1 Det rop ra det nurnur un o Iesu lena i a Karisito, det a kum nutnutun o God. Ma det rop ra det nem o Tamano, det nemi utkai a kum nutnutunu. 2 Ra dat nem o God, ma dat mur anun a kum warkurai, dat tasmani lena, dat nem a kum nutnutunu. 3 Ra dat nem o God, dat in mur anun a kum warkurai. Ma anun a kum warkurai, ke ngangitin sur dat in muri. 4 Uni det ra a kum nutnutun o God, det sa winim pas a rakrakon bual. A dekdek ra dat winim pas a rakrakon bual nami i lenri: anundat a nurnur. 5 Osi ra i winim pas a rakrakon bual? Det kut ra det nurnur un o Iesu lena, i a Nutun o God.

6 O Iesu Karisito i wanpat nam a danim ma a gap* A ramano kum tene mananos una Buk Tabu det nuki lena a danim i ukinalong a baptais ma a gap i ukinalong a minat.. Ausur i wanpat kut nama danim, i wanpat nama danim ma a gap. A Tokodos na Nion i wasiso talapor un o Iesu Karisito, uni a Tokodos na Nion i a lingmulus. 7 Ra a tul, detul wasiso talapor uni: 8 A Nion, a danim, ma a gap, anundetul a wasiso talapor i takai kut. 9 Dat ser nurnur una wasiso talapor anun a taro, ikut a wasiso talapor anun o God i labo sakit tano. Uni, una tulu utna ri, o God ut i wasiso talapor un o Iesu lena, a Nutunu. 10 Osi ra i nurnur una Nutun o God, i sa utur ukai a wasiso talapor anun o God un in balano. Ikut osi ra ke nurnur una wasiso talapor anun o God, i nuki lena o God a tene torotoro, uni ke nurnur una wasiso talapor anun o God una Nutunu. 11 Anun a wasiso talapor i lena: O God i sa pitar tar a nilaun tukum torom dat, ma a nilaun ra, kura un o Nutunu. 12 O naro ra a Nutun o God i laun uni, i utur ukai a nilaun tukum. Ikut o naro ra a Nutun o God ke laun uni, ke utur ukai a nilaun tukum.

13 A kum utna ri a tumusi torom mot, ra mot nurnur una risan a Nutun o God, sur mot in tasmani lena, mot sa utur ukai a nilaun tukum. 14 Ra dat wararing torom o God sur tu utna elar nam anun a nemnem, dat sa tasman mulusi lena, in longoro dat. Ra ka dat in ngara sur dat in saringi sur tu utna. 15 Ra dat tasmani lena, i longoro dat una kum utna rop ra dat sasaring suri, dat tasmani kai lena, in pitar asau ra dat saringi suri.

16 Ra taio in tama o tisino i pam a sakino petutna ra ke wan sur a minat, in wararing torom o God, ma o God in pitar a nilaun tano. A niaring ri in warut det ra anundet a sakino petutna ke wan sur a minat. Ikut ka watungi sur mot in wararing un det ra anundet a sakino petutna i wan sur a minat.† A ramano kum tene mananos una Buk Tabu det nuki lena a sakino petutna ra taio in mat tukum uni, ra i ipul ru o Iesu. 17 A kum petutna rop ra ke tokodos, a kum sakino petutna. Ikut a ramano kum sakino petutna ke wan sur a minat.

18 Dat tasmani lena det rop ra a kum nutnutun o God, ka det ser pam meleti mo a kum sakino petutna. Uni a Nutun o God i tamtamabat det ut, ra o Satan ke pet lar pasi sur in banlaulau det. 19 Dat sa tasmani lena, dat a kum nutnutun o God, ma a rakrakon bual rop i kis utuntudu ina warkurai anun o Satan. 20 Dat sa tasmani kai lena, a Nutun o God i sa wanpat, ra i tabor tar dat nam a mananos, sur dat in tasman o God ra i lingmulus. Dat laun un o God ra i lingmulus, uni dat laun una Nutunu, o Iesu Karisito. Ma i, a God ra i lingmulus, ma a nilaun tukum.

21 A kum nutnutung, mot in tamtamabat mot gusun a kum torotoro na god.