1 Nanterame ranra prisi mono kva vahe'mo'zane, ranra kva vahe'mo'zane, kasegere ugagota hu'naza vahe'mo'zane, maka kanisol vahe'mo'za, ame hu'za ome atru hute'za, Jisasina nofi kinte'za avre'za Paeroti ome ami'naze. 2 Paeroti'a agenoka huno, Kagra Jiu vahe'mokizmi kini mani'nano? huno Jisasina antahige'ne. E'ima kagra nehanane huno Jisasi'a hu'ne. 3 Anante ranra prisi kva vahe'mo'za, Jisasinku rama'a haviza hu'ne hu'za hunte'naze. 4 Paeroti'a mago'ane agenoka huno ko, Kagrira rama'a ke hunegantazanki, Kagra ke zmirera kenona hugahampi? 5 Hianagi Jisasi'a ana kemofo nona'a osu mani'negeno, Paeroti'a tusiza huno antri nehuno agogogu hu'ne.

6 Kafune kafune Anumzamo kinafinti zmavre'nea knama egeno'a, Paeroti'a kina vahepintima zmavesimofonku hazageno kazufe netrea kna e'ne. 7 Hagi ana knafi mago nera Barabasi'e nehia ne'ene, mago'a kamani vahe'mozane ha' hu'naza knafi, vahe zmahe frinaza zanku kina huzmante'naza vahe'ene anampina mani'naze. 8 Hagi maka vea'mo'za Paerotinte e'za, ana kna'ma egeno nehiaza huno kina vahe katufe atresnigu antahige'naze. 9 Anante Paeroti'a kenona huno anage hu'ne, Jiu vahe kini ne' katufe tamisuegu tmave'nesio? 10 Na'ankure agra, ranra prisi kva vahe'mo'za kanive renente'za, avare'za eme ami'zama'a ko antahi'ne. 11 Hianagi ranra prisi kva vahe'mo'za maka vahe zmarimpa rekehu'za, Barabasi kazufe tamiho hutma hiho hu'za zmasami'naze. 12 Anante Paeroti'a mago'ene kenona huno, Jiu vahe kinie hutma nehaza nera, na'a huntesuegu tmave'nesie? 13 Hige'za ete mago'ane kezati'za, aheta kekazafare hantiho hu'naze. 14 Hianagi Paeroti'a anage huno zmasami'ne, na'a kefoza hune, inankna kefoza hu'negeta aheta hantiho nehaze? Hianagi zmagra mago'ene ranke hu'za, ahe friho hu'naze. 15 Na'ankure Paeroti'a ana maka vea'mokizmi zmarimpamo so'e hania kazigati, Barabasi kazufe nezamino, Jisasina sefu amiho hige'za, sefu amitazageno keka zafare ahe'za hantisagu avrezmi'ne.

16 Anante sondia vahe'mo'za avare'za mrerisa kumapi ufre'naze. (E'i ana kumara Gavana ne'mofo kumapi) maka Roma sondia vahetamina ome ke hutru hu'naze. 17 Zamagra fitunke kukena hunente'za, ave'ave nofite kini vahe'mokizmi fetorikna huza fetori tro hu'za asenire antaninte'naze. 18 Kezanke hunte'za, Jiu vahe'mofo kinimokagura muse hugantone. 19 Mago'ane kno eriza asenire nemasagi'za, zmavetu ahenente'za, zmarena renamagiza, pri hu'za havi mono hunte'naze. 20 Zamagrama azanava anteteza fitunke kukena erizafi netre'za, ete Agri kukena eri huntete'za, keka zafare aheza hantinaku megi'a avare'za vu'naze.

21 Sairini kumateti ne' Saimoni, (Aleksendane Rufusikizni neznafa) fegu'ati enevige'za, keka zafa'a erio hu'za hunente'za kofintageno eri'ne. 22 Jisasina avare'za Golgote nehaza agonare uhnati'naze. (Tagri kefima rukrahe'ma hanunana, anu zaferine hu'ne.) 23 Anante waini tine mere zafa arima'ane magopi taginte'za eri havia hute'za tagiami'zana, one atre'ne.

24 Hagi rugeka zafare ahete'za, mago'mo tagatere simo erisie nehu'za taisi zokogo re'za kukena'a refko hu'naze. 25 Nanterama zage hanatino 9 kiloki hige'za, Jisasina rugeka zafare ahe'naze.

