1 Nenfugtane nasaraheta, tamagra ko kasegea antahita keta hu'nazanki ontahi'nazo, asimuma erino mani'nea vahera kasegemo kegva huntegeno mni'ne. Hagi frisigeno'a kasegemo'a kegva huontegahie? 2 Hu'neanagi avame kema huntena hanuana, mago a'mo'ma vema erisigeno'a, ana a'mofona kasegemo kina rentesigeno, nevema asimuma erinoma maninesigeno'a neve'ene manigahie. Hianagi nevema frisigeno'a, ana kasegemofo kinafina omnigahie. 3 Hagi neve'ma ofri mani'nesnigenoma ru vema erisiana agra monko avu'avaza hugahie. Hagi nevema fri sigeno'a kasegemo'a kina reontegahiankino, ru vema eri'sniana monko avu'avazana osugahie.

4 E'ina hu'negu, nafuhetane nasaraheta tamagra Jisasi'ene tragotaza zamo'a ko Jisasi'ene frita, kasegemofo agorga omni'naze. Hagi menina Jisasi'ma ko fripintima azeri otinemo'ene erimago huta Anumzamo'ma avenesia avu'ava zana hugahune. 5 Kumi tavutavamo kegva hurantenegeno'a, kumima hu' tavesizamo'a tagu'afina efore nehie. Hagi kasegemo'a havi tavutvamofo avesiza azeri otigeta, kumira hunkeno frizana avreno ne-e. 6 Hu'neanagi tagra ko kasegemofo kinafintira katuferantegeta fru huta mni'none. Na'ankure Kraisi'ene frunkeno mago'ene kasegemofo kinafintira tavre'ne. Hianagi menina amne Anumzamofo erizana erinenteta, korapa tavutva huta kasegefima krente'naza kemofo amage' antezanopage, Avamumofo kasefa kante vugahune.

7 Hagi na'ane hugahu'ne, Nagra kasegemo'a kumi me'ne nehufi? I'o. Tamage kasegea kumira omnene. Hianagi kasegemo kumira tamaveri nehie. Nagrama rumofo zankuma kenunu huzana, kumire hu'na antahi ama osuanagi, kasegemo eriama higena keama nehue. 8 Hianagi kumimo'a ama ana kasegefinti kankamunku keno tavu masevemahu tavesizana, tagu'afina erifore nehie. Kasegema omnesigeno'a kumimo'a hankave'a omanesigeno frigahie. 9 Kasegema ontahinorera nasimu erina mni'noane. Hianagi kasegema egeno'a kumimo'a asimu erino mni'gena nagra fri'noe. 10 Ana kasegemofo eri'zana vahemofo asimu ami'zanagi, nagra kasegefintira nasimura e'noruanki, kasegemo'a nahenefrie. 11 Na'ankure, kumimo'a kasegefinti kankamuma'a keno erifore huno renavatga higeno kumimo'a nahe frine. 12 Hianagi kasegemo'a ruotge higeno, kasegema hunte'neana ruotage huno fatgo huno knare hu'ne.

13 Hianagi inankna hugahie, kasegema knarezane nehuazamo nahe nefrifi? I'o, kumi'mo'a knare zampinti frizana erifore nehie. Hu'negu kumimo'a haviza hu'ne huno Anumzamo'a eritaveri higeta negone.

14 Hu'negu, kasegefina hazenkea omanene, na'ankure mopare navufga erina maninogu kumimofo kazokzo eri'za vahe' mizante atreankna nehie. 15 Nagra'ama nehua navunavara kena antahina nosue, na'ankure nagra fatgo zama hunakurema huazana nosue. Hianagi navesarama huntena osugahue huna huaza nehue. 16 Hianagi nagri'ma navenosia zama hanuna, Anumzamofo kasegemo knare hu'ne hugahue. 17 E'ina hu'negu nagrani'a kefozana nosuanki, kumimo nagu'afi me'neno ana kefozana nehie. 18 Higena nagra antahi'noe, knare zana nagu'afina omanene. Knare zana hu'nakure huna nentahuanagi anazana hugara nosue. 19 Nagrama knare'zama hugahue'ma huazana nosue, hagi havi'zama osugahue huaza nehue. 20 Hagi menima osnuema huazama nehnuna, e'i nagrani'a nosue. Hianagi nagu'afi kumimo me'neno anazana erifore nehie. 21 E'ina hu'negu nagrama kasegema koana, fatgo zama hunakure huazana kumimo tvaonire me'neankina ana zana nosue. 22 Nagra Anumzamofo kasegea ana miko nagu'areti navesinentoe. 23 Hianagi nagu'afina ru kasege me'nea zamo antahintahini'anena hara nehie, e'i ana kasegemo nagu'afi me'neno nazeri kumi'mofo kasegere kina vahe'nenante. 24 Nagra haviza huna keforenoanki, iza ama fri navufga naza hugahie? 25 Nagra Jisas Kraisi Rantimofompi Anumzamofona muse huntoe, Anumzamofo kasege antahintahiniareti amage nentuanagi, amega navufgamo'a kumimofo kazokzo eri'za e'nerie.