1 Anumzamo Israeli vea kinafinti zmare'nea knagu antahimi'za zo'ore breti nenaza kna zahufa tare zgegna me'nege'za, ra mono kva vahe'mo'zane, kasegere ugagota hu'naza vahe'mo'za, Jisasi havige hunte'za oku azerizama ahesaza kanku hake'za ahe fri'naku huge antahige hu'naze. 2 Na'ankure mafka vahe'mo'za ana ne'zama (pasova) nenaza knare'ma ana'ma hanunke'za, ke hakare nehu'za ha' azeri oti'za hugahaze.

3 Jisasi'a Betani kumate ko fugo namure'nea ne'mofo Saimoni nompi, zmaza tununte manine'za trateti ne'za nenageno, mago a'mo zago'amo'a mareri'nea, mananentake masave zafa rafunareti tro hu'naza, alabasta tafempi erino e'ne. Ana tafe avaza'a runagino Jisasina anumpi taginte'ne. 4 Hianagi mago'amo'za anampi mani'namo'za zmasigu nehu'za, zamagra zmagra anage hu'naze, na'a higeno ana masavena amne tagi netre? 5 Mizante atreta 300ti'a zago nazana erita zamunte omane vahe zmuntesine. Hianagi nahigenka amnefina tagi netrane? Ana nehu'za ana ara kesu'naze. 6 Hianagi Jisasi'a amanage huno zamasmi'ne, atrenkeno manino, nahigeta ama ara kna nemize? agra knare so'eza hunenante. 7  Hianagi zamunte omane veara, hakare kna tamagra ne maninenageta, ina knare'ma, knare tmavu tmavama huzmante'nakuma hanutma, amne huzamantegahaze. Hianagi Nagra hakare kna tamagra nena omanigahue. 8  Agra nazano hunantenaku hiazana hago hunante. Kerifima ufresugu masave frenanteno retro hunante. 9  Nagra tamage hu'na neramasamue, inantego knare musenkeni'a, eri'za kokankoka ome huama hanarega, ama a'mo hu'nea avu'avamofo agenkea, nehnage'za antahigahaze.

10 Tuelufu'a amage'ma nentaza disaipol nagapinti, Judas Iskarioti'a Jisasina komoru huno avrezamisia naneke vugota mono kva vahera ome zmasami'ne. 11 Ana nanekema nentahiza muse hunte'naze. Judasina zago kamigahune hu'za huvempa kea asamizageno, Jisasima komoru huno ha' vahe zmazampi avare'zamisia, kanku agafa huno hakre'ne.

12 (Zo'ore breti nenaza kna efore higeno) e'se knazupa kinafinti Anumzamo'ma ozmahe zmagatere'nea kna antahimiza sipisipi afu anenta aheza kre sramna nevaza knazupa, Jisasima amage nentaza disaipol nagamo'za anage hu'za antahige'naze, inantega Kagrira kinafinti zmavre'nea knagu antahimi'za nenaza (Pasova) ne'zana retro hugantesunegu kvenesie? 13 Jisasi'a tare disaipol ne'tre amage'ma nentaza nagapinti znasmi'no, Jerusale kumapi ufresakeno'a, mago ne'mo ti fi kavofi tifino ne-enketa ome tutagiha huntesuta, ana ne' avaririta vugaha'e.

14  Ana ne'mo ina nompino umrerisiana, ana nomofo nefana amanage huta antahige'o, Rempi hurami ne'mo'a kagriku huno, inantega disaipol nagania'ne Anumzamo ozmaheno zamagtere'nea zanku antahimiza nenaza nezana, kankmuna me'nea negahuno hu'ne? 15  Hanunkeno'a mago hunaraginte nomofo anaga kaziga, ra kakamu me'nesifi agra tanaveri hugahie. Anampina ne'zane sipa ko retro hunte'naze. Ana nompi mareritna nezana ome retro huranteho. 16 Anage hige'ne ana netre moke vu'ne, rankumate vu'na'e. Anante Jisasi'ma znasami'nea kante fore higene ke'na'e. Anumzamo ozmahe zmagatere'nea knagu antahimiza nenaza ne'zana ome retro hu'na'e. 17 Kinaga sege'za, Jisasi ene amagema nentaza 12fu'a disaipol naga'ane e'naze. 18 Ne'zane sipare mani'neza ne'za nenageno, Jisasi'a amanage huno zamasmi'ne, tamage hu'na neramasamue, amafima magoka nezama nenompinti, mago'moka komoru hunka ha' vahe zmazampi navrentegahane. 19 Zmarimpamo'a ana kegu kna nehige'za, mago mago'mo'za nagra anara osugahue hu'za hutere hu'naze! 20 Jisasi'a kenona zmire amanage huno zmasami'ne, 12fu'a nagamotafinti, Nagrane magoka zompafinti breti areno nenesnimo'e. 21  Na'ankure Anumzamofo avontafepi krente'nea kante, Vahe'mofo Mofavremo'a vugahie. Hianagi Vahe'mofo mofavrema komoru huno ha' vahe zmazampima avrente'simo'a, knaza erigahiankina nasunku huntoe. Nererama kase onteasina knare'zantfa hisine!

22 Ne'zama nenageno, Jisasi'a mago'a breti erino Anumzamofo antahigegeno asomu huntegeno, tamanasino nezmino amanage huno zamasmi'ne, Ama'i Nagri navufe, erita neho. 23 Hagi waini tintafe erino Anumzamofo nunamu huno antahigegeno asomu huntegeno, zamige'za maka'mo'za anampinti ne'naze. 24 Nenageno amanage huno zamasmi'ne, ama'i Nagri korane, ama ana koramo Anumzane huhagerafita manisaza manizana eri kasefa hugahie. Maka'mofonku huno tagine. 25  Tamage hu'na neramasmue, Ama waini ragamofo tima'a mago'ene one'na henka'a Anumzamofo kumapi kasefa waini negahue.

26 Mono zgame hute'za, atirami'za Olive Agonarega vu'naze.

27 Jisasi'a amanage huno zamasmine, tamagra makamota natreta fregahaze. Na'ankure Anumzamofo avontafepina amanage huno krentegeno me'ne, Anumzamo'na sipsipi afu kva vahe'mofona, ahanena sipsipi'mo'za panani hu'za ufre efre hugahaze hu'ne. (Sek 13:7)

28  Hianagi fritena otisuna, tamagrira vugota hurmante'na Galili vugahue. 29 Pita'a anage huno Jisasina asami'ne, mika'mo'za katre'za vnazanagi, nagra katrena ovutfa hugahue. 30 Pitana kenona Jisasi'a amanage huno asmi'ne, Tamage hu'na negasamue, meni kenagera tare zupa kokoremo'a krafa osu'nesigenka, tagufa zupa Jisasina onke'noa nere hunka vahane hugahane. 31 Hianagi Pita'a agra'a kere hu hankavetino, vahane huogantegosue nehuno, amne kagranena frigahue huno hu'ne. Hige'za mika'mo'za ana kege'za hu'naze.

32 Jisasi'ene amage nentaza disaipol naga'mo'za Getsamenie nehazare ehnati'naze. Anante Jisasi'a zmasamino, amare mani'nenkena nunamuna haneno.

33 Anante Pitanki, Jemisinki, Joninki huno zmareno nevigeno, agu'amo'a tusi'gna nehigeno, asunku hu'ne. 34 Jisasi'a amanage huno zamasmi'ne, nagu' namemo'a tusi kna navenesino nahe friza nehianki, amare mani'neta kva hiho. 35 Nehuno osi'a vugamuteno mopafi vutrakahu maseno, Anumzamofonte nunamu ome nehuno, knare'ma hanigeno'a, ana knamo'a evu nagateresie hu'ne. 36 Agra huno, Aba, Nfanimoke! Maka'zana amane hugahane, ama kapua eri atro, Nagri navesira ovarario, Kagra kavesi avaririo. 37 Ana huteno eno eme amagema nentea disaipol nagama zmageana masenageno, Pitanku amanage huno antahige'ne, Saimoniga kavu mase'nano? Knare osi'agnafina kva krigahampi? 38  Kvahunka maninenka, nunamu nehunka revatgazama esifina evuoramio. Avamumo'a avenesianagi, avufamofona hanave'a nomane. 39 Ete mago'ane vuno, anahu kna nunamu ome hu'ne. 40 Agrama mago'ene ete eno eme zmageana, mase'nagenokino zamuma hari huzamo'a kna huzmante'ne. Na'ane huta ke'arera hugahune hu'za kegura hake'naze. 41 Jisasi'a mago'ene tagufa zupa zmagrite eno, amanage hu'ne, tamavu nemseta manigasa nehazo? Ha vgare! Nagrira knani'a ama eanki keho. Vahe'mofo Mofavrea kumi vahe'mokizmi zmazampi komoru hu'za avrente'gahaze. 42  Otinketa tagra vamenno! Keho Nagri'ma komoru huno ha' vahe zmazampima navrentesia nera, ama erava'o nehie.

43 Anankea huvga ore'negeno, amage'ma nentaza 12fu'a disaipol nagapinti mago'zmimo, Judas Iskarioti anante ehnatine. Agri'enena sondia vahe'mo'za kaziknone, kumpa kno zmine eri'neza, prisi kva vahe'mo'zane, kasegere ugagota hu'naza vahe'mo'zane, ugota kva vahe'mo'za huzmantege'za e'naze. 44 Judasi'a ha' vahe zmazampi komoru huno avrezmi ne'mo anage hu'ne, amanahu avame'za hugahuanki keho, ome agi'ma antakoma hanuana, e'i ana neki ome azerita kegva huta avreta viho. 45 Judasi'ma anantema ne-eno'a, Jisasinte hantka huno vuno, Hurami Nemoke, nehuno agira antako hu'ne. 46 Anante mafka vahe'mo'za zmaza ante'za, azeri'naze. 47 Anante otinazafinti mago'mo kazinknoma'a erisaga huno, ugagota prisi ne'mofo kazokzo eriza ne'mofo agesa rukfri atre'ne. 48 Jisasi'a amanage huno zmasami'ne, Nahigeta Nagri nazeriku kazintamine kumpa knontaminena enerita kumzafa vahe zmazeriku nehzankna hutma neaze? 49  Maka knane knane, ra mono nompi rempi huneramugeta, naze'ori'naze. Hianagi amama fore'ma nehizana, korapa avontafepi kre'nea kemofo avufga'a fore nehie. 50 Anage nehige'za amage'ma nentaza nagamo'za, atre'za koro fre'naze. 51 Mago nehaza nera amage anteno vu'nea ne'mo, mago'a kukena osu'neanki zaza kukenage'za hu'nea ne' azeri'naze. 52 Hianagi ana zaza kukena'a ruzafi atreno, avufa avapa koro fre'ne.

53 Jisasina avare'za ugagota prisi kva nete vzageno, ranra prisi kva vahe'mo'zane ranra kva vahe'mo'zane, kasegere ugota hu'naza vahe'mo'za atru hu'naze. 54 Pita'a, Jisasina amefi afete avaririno, ugagota prisi ne'mofo kumapi ufre'ne. Teve hegare'nare avufa ome tonehino ha' kva vahe'ene umani'ne. 55 Ugagota prisi vahe'mo'zane, maka kanisol vahe'mo'za Jisasina havige hunte'za ahesnaza ke agafa'agu hakre'naze. Hianagi magore hu'za ke'za eri fore'osu'naze. 56 Rama'a vahe'mo'za havige hunte'nazankino, ana ke zmimo'a magoke kantera ovu'ne.

57 Mago'a mo'za oti'za amanage hu'za havige hunte'za, 58 tagra nentahunkeno ama ne'mo anage hu'ne, ra mono nona vahe'mo zmazanuti ki'naza no tapage hunetrena, tagufa knamofo agu'afi vahe'mo azanuti onki'nea mono no ru kigahue hu'ne. 59 Hianagi kezamimo'a fatgo osu'ne.

60 Anante ugagota prisi kva ne'mo zamuga otino, anage huno Jisasina antahige'ne, na'ane hunka kezimirera huzmante'gahane? Na'anku Kagrira keaga hunegantaze? 61 Hianagi ke nona'a osu akoheno mani'negeno, mago'ene ugota prisi ne'mo'a antahigeno, Kagra Kraisigo, Mrerisa Anumzamofo mofavremokafi? 62 Jisasi'a huno, E'i Nagre kagra negesankeno, Vahe'mofo Mofavremo Anumzamofona azantmaga kaziga manino hampompi tusi'a hanave'ane egahie. (Eks-Utr 3:14, Sam-Zga 110:1) 63 Anankema nentahino, ugota prisi ne'mo agra'a kukena eri tagato nehuno anage hu'ne. Na'anku mago'enena keagama hufore hunte vahekura hakegahune. 64 Hagi tamagra nentahizageno Ramofona huhaviza hunte'ne! Tamagra na'ane hutma hugahaze? Makamo'za huza Anumzamofo huhaviza hunteankino frisie hu'za hunte'naze. 65 Anante mago'amo'za zmavetu ahenente'za avu kisu hune'za, zmaza knonu nehe'za, Kagra kasnampa ke hunka, iza negahefi hufore huo. Mago'a ha' kva vahe'mo'zanena avregantu atre'za avugosafi ahe'naze.

66 Pita'a ufenkamuteno kva nemofo kumapi mani'negeno, anante ugagota prisi nemofo eri'za mofane zgafinti mago'mo e'no, 67 Pita'ma teve tonehino mani'negeno eme negeno'a, kagranena Nazareti kumateti Jisasi'ene vanoma nehana ne' mani'nane hu'ne. 68 Hianagi Pita'a vahane huno, nagra antahina kena osu'nogenka nehane! Anante kama emrerite nevigeno mago kokorege hu'ne. 69 Ete ana mofa'mo mago'ene Pita negeno anante oti'naza vahe zmasmino, e'i nera Jisasi amage anteno vano nehia nere huno hu'ne! 70 Hianagi ete Pita'a, mago'ene vahane hu'ne. Anante oti'naza vahe'mo'za, osiagna manige'za Pitanku anage hu'za, tamage kagra mago zmimoke. Na'ankure Galili ne' tfa mani'nane. 71 Anante Pita'a ontahinoa neku nehaze nehuno, nagra tamage ana nekuma havigema hanenkeno'a, huvempa huankino Anumzamo nazeri haviza hanie huno, 72 nehigeno, ame huno mago'ane anante kokorege nehigeno, Pita'a, Jisasi'ma asmi'nea kegu agesa antahi'ne. Tare zupa kokorege osunenigenka, tagufa zupa Nagrikura onkenoe hunka vahane hugahanema huno asami'nea kegu agesa nentahino zavite'ne.