26 Ahe'naza nanekema avoma krente'nazana, JIU VAHE'MOKIZMI KINI NERE, huza krente'naze. 27 Ana nehu'za tare kumzafa netrena magoka znahe'za, magomofona azantmaga'a nehantiza, magomofona hoga'a hanti'naze. 28 [Ana nehzageno korapa'ma Anumzamofo avontafepi kre'nea kemofo avufga'a efore' hu'ne. Ana kemo'a, hazenke vahe'kna hugahie hu'ne (Aisa 53:12)]. 29 Hagi anante'ma vute ete nehu'za vahe'mo'za azanva ke hu'za, Oho! Kagra ra mono nona tapage hunka tagufa knafi kigahue hu'nana nere, nehu'za zmage'na ru'naze. 30 Kagra ka'a kaza hunka keka zafaretira eramio, hu'naze! 31 Anahukna hu'za ranra prisi kva vahe'mo'zane kasegere ugagota hu'naza vahe'mo'za, azanva ke hunte'za, ru vahe azama nehiaza huno Agra'a aza osugahifi? 32 Atregeno Kraisi'a Israeli vahe'mokizmi kini ne'mo'a, keka zafaretira menina eraminketa negeta, tamentinti hamaneno! Tare ne'trema keka zafare'ma ahe'za hanti'naza ne'tremokea, anazanke huke Jisasina azanava ke hunte'na'e.

33 Ana knazupa zgemo'a anuntu age higeno, maka ana mopafina hanimo refitegeno vuno kinaga 3 kiloki higeno rumsa hu'ne. 34 Tri (3) kiloki higeno Jisasi'a agra kefi ranke huno kezatino, ELOI ELOI LEMA SABATANI? Ana kemo'a anage hu'ne, ANUMZANIMOKE ANUMZANIMOKE, NAHIGENKA KAMAGENA HUNENAMINE? (Sam-Zga 22:1)

35 Hanki tva'onte mani'naza vahe'mo'za nentahi'za, anage hu'naze, antahiho, Ilaijanku ke nehie hu'za hu'naze. 36 Hagi mago'mo aga reno vuno mi'mi'tata hu'nea waini timpi kapukua ome reteno, zotare vazigase huno erino Jisasi nesigu eme nemino anage hu'ne, atrenenketa Ilaijama eme avarefenka atresigura kamneno! 37 Hianagi Jisasi'a ran krafa nehuno, vgare asimu anteteno fri'ne. 38 Ana nehigeno ra mono nomofo agu'afi hanti'naza tvaravemo, anagamuti ruhakeke hutare huno henkamu erami'ne. 39 Hanki 100teti'a sondia vahete kva (centurian) ne'mo Jisasina avuga mani'neno nefrino hiazana keteno, anage huno hu'ne. Tmage e'i nera Anumzamofo Mofavre mani'ne huno hu'ne! 40 Mago'a anemo'za ogantu'a mani'ne'za uruha ke'naze. Ana a'nefina, Makdala kumateti Meriki, Saromeki mago Meri'a (osi Jemisine, Josefekizni neznareraki) hu'za mani'naze. 41 Ana a'ne zgamo'za Jisasi Galili mopare mani'nege'za amage nente'za aza nehaza ane zgane, mago'a anampina Jerusale ne-ege'za avaririza e'naza ane zgane mani'naze.

42 Anazama fore hu'neana Frante zupa kinage. Mni fru hukna esigu (Sabat) retro tra nehaza kna e'ne. 43 Arimatia kumateti Josefe'a koro osu hanave enerino, Jisasi avufa'ama erisigu Paeroti ome antahige'ne. (Ana nera kanisol vahepina agi me'negeno, Anumzamofo Kuma esigu nentahino aveganentea nere.) 44 Jisasima frine higeno'a, Paeroti antri nehuno, 100teti'a sondia vahete kva (centurian) ne' ke huno frinesigu antahige'ne. 45 Ana sondia kva ne'mo hago fri'ne huno Paerotina asmigeno, knareki avufga erinka vuo huno Josefena hunte'ne. 46 Josefe'ma efeke tavrave miza huno avufa'a eri mopafi atreno, ana efeke tavravenu kazrinteno, havefi frage'za tro hunte'naza kerifi ome asenteno, have rekrehe huno kama efrete runkni re'ne. 47 Makdala kumateti Meriki, Meri Josefe nereraki huke anama asentea kumara ke'na'e.