1 Ventefi vu'za Galili timofo kantu kaziga'a Gerasin uhnati'naze. 2 Anama Jisasi'a ventifinti eneramigeno, agru osu havi avamumo agu'afi fre'nea ne'mo, ame huno hezamopinti (matipinti) tutagiha huntene. 3 Ana ne'mo vahe asenentea kumapi mani'nege'za, mago vahemo'e huno azerino anaki ontege, seni nofinu anaki onte'ne. 4 Na'ankure ana ne'mofona azeriza seni nofi'nu azampi kina renentaza aeni agare azantera kina rente'naze. Hianagi ana ne'mo'a azampine agafinema rente'nea nofira rukampruhu osi osi hu'ne. Ana higeno mago vahe'mo'a hanaveti'za azeriarava hugara osu'naze. 5 Mika zupa hanine, zagene vahe asenentaza kumapine agonaregane vano nehuno, rankege huno, have erino avufa tagarago hu'ne. 6 Jisasi'a afete mani'negeno ana ne'mo negeno, agareno agafi ome renareno, 7 anante ranke huno kezatino, Jisasiga marerisa Anumzamofo Mofavremoka, na'a hurante'za nehane! Nagra Anumzamofo agifi huhanavetina negasamue, tazeri havizana osuo! 8 Na'ankure Jisasi'a havi avamumofonku atiraminka evuo huno hu'negeno'e! 9 Jisasi'a kagi'a iza'e huno antahigegeno? Nagini'a hakarena mani'noe, na'ankure tagra rama'a sondia vahe mani'none. 10 Jisasiga amafintira hurantegeta atreta ovamneno huno kazikazi huno asami'ne.

11 Agonamofo asoparega rama'a afu'mo'za ne'za nene'za mani'naze. 12 Ana havi avamumo'za kazigazi hu'za antahige'za, tataregeta antu afutamimofo zmagu'afi uframaneno hu'za hu'naze. 13 Jisasi'a knareki viho huno ana havi avamutamina huzmantege'za, ana ne'mofo agu'afinti atirami'za, afu'mokizmi zamagu'afi ufre'naze. Ana maka afu'tamina 2 tauseni'a afu'mo'za agonaregati tragi'za uramiza timpi takaure'za ti nakri'za fri'naze.

14 Afu kva vahe'mo'za anazanku koro nehu'za, fre'za vu'za rankumate'ene osi kumate'ene ke huganti hugma hu'za vahe zamasmi'naze. Nezmasmige'za ana veamo'za nentahi'za ana'ma hu'neaza kenaku eri hantage'za e'naze. 15 Jisasintega e'za eme kageno havi avamu'mo'ma agu'afi fre'nea ne'mo'a anante mani'negeno ke'naze. Kukena nehuno fatgo antahintahi erino mani'nege'za, rama'a havi avamumo agu'afi fre'nea nere nehu'za koro hu'naze. 16 Hagi ana nete fore nehuno afute fore hu'neaza ke'naza vahe'mo'za, onke'naza vahe'mokizmi zmasmi vgarage'za antahi'naze. 17 Ana vahe'mo'za Jisasinku hankavetiza, ama mopa atrenka vuo hu'za hunte'naze. 18 Hagi Jisasi'a ventefi marenerigeno havi avamumo agu'afi fre'nea ne'mo'a, natregena kagrane va'neno huno antahige'ne. 19 Hianagi Jisasi'a nagranena ovugahane nehuno, anage huno asami'ne, kumakarega vunka, vahe ka'afi Ramo'ma asunku'ma huganteno, razama so'eza hugante'nea zankura ome zmasamio. 20 Anage huno asamigeno atreno Dekapolisi 10ni'e nehaza kumate vuno Jisasi'ma knare huno aza hu'nea nanekea zamasmige'za, maka vahe'mo'za nentahi'za antarintru hu'naze.

21 Hagi Jisasi'a ete ventefima vuno kantu kaziga Galili tiru ankenare umahnatige'za, hakare veamo'za agrite e'za eme regagi ante'naze. Anama hazazanku Jisasi'a anante mani'ne. 22 Anante osi mono nonte kva vahe zgafinti mago nemofo agi'a Jairasi'e nehaza ne'mo, eno Jisasima eme negeno, agafi emaseno, 23 muse hugantoanki, osi mofa'nimo'a fri'za higena neonki, enka kzana eme antegeno ofrino manino huno antahige'ne. 24 Jisasi'a agrane nevigeno tusi'a vahe krerfamo'za otufe atufe hu'za vu'naze.

25 Mago ara korankri 12fu'a zage kafufi eri'nea a'mo anampi mani'ne. 26 Zgo afufenoma'a ana krimoma vagarentesigu atrevgareno rama'a tusa vahe'mofo ome miza hu'neanagi, atage'za amizageno ana kri'amo'a vgaore erirahu'ne. 27 Hagi ana a'mo Jisasi agenke antahiteno tusi vea kevufinti, Jisasina amefiti zaza kena'are eme avako hu'ne. 28 Na'ankure antahintahi afina kukena'are ome avako hanugenoke kri'nimo'a atrenantegahie huno nentahino, 29 ome avako higeno ame huno korankrima eri'neazamo'a atrente'ne. 30 Hagi Jisasina mago'a hanave'amo nevigeno nentahino, ame huno ana vahe kevufi rukrahe huno anage hu'ne, kena ni'arera iza avako hu'ne? 31 Agri amage'ma nentaza disaipol naga'mo'za anage hu'za, mika vahe'mo'za oretufe aretufe hu'nazanki nahigenka, aza navako hu'ne nehane? 32 Hianagi Jisasi'a rukrehe huno keganti kegma huno avako hu'nemofonku hakare'ne. 33 Nehakregeno ana a'mo koro nehuno agu'amo'a fakifaki nehigeno kri'ama amane hu'neazanku nentahino, vea amu'nozimifi kepri huno maka kri'amo vgarenteazana huama huno asami'ne. 34 Jisasi'a anage huno ana aku hu'ne, Mofa, kagri ka'a kamentintimo kazeri knare hianki, karimpa frune vuo.

35 Anage huno nehigeno'a, osi mono nomofo kva ne' nompinti e'naza vahe'mo'za, Jairusinku huza mofa kamo'a hago fri'neanki rempi hurami ne'mofona kna omio. 36 Hianagi anama hazenkea Jisasi'a antahi amane nehuno, ana kva nera anage huno asami'ne, korora osunka kamentinti huo. 37 Maka vahera maniho hunezmanteno, Pitama Jemisi nefu Jonima huno zmavrege'za amage anteza vu'naze. 38 Ranke hu'za tusi zavi krafa hu'za zavira netageno, ana kva ne' nonte uhaniti'za ome zmage'naze. 39 Ana nompima unefreno'a, na'a higetma ranke hutma zavira netaze, mofavremo'a ofrineanki amane mase'ne. 40 Anage hiankegura zmagra kiza re'naze. Hianagi miko megi'a huzmantege'za mani'zageno, ana mofa'mofo nerarane, nefane nezanevareno amage'ma nentea disaipol naga'a nezamavreno ana mofa hunaragi antepinka ante'nazafinka ufre'naze. 41 Anante ana mofamofo azante akoheno aze'nerino Talita kum! Zamagri'a kefina osi mofa'moka Nagra kagriku huanki otio hu'ne. 42 Ana mofamo'a 12fu'a zgegafu hu'neakino ame huno otino kana vano hige'za tusi antri hu'naze. 43 Jisasi'a hanavetino ama zankura mago vahere hutma ozmasamiho nehuno, ne'za aminkeno neno huno zmasami'ne.