1 Hagi tagra na'ane huta hugahune, mago'ane kumira nehanukeno Anumzamo'a asunku hurantevava hugahio? 2 I'o anara osutfa hugahie. Tagra kumi'ma huzampina ko fri'none, nahigeta kumipina manita neone? 3 Hifi Jisas Kraisi enema mikamota hagerefita mono ti freankna huta friteta, oti'nazana tamagra ontahinazo? 4 E'ina hu'negu tagra mono tima fronazamo'a, Kraisi ene frunke'za aserente'naze nehie. Hagi Kraisima fripintima azeri oti'neaza huno, Nefa'a Agra'a hankave'anu fripintira tazeri otine. Higeta tagranena kasefa manizampi mni'none.

5 Tagrama Kraisi ene hagerafita frinonema hanuta, anahukna huno tagri'enena tazeri'otisigeta tasimura erigahune. 6 Tagra antahinone kumi tavutavazana Jisasi'ene rugeka zafare hantigeno, kumimofo hankavea tagripintira eritrene. Tagra mago'ane kumimofo kazokzo eri'za vahera omani'none. 7 Na'ankure iza'o fri'nemo'a, kumimofo kinafintira katufentegeno fru huno mni'ne. 8 Hagi tagra Kraisi'ene frisuta, tamentintima hunana tagranena Kraisi'ene manigahune. 9 Tagra ama ana zankura antahi'none. Na'ankure Kraisi'a fripintira oti'neankino, mago'anena ofrisigeno fri'zamo'a kegva huontegahie. 10 Agra magoke zupa frino kumimofo hankave eritrene. Hu'neanagi Agra menina asimu erino mni'neankino, ete mago'enena ofrigahie. 11 Hagi tamagra 'a refko huta antahiho, ko kumimofo hankavefintira fri'none huta nehuta, Kraisi Jisasimpi, Anumzamo'ene kasefa huta mani'none huta hiho.

12 E'ina hu'negu atrenkeno amega tmavufgamofona kumimo'a kvagrioramantena, tavufgamofo havi avesizana ovaririho. 13 Atrenkeno mago tmavufgamo kumimofo eri'zana e'norina, Anumzamofo tamavufga ami vgareho. Na'ankure tamagra ko fri'nazane, hu'neanagi menina kasefa maniza erita mani'naze. Hagi ana miko tamavufgamo'a knare'zama eriforehu erizaza me'nenkeno, Anumzamofona ragi amino. 14 Na'ankure kasegemofo agorga'a omni'naze. Hagi Anumzamofo asuntgi zamofo agorga'a mni'nazagu, kumimo'a kva huormantegahie.

15 Mago'ene kasegemofo kvafina omni'none. Anumzamofo asunku'zamo taza hu'ne. Ana hu'negu mago'ene kumira hugahumpi? A'o, ana osugahune. 16 Tamagra amage antegahune hanaza zamofo kazokzo eri'za vahe'ma mni'nazana ontahi'nazo? Tamagra amne kumimofo kazokzo eri'za vahera manigahazanagi, ana zamo fri kante tamavreno vugahie. Anumzamofo amage antesutma fatgo nomaniza erigahaze. 17 Anumzamofona muse hunteho, korapara kumimofo kazokzo eri'za vahe mani'nazanagi, menina tamagu'areti rempima huramuazana amage'nentaze. 18 Menina kumimofo kazokzoma hu' kinafina omani'naze. Hagi tamagra fatgo zamofo kazokzo eri'za vahe mani'naze. 19 Na'ankure vahe'motama kefo tavu'tvama nehunazante, nagra antahintahitamia eriama hu'naku kazokzo eri'za vahete ene kva vahetera hunte'na nehue. Korapara kasege ha'nentagita agru huno avu sese osu tamavutamava huta vu'nazanagi, menina atretma fatgozamofo kazokzo eri'za vahe nemnita, agru nehutma ruotge huta manigahaze.

20 Hagi kumi'mofo kazokzo eriza vahema mni'nazageno'a fatgo avu'ava zamo'a kina reormantenie. 21 E'ina hu'negu nankna tamazahuza erinaze? Ko'ma hu'naza tamavutamava zamo'a menina tamagaze nehie. Ana avu'avazamo'a friza erifore nehie. 22 Hu'neanagi menina kumimo'a kina reoramantegetma Anumzamofo kazokzo eri'za vahe'a mani'nazageno, e'i ana avu'avazampinti tamazahu'zana enerizageno, sese huramanteno tamazeri ruotage huno, manivava tamasimu tamamigahie. 23 Na'ankure kumimofo mizana fri'zane. Hu'neanagi Anumzamofo muse'zana, Kraisi Jisasi Rantimofompi mago'za hunterompge, amne manivava asimura tamine.