sa nolin, i balon una pinapam taginin una rakrakon bual, sur in ugasgas anun a musano. 35 A watung a kum utna ri sur in uwakak anumot a kinkinis, ausur a turbat mot. A nemi lena mot in mur a tokodos na petutna, ma mot in pitar rop tar anumot a nilaun torom a Labino, ma gong a nuknukimot i wan gisen.

36 Ra tu musano i nuki lena ke tokodos anun a petutna torom a ino ra di sa ubek bat tari toromi, ma ra a kum kilalo anun a ino i sa wan tito, ma a musano ra i nemi lena der in nolin, i wakak in nolin kut nami. Ke pam a sakino petutna. Der in nolin kut. 37 Ikut, ra tu musano i tur dekdek una nuknukino sur gong i nolin, ma katu utna i ungongos tari sur in nolin, ma i ut i tamtamabat anun a nemnem, i kai i pam a wakak ino. 38 Lenra, a musano ra i nolin i pam a wakak ino, ikut i ra ke nolin, i ra i pam a wakak na petutna sakit tander.

39 A ino ra i sa nolin, a warkurai i kis toromi ra i ker tomo der nam anun a musano, ra anun a musano i laun utmakai. Ikut, ra anun a musano in mat, a ino ra in langolango sur in nolin melet nam taio ra i nemi, ikut in nolin ut nam taio ra i anun a Labino. 40 Ikut a ino ra, in gas doko ra in kis kut lenra, ma ken nolin melet. Iri a nuknuking, ma a nuki lena a Nion o God i kis un iau kai, ra i pitar tar a nuknuk ri tang.