1 Ama anazama evutege'na, nagra kogeno, mona kafamo'a anagino ruhagro higeno, ese ageruma antahi'noa agerumo ufe krafa hiaza nehigena antahugeno, Nagrikura anage huno hu'ne, Amare egena, amazama evanigeno, henkama fore'ma hania zana kaveri haneno. 2 Anage nehige'na ame hu'na nagra avamupi mni'nena koana, mona kumapina kini tra me'negeno, mago'mo ana kini tratera mni'nege'na ke'noe. 3 Ana ne'mofo msa'amo'a rumsa huno jasapa havegna nehuno, koranentike huno konilienie hu'za nehaza havegna hu'ne. Mago furage'namo kini tramofona rugagintegeno, zafa asinage huno emerelie nehaza havegna huno remsa hu'ne. 4 Ana kini tramofona 24'a kini tratami manegorave huntegeno, ana 24'a kini tratera ugota kva vahe'mo'za mni'ne'za, efeke zaza kukena hu'za, kolire kini fetori zmasenirera antani'naze. 5 Ana tra'ma me'nefintira trage huno ko psina enerino, tusi'a monage nehigeno, kini tramofo avuga 7ni'a tavi tevemo'a hagana hagana huno te'ne. E'i ana 7ni'a tevema hagana hagana huno nereana, Anumzamofo 7ni'a Avamutami me'ne. 6 Hagi ana kini tra'mofo avuga, kapoteti tro huntageno msanetake huno rumarave nehiankna hageri me'geno, ana kini tramofo amu'nompine ruga ruga, 4'a asimu anteno mni'nea zgaramina, zmavugane zmefika zmavurgamo'a avite'nea zgamo'za mni korave hu'nazage'na zmage'noe. 7 Ese'ma mani'nea zgamo'a Laionigna higeno, anante zgamo'a kaogna higeno, nampa 3zgamofona vahe avugosagna higeno, nampa 4zgamofona hareno vano nehia tumpamofo avugosagna hu'nea zga ke'noe. 8 Hanki anama kasefa huza maninaza 4'a zgamofona, mago magomofona 6si'a agekona huzmantegeno, zmagekonamofo fenkaga kizigane zmavugane zmefi'enena zmavurgamo'a hakare huno avitenege'za, ontagane'za zgene hanine anage nehaze, Ruotage hu'nane ruotage hunane, Ra Anumzamoka Ruotgera hunane, Hanavenentake hunka, Ko maninenka, menina mni'nanankinka, henka egahane nehaze. 9 Hanki anantema zmasimu anteza mni'naza zgamo'za, kini tratema mani'nea Ne'mofo husga hunte'za, ra agi nemi'za, susu hunte'za Agra manivava hugahie hu'za agia erisaga huvava nehazageno, 10 ana 24'a ugota kva vahe'mo'za, kini tratema mani'nea Ne'mofo avuga zmavugati zmarena omere'za umase'za, manivava nehia Nera mono hunente'za kini fetorira, ana kini tramofo avuga zafi netre'za, anage nehaze: 11 Kagrake knare hunka marerinane, tagri Ra maninka, tagri Anumza mni'nane, Kagrake rankagia e'nerinka, kagia erisaga nehageno, hanavekamo'a mrerinie. Na'ankure Kagri kavesite maka zana efore huno me'ne, hu'za hu'naze.