1 A kum wakak na paspasang, gong mot nurnur oros un taio ra i watungi lena a Tokodos na Nion i pitar tar a wasiso toromi. I wakak sur mot in lari munung a kum nion, ra det tagun o God o awu. Uni, a susut na torotoro na poropet kuri det una rakrakon bual. 2 Mot in tasman lele a Nion o God lenri: Det ra det watungi lena o Iesu Karisito i wanpat a musano mulus, det ra tagun o God. 3 Ikut det ra det ipul kut, ausur tagun o God. A nion ra, tagun a ebar anun o Karisito, ra mot sa longoro tari lena in nanpat, ma uniri i sa wanpat nin una rakrakon bual.

4 A kum nutnutung, mot anun o God, ma mot sa winim pas a kum torotoro na poropet, uni a Tokodos na Nion ra i kis un mot, i dekdek sakit tana nion ra i kis una taro tagun a rakrakon bual. 5 A kum torotoro na poropet det tagun a rakrakon bual, ma a wasiso anundet tagun a rakrakon bual, ma a taro tagun a rakrakon bual det longoro det. 6 Dat anun o God, ma osi ra i tasman o God i longoro dat. Ikut osi ra ausur tagun o God, ken longoro dat. Lenra dat in tasman lele a Nion ra i lingmulus, ma a nion ra i torotoro.

7 A kum wakak na paspasang, dat in nem etetalai dat, uni a marmaris i wan tagitiro tan o God. Det rop ra det marmaris, det a kum nutnutun o God, ma det tasman o God. 8 Osi ra ke marmaris, ke tasman o God, uni o God, i a kimkibin a marmaris. 9 O God i ese anun a marmaris torom dat, ra i tulu ru o Nutunu, ara sot kut, urin una rakrakon bual, sur in pitar a nilaun torom dat. 10 A marmaris i lenri: O God ut i maris mugu dat. Ausur dat, dat maris mugu o God, awu. O God i maris dat, ra i pitar ru o Nutunu sur in mat ra in ulangolango pas dat gusun anundat a kum sakino petutna. 11 A kum wakak na paspasang, o God i maris doko dat lenri, i wakak sur dat kai, dat in nem etetalai dat. 12 Katutaio utmakai i tama tar o God. Ikut ra dat nem etetalai dat, o God kuri un dat, ma anun a marmaris i bukus un dat.

13 Dat tasmani lena dat laun un o God, ma o God i laun un dat, uni i sa pitar tar a Niono tandat. 14 O Tamano i pitar ru o Nutunu sur in Tene Ulaun anun a rakrakon bual, ra met, met sa tama tari, ma met wasiso talapor uni. 15 Ra taio i wasiso puaso lena, o Iesu i a Nutun o God, o God i laun uni, ma i kai i laun un o God. 16 Ra dat ut, dat tasman a marmaris anun o God torom dat ma dat nurnur uni.

O God, i a kimkibin a marmaris. Osi ra i marmaris, i laun un o God, ma o God i laun uni. 17 Una kisapi ri, anun a marmaris i bukus un dat, ma ka dat in ngara una bung na warkurai, uni nin una rakrakon bual, dat laun elar nam o Karisito. 18 Katu nginara i kis una marmaris. Ra a marmaris in bukus un taio, in lakro ru a nginara. Ikut, ra taio i ngara, i ese i lena, anun a marmaris ke bukus, ma i nuki lena in iru una warkurai na minabalu.

19 Dat nem etetalai dat, uni o God ut i nem mugu dat. 20 Ra taio i watungi lena, “A nem o God,” ikut i nget a tisino, i a tene torotoro. Uni osi ra ke nem a tisino ra i tama i, ken nem lar pasi kai o God ra ke tama i. 21 I pitar tar a warkurai ri tandat, lenri: Ra taio i nem o God, in nemi kai o tisino